Mukanda wa Thomo Phetelo 5:1-14
5 Ame ngamonele luholo Klisto wamonele malamba nu mbanguheta lutumbu ludi naye gumonesewa; luholo ngudi mukulu gifua ene, ngudi muwambela* akulu adi mukatshi dienu egi:
2 Bambenu muabonga imeme ya Nzambi yamihanewe ha gubamba.* Muyitshitshigo gifua adi gumituma gu ngolo, uvi tshitenu nu mutshima wabonga gutuama dia Nzambi. Muyitshitshigo nu nzala ya guheta gima, uvi tshitenu nu gikhesa giagasue.
3 Mutuamezago athu adi khapho dia Nzambi gu ngolo, uvi khalenu ifezegeselo yabonga mukunda nu imeme.
4 Tangua Fumu wa abambi a imeme mbagamonega, mbamuheta gipho gia lutumbu ginyi gianago gubola.
5 Luholo lumoshi nji, enue mavuala, tumagelenu mambuta.* Uvi mukut’enu agasue dikalegelenu ndaga nu gudibulumuisa guagasue,* handaga Nzambi gana tshigina ndo enya lulendo, uvi wana monesa khenda jienji jiavula gudi athu a gudibulumuisa.
6 Dibulumuisenu goshi’a koko dia ngolo dia Nzambi, hagula muene wajiya gumikanduisa mu tangua diatagana.
7 Tululenu malamba* enu agasue ha mago enji, handaga muene wana gudisagesa mukunda nu enue.
8 Monesenu gutema, kangulenu meso. Mbalagaji wenu Diabulu udi muwenda gifua khoshi idi mubala, idi mukamba gudia muthu.
9 Uvi khalenu mbalagaji wenji, khalenu nu gutshigina guakola. Jiyenu egi malamba mudi mutagana nawo ana buila nji aphangi’enu a ha mavu agasue.
10 Uvi gula muamona lamba mukunda nu tangua diazonda, Nzambi wa khenda jiagasue munu wamitamegele mu lutumbu luenji lua mayilago mu gudivua nu Klisto, mbawumanesela gumihana formasio, mbawumihana gikhesa, mbawumihana ngolo, mbawumikuatesa nji ha gukhala ya gumagana tenyi.
11 Ngolo jikhale gudi muene mayilago. Amen.
12 Ngamisonegela mbimbi eji jiazonda mu ukuateshi wa Silase, ngana gumuzula gifua phangi wa gujinginyina, ngamisonegela hagula ngumihane gikhesa nu ngumitshiginyise diago egi khenda jiavula jia Nzambi jidi jia giamatshidia. Jikuatenu mangololo.
13 Yago* udi gu Babilona, watombewe gifua enue, wamitumila lumene. Mun’ami Mako wamitumila nji lumene.
14 Menegenu athu agasue nu gisemo.*
Mukut’enu agasue mudi alandudi a Klisto khalenu mu guhuima.
Mbimbi goshi'a diyiji
^ Nga “ngudi mutoga.”
^ Nga “Talenu muabonga imeme ya Nzambi.”
^ Nga “akulu.”
^ Nga “sudigenu gudibulumuisa.”
^ Nga “ndaga jia gikenene.”
^ Mbimbi ya Greke akalegela haha idi muzuelela mukhetu. Mukhetu muene wajiya gukhala hungu.
^ Mu Greke: “beze ya guzumba.”
