Mukanda wa Thomo wa Samuele 1:1-28
1 Guakhalele nu yala mumoshi mu dimbo dia Ramatayime-Sofime,* gu khanda ya milundu ya Efrayime, jina dienji Elekana, muenya Efrayime.* Wakhalele mun’a Yelohama, Yelohama wakhalele mun’a Elihu, Elihu wakhalele mun’a Tohu, Tohu wakhalele mun’a Sufe.
2 Elekana wakhalele nu akhetu mbadi, mumoshi jina dienji Ana, uvi muko Penina. Penina wavualele ana, uvi Ana wakhalele gikunya.*
3 Givo nu givo, Elekana wakhalele mukatuga mu dimbo diawo, wakhalele mukanduga gu Shilo ha gukombelela* Yehowa Nzambi wa ngolo jiagasue nu gumuhana milambu. Ana a Eli mbadi, Hofeni nu Fineyase, akhalele nganga-nzambi jia Yehowa guene.
4 Lusugu lumoshi, Elekana wahanele mulambu wa shitu. Wazanguile itshinyi ya mbiji, wahanele Penina nu an’enji agasue a mala nu a akhetu,
5 uvi wahanele Ana gitshinyi giabalega gubonga handaga wakhalele gumuzumba muavula gubalega Penina. Uvi Yehowa gahanelego Ana luendu lua guvuala.*
6 Mufuagaji’enji* Penina wakhalele nji gumumonesa lamba. Wakhalele gumulela tangua diagasue, handaga Yehowa gamuhanelego luendu lua guvuala ana.
7 Penina wakhalele gumutshita ngenyi ivo yagasue; tangua diagasue Ana wakhalele mukanduga gu inzo ya Yehowa, mufuagaji’enji wakhalele gumulela. Hene Ana wakhalele mudila, gakhalelego nji mudia.
8 Uvi mulumi’enji Elekana wamuwambelele egi : “Ana, mukunda natshi udi mudila? Mukunda natshi ushigo mudia? Mukunda natshi udi nu gikenene giavula ngenyi?* Ame ngushigo nu ndando yavula gubalega ana a mala kumi ba?”
9 Tangua amanesele gudia gu Shilo, Ana wazugile mu molu. Mu tangua diene, nganga-nzambi Eli wakhalele hashi ha nguasa yenji hehi nu mufulo wa tempelo* ya Yehowa.
10 Ana wakhalele nu gikenene giavula. Wasendesele gukombelela Yehowa nu gudila muavula.
11 Walayile Nzambi egi: “Yehowa Nzambi wa ngolo jiagasue, tala luholo ngudi mumona malamba. Gula wangutangiza ame muenya mudimo waye nu gungubuita ndo mutshima, wanguhana mona wa yala, mbanguguhana n’enji Yehowa, hagula agukalegele mudimo monyo wenji wagasue. Sanga dia muto wenji mbadikokewago nga hazonda.”
12 Wakombelele Yehowa muavula diago, Eli wakhalele mutala kano dienji.
13 Ana wakhalele muzuela mu mutshima wenji, phamba ivungu yenji yakhalele gudinyigisa. Ndaga jiakhalele muene muzuela jiakhalelego muvuiwa. Eli watangijile egi wakhalele wagukuatewa matombe.
14 Wamuwambelele egi: “Uu nu tangua ditshi udi naye gukhala wagukuatewa matombe? Bemba gunua matombe.”
15 Ana wamuvutudile egi: “Ndo fumu wami, ngudi nu gikenene giavula; nganuilego vinyo nga matombe ako akola, uvi ngudi muwambela Yehowa ndaga jidi mu mutshima wami.
16 Umonyigo muenya mudimo waye gifua mukhetu wa githuhu, handaga uu nu luenyelu ngudi mukombelela mukunda nu lamba nu gikenene giavula ngudi nagio.”
17 Eli wamuvutudile egi: “Nda mu guhuima. Nzambi wa Isalele aguhane gima wamutogi.”
18 Ana wamuwambelele egi: “Mersi avula luholo wamonesela muenya mudimo waye mutshima wabonga.” Gungima wayile, wadile, gakhalelego luko nu gikenene.
19 Elekana nu fami yenji azugile nu gimenegena giagasue, akombelele Yehowa, gungima avutugile gumbo diawo gu Rama. Elekana wabungishile muila nu mukaji’enji Ana, Yehowa wavuile gulomba gua Ana.*
20 Mu givo giene,* Ana wamitshile, wavualele mona wa yala. Wamuhanele jina egi Samuele,* handaga wazuelele egi: “Ngamutogele gudi Yehowa.”
21 Gungima Elekana wakandugile gu Shilo nu fami yenji yagasue ha guhana Yehowa mulambu wa shitu gifua luholo akhalele mutshita givo nu givo, nu ha gumuhana mulambu uko wamutendelele muene.
22 Uvi Ana gakandugilego nawo, handaga wawambelele mulumi’enji egi: “Tangua mona mbawubemba guwamua mele, mbanguya n’enji gu Shilo; mbawudimonesa gutuama dia Yehowa, mbawusala guene monyo wenji wagasue.”
23 Mulumi’enji Elekana wamuvutuile egi: “Tshita ndaga udi mumona egi idi yabonga.* Sala gu inzo uu nu tangua mona mbawubemba guwamua mele. Yehowa atagenese ndaga wakatuga guzuela.” Hene Ana wasalele gu inzo, wakhalele muwamuesa mona uu nu tangua diabembele muene guwamua.
24 Habembele mona guwamua mele, Ana wayile n’enji gu Shilo. Wabatele ngombe ya mulume ya ivo thathu nu gizongelo gimoshi* gia phupha nu bungu dia vinyo. Ana wayile gu inzo ya Yehowa hamoshi nu Samuele. Mu tangua diene, Samuele wakhalele mona wazonda.
25 Tangua ahetele guene, ashiyile ngombe, gungima abatele Samuele gudi Eli.
26 Gungima Ana wamuwambelele egi: “Ngabuba fumu! Ngudi guguwambela giamatshidia egi ame mukhetu wamaganele haha hehi nu aye mukombelela Yehowa.
27 Ngakhalele mukombelela mukunda nu mona yowu, Yehowa wanguhana diago ndaga ngamutogele.
28 Henyaha ame nji ngudi gumuhana gudi Yehowa. Ngamuhana* gudi Yehowa monyo wenji wagasue.”
Gungima wafugamele,* wakombelele Yehowa.
Mbimbi goshi'a diyiji
^ Nga “muenya Sufe wa gu Rama.”
^ Elekana wakhalele mujinga gu khanda ya milundu ya Efrayime, uvi wakhalele muenya Levi.
^ Nga “gisula.”
^ Nga “gufugamela.”
^ Mu Hebelu: “wamukangele gamvuaji.”
^ Nga “Mbanda wenji.”
^ Nga “mukunda natshi udi nu gikenene mu mutshima?”
^ Yakotelesa egi: “inzo ya tenta.”
^ Mu Hebelu: “wamuwungulugile.”
^ Nga ndo yajiya gukhala egi: “Hataganele tangua.”
^ Yakotelesa egi: “Jina dia Nzambi.”
^ Mu Hebelu: “ndaga idi yabonga gu meso aye.”
^ Balitre hehi nu 22. Tala App. B14.
^ Mu Hebelu: “Ngamusomba.”
^ Yajiya gukhala egi adi muzuelela Elekana.
