Mukanda wa Thomo wa Samuele 10:1-27
10 Samuele wazudile mulangi wa maji, waabundudile ha muto wa Saula. Wamuhanele beze, gungima wamuwambelele egi: “Yehowa wagumba maji ha gukhala mutuameji wa athu enji.*
2 Mangino tangua tuza gudikhapha nu aye, umuya musanga mala mbadi hehi nu malumba* a Rashele, gu Selesa mu mavu a enya giphuta gia Benjame. Mala ene aza guguwambela egi: ‘Phunda wayile mukamba jiamonega gale. Uvi henyaha sh’aye gashigo gudisagesa luko mukunda nu phunda, uvi udi gudisagesa mukunda nu aye. Udi muzuela egi: “Itshi ngajiya gutshita ha gumona mun’ami?”’
3 Gula wakatuga gununu, nda uu nu gu mutshi wakoma wa Tabola, umuya mutagana nu mala thathu adi mukanduga gu Betele ha gukombelela Nzambi wa giamatshidia. Mumoshi udi mubata mitumba ya khombo thathu, muko udi mubata mapha thathu, uvi muko udi mubata bungu diakoma dia matombe.
4 Mala ene aza gugumenega, aza guguhana nji mapha mbadi. Udi naye guazula.
5 Gungima udi naye guya gu gamulundu ga Nzambi wa giamatshidia, fundo didi masuta avula a enya Filistiya. Tangua uya muheta mu dimbo, uya mutagana nu baprofete avula akatuga ha fundo dia gukombelela didi gu mulundu, adi mubulumuga nu guzuela gifua luholo baprofete ana zuela. Gutuama diawo guza mukhala athu adi mushiga miziki nu ima ya gushigila miziki nu gangoma gazonda nu lumbinga nu gitare.
6 Nyuma ya Yehowa iza guguhana ngolo, aye nji uza muzuela nawo gifua luholo baprofete ana zuela. Uza musombegesa, uza mubua gifua muthu muko.
7 Tangua ndaga eji jiza mutagenesewa, kalagala ndaga yagasue watshigina handaga Nzambi wa giamatshidia udi nu aye.
8 Gungima diangela gu Gilegale, ame mbangugulandula ha guhana milambu ya guwetshia nu milambu ya guhuima. Udi naye gungunenga guene masugu sambadi uu nu tangua mbanguza. Gungima mbanguguwambela ndaga udi naye gutshita.”
9 Saula wabembele Samuele, wayile genji. Mu tangua diene, Nzambi wasendesele gusombegesa mutshima wa Saula. Ndaga jiagasue jiamuwambelele Samuele jiatagenesewe mu lusugu luene.
10 Gungima Saula nu muenya mudimo wenji akatugile fundo akhalele, ayile gu gamulundu ga Nzambi wa giamatshidia, wataganele nu baprofete avula. Mu tangua diene, nyuma ya Nzambi yamuhanele ngolo, wasendesele guzuela mukatshi diawo gifua luholo baprofete ana guzuela.
11 Tangua athu agasue akhalele gumujiya amumonele muzuela hamoshi nu baprofete gifua luholo baprofete ana zuela, adihudile egi: “Itshi yabuila mun’a Kishi? Saula wabua nji profete ba?”
12 Muthu mumoshi wa ha fundo diene wazuelele egi: “Uvi baprofete ako awa adi ana a nanyi?” Ndaga yene yabuile gishima giana zuelewa egi: “Saula wabua nji profete ba?”
13 Hamanesele muene guzuela gifua luholo baprofete ana zuela, wayile ha fundo dia gukombelela.
14 Gungima phangi’a sh’enji Kishi wamuhudile nu muenya mudimo wenji egi: “Gui muayile?” Saula wamuvutudile egi: “Tuayile mukamba phunda uvi tuajimonelego, hene tuayile gudi Samuele.”
15 Phangi’a sh’enji wamuhudile egi: “Ngabuba nguwambele, ndaga itshi yaguwambela Samuele?”
16 Saula wamuvutudile egi: “Watuwambela egi phunda jiamonega gale.” Uvi Saula gamuwambelelego egi Samuele wamuleji egi mbawubua fumu.
17 Gungima Samuele watamegele athu ha gudibungisa gutuama dia Yehowa gu Mispa.
18 Wawambelele enya Isalele egi: “Yehowa Nzambi wa Isalele udi muzuela egi: ‘Ame ngazolele Isalele gu Ejipitu, ngamihuluishile ha mago a enya Ejipitu nu ha mago a ma ufumu agasue akhalele gumimonesa lamba.
19 Uvi mangino muatuna Nzambi wenu wakhalele gumihuluisa mu malamba amaluholo agasue, muazuedi egi: “Udi naye gututombela fumu.” Henyaha maganenu gutuama dia Yehowa, muthu nu muthu mu giphuta gienji nu mu fami* yenji.’”*
20 Samuele wawambelele iphuta yagasue ya Isalele ha gusuena hehi, giphuta gia Benjame giatombewe.
21 Wawambelele fami jiagasue jia giphuta gia Benjame ha gusuena hehi, gungima fami ya Mateli yatombewe. Gu gisugishilo atombele Saula mun’a Kishi. Asendesele gumukamba uvi amumonelego.
22 Hene ahudile Yehowa egi: “Yala muene waji diago haha ba?” Yehowa waawambelele egi: “Ayi udi hene. Udi wagudisuega mukatshi dia ima.”
23 Ayile muphushi gumukamba. Saula wajile, wamaganele hakatshi na katshi dia enya Isalele. Wakhalele waleha gubalega athu agasue, athu agasue akhalele gumusugila ha phanga.
24 Samuele wawambelele athu agasue egi: “Muamona muthu Yehowa watombi ba? Gushigo nga muthu mukatshi dia athu agasue udi gifua muene!” Gungima athu agasue azuelele mangololo egi: “Fumu akhale nu monyo!”
25 Samuele wawambelele athu ima akhalele naye guhana fumu nga gumukalegela, wayisonegele mu mukanda, wawuhagele gutuama dia Yehowa. Gungima wawambelele enya Isalele agasue ha guvutuga gumbo diawo.
26 Saula wavutugile nji gumbo dienji gu Gibea. Mala a ngolo ayile n’enji handaga Yehowa wakuatele mitshima yawo.
27 Uvi athu ako agituhu amuwambelele egi: “Luholo lutshi muthu yowu wajiya gutuhuluisa?” Amuseguluile, amuhanelego nji nga kado. Uvi muene gazuelelego nga gima.*
Mbimbi goshi'a diyiji
^ Mu Hebelu: “khapho diami.”
^ Nga “njinda.”
^ Mu Hebelu: “inunu.” Yakotelesa egi mahunji a athu inunu.
^ Nga “jigo.”
^ Mu Hebelu: “Wakhalele gifua gatabu” nga “mbobo.”
