Mukanda wa Thomo wa Samuele 13:1-23
13 Saula wakhalele nu ivo . . .* tangua diabuile muene fumu wa Isalele. Gungima dia guhinyina ivo mbadi,
2 watombele mala 3 000 mukatshi dia enya Isalele; wazanguile mala 2 000 mukatshi diawo, wayile nawo gu Mikemashi nu gu khanda ya milundu ya Betele. Uvi mala ako 1 000 akhalele nu Yonatana gu Gibea mu mavu a enya giphuta gia Benjame. Gungima Saula wawambelele masuta ako anyi asalele ha guvutuga, muthu nu muthu mu tenta yenji.
3 Gungima Yonatana washiyile masuta a enya Filistiya akhalele gu Geba, enya Filistiya avuile ndaga yene. Saula watumine athu ha gushiga phungi mu mavu agasue a enya Isalele ha guzuela egi: “Enya Hebelu adi naye gujiya ndaga eyi!”
4 Enya Isalele agasue avuile egi: “Saula washiyile masuta a enya Filistiya,” avuile nji egi, “Henyaha enya Isalele abua gifua mbalagaji mukunda nu enya Filistiya.” Hene atumine athu ha gutamega athu ako hagula alandule Saula gu Gilegale.
5 Enya Filistiya nji adibungishile ha guluisa enya Isalele, ajile nu phusu-phusu jia ita 30 000 nu awendeshi a tubalu 6 000 nu masuta ako avula gifua gishegele gu khulo ya muta. Atungile phundo yawo hehi nu Mikemashi, gu khanda ya mazogelo a kumbi a Bete-Avene.
6 Enya Isalele amonele egi akhalele mu lamba diakola, handaga mbalagaji jiawo jiakhalele guasagesa. Adisuegele ako mu mawina a maseso, ako moshi’a maseso akoma, ako mu mawina, ako mu mawina a moshi’a mavu, ako mu mawina a gubambela meya.
7 Enya Hebelu ako azawugile muta wa Yordane ha guya mu mavu a enya giphuta gia Gade nu gu Gileade. Uvi Saula wakhalele gu Gilegale, athu agasue akhalele n’enji akhalele mudigita handaga akhalele muvua woma.
8 Saula wanengenene Samuele masugu sambadi gifua luholo luamuwambelele muene.* Uvi Samuele gajilego gu Gilegale. Athu abembele Saula, asendesele gumuangana.
9 Gishina giene Saula wazuelele egi: “Ngubatelenu shitu hagula nguhane mulambu wa guwetshia nu milambu ya guhuima.” Gungima wahanele mulambu wa guwetshia.
10 Hamanesele muene guhana mulambu wa guwetshia, Samuele wahetele. Saula wayile gumutagana ha gumumenega.
11 Gungima Samuele wamuhudile egi: “Ndaga itshi wakalagala?” Muene wamuvutudile egi: “Ngamonyi egi athu asendesa gungubemba, aye nji wajilego gifua luholo tuadivuile, enya Filistiya nji adibungisa gu Mikemashi.
12 Hene ngazuedi egi: ‘Enya Filistiya adi muza gu Gilegale ha gunguluisa, khenji ngutoga nji ndo ukuateshi gudi Yehowa.’ Ngamonyi egi ngudi naye guhana mulambu wa guwetshia.”
13 Gungima Samuele wawambelele Saula egi: “Watshita ndaga ya guheya diago. Watumagelego mukhuala waguhanele Yehowa Nzambi waye. Gula nga wawutumagela, nga Yehowa mbawuhana an’aye luendu lua guhinyina Isalele mayilago.
14 Uvi henyaha ufumu waye mbawushigo mushipha. Yehowa mbawukamba muthu wana kalagala diago ndaga jiana tshigina muene, Yehowa mbawumubuisa fumu wa athu enji, handaga aye watumagelego mukhuala waguhanele Yehowa.”
15 Gungima Samuele wakatugile gu Gilegale, wakandugile gu Gibea gia enya giphuta gia Benjame. Saula watangele athu asalele n’enji: akhalele mala 600.
16 Saula nu mun’enji Yonatana nu athu ako anyi asalele nawo, akhalele gu Geba mu mavu a enya giphuta gia Benjame. Uvi enya Filistiya atungile phundo yawo gu Mikemashi.
17 Thundu thathu jia masuta akhalele nu khadilo dia guzoga mu phundo ya enya Filistiya. Hunji dimoshi diakhalele muya mu njila ya Ofela, ha guya gu khanda ya Shuala;
18 hunji dia mbadi diakhalele muya mu njila ya Bete-Holone, uvi hunji dia thathu diakhalele muya mu njila idi muya mu mididilo ya baba dia Seboyime, gu khanda ya mavu a luselenga.
19 Mu tangua diene gu Isalele yagasue guakhalelego nu mbembo, handaga enya Filistiya azuelele egi: “Enya Hebelu ashigo naye gufula phogo jia khusa nga milumbu.”
20 Enya Isalele agasue akhalele muya gudi enya Filistiya ha guviga ima yawo ya gudimina mahia nu matemo awo nu iphangu yawo nu phogo jiawo jia gukatudila mbuto.
21 Akhalele mufuta pime* imoshi ha guviga ima yawo ya gudimina mahia nu matemo awo nu matemo a mazo thathu nu iphangu, nu ha gulonda mitshi ya sungu-sungu.*
22 Mu lusugu lua gulua ita, mukatshi dia athu akhalele nu Saula nga nu anyi akhalele nu mun’enji Yonatana, guakhalelego nga nu muthu muko wakhalele nu phogo ya khusa nga mulumbu. Phamba Saula nu mun’enji Yonatana akhalele nu iluilo ya ita.
23 Masuta avula a enya Filistiya* abalegele mu njila idi muya mu bengi dia Mikemashi.
Mbimbi goshi'a diyiji
^ Mu mikanda ikulu yasonegewe mu Hebelu, ivo yenji ishigo guene.
^ Nga “gifua luholo adivuile.”
^ Pime idi githeselo akhalele mukalegela mu tangua dikulu. Yakhalele bagrame hehi nu 8.
^ Nga “utadi wa sungu-sungu.” Akhalele muhaga utadi wene gu songi ya mutshi wa gutuamezela shitu.
^ Nga “Masuta a enya Filistiya akhalele muhagewa ha gukengelela.”
