Mukanda wa Thomo wa Samuele 14:1-52
14 Lusugu lumoshi Yonatana mun’a Saula wawambelele muthu wakhalele gumubatela iluilo egi: “Iza tuzawuge tuye gu phundo ya masuta a enya Filistiya idi ha sambua.” Uvi Yonatana gawambelelego sh’enji Saula ndaga yene.
2 Mu tangua diene Saula wakhalele hehi nu Gibea ha mushin’a mutshi wa grenade gu Migelone. Wakhalele nu masuta 600.
3 (Ahiya mun’a Ahituba wasudigile efode. Ahituba wakhalele phangi’a Ikaboda, Ikaboda wakhalele mun’a Fineyase, Fineyase wakhalele mun’a Eli yago wakhalele nganga-nzambi wa Yehowa gu Shilo.) Uvi masuta akhalelego mujiya egi Yonatana wayile gu phundo ya enya Filistiya.
4 Khanda jiagasue mbadi jiakhalele mutshigina gubalegela Yonatana ha guya gu phundo ya enya Filistiya, guakhalele nu maseso mbadi akhalele gifua mazo. Diko jina diadio Bosese, uvi diko Sene.
5 Seso diko diakhalele gifua kunji gu khanda ya nord ha sambua dia Mikemashi, uvi diko gu khanda ya sud ha sambua dia Geba.
6 Yonatana wawambelele muthu wakhalele gumubatela iluilo egi: “Iza tuzawuge, tuye gu phundo ya masuta a enya Filistiya, athu awa ambiwego gu mukanda. Matangua ako Yehowa wajiya gutukuatesa handaga gushigo nga gima gimoshi giajiya gukanga Yehowa njila ha guhuluisa athu enji, ikhale tudi athu avula nga azonda.”
7 Muthu wakhalele gumubatela iluilo wamuvutudile egi: “Kalagala ndaga yagasue idi guguwambela mutshima waye ha gutshita. Nda fundo diagasue watshigina guya, mbangugulandula guagasue udi muya.”
8 Yonatana wamuwambelele egi: “Tudi muzawuga ha guya gudi athu ene, tudimonese gudi ene.
9 Gula ene atuwambela egi: ‘Maganenu, mudinyigisago uu nu tangua tuza gudi enue,’ esue mbatumagana, mbatushigo mukanduga fundo didi ene.
10 Uvi gula atuwambela egi: ‘Kandugenu fundo tudi,’ mbatukanduga handaga mbayikhala gijiyishilo gidi mumonesa egi Yehowa waahana ha mago etu.
11 Gungima ayile, adimonesele gudi masuta a enya Filistiya. Hene enya Filistiya azuelele egi: “Talenu! Enya Hebelu adi muzoga mu mawina adisuegele.”
12 Gungima masuta a enya Filistiya akhalele gu phundo awambelele Yonatana nu muthu wakhalele gumubatela iluilo egi: “Gula mudi mala, kandugenu muze gugu. Tudi gumilongesa mangino!” Mu tangua diene Yonatana wawambelele muthu wakhalele gumubatela iluilo egi: “Ngulandule, Yehowa udi guahana ha mago a enya Isalele.”
13 Yonatana wasendesele gukanduga nu guwavula nu mago nu malu, muthu wakhalele gumubatela iluilo wakhalele gumulandula gungima. Yonatana wakhalele muya nu guwasa enya Filistiya nu guabuisa hashi, muthu wakhalele gumubatela iluilo wakhalele muza nu guashiya gungima dienji.
14 Tangua aluile mbala ya thomo, Yonatana nu muthu wakhalele gumubatela iluilo ashiyile enya Filistiya 20 mu gitshinyi giazonda akandugile.*
15 Gungima masuta agasue a enya Filistiya akhalele mu phundo avuile woma, nu ene masuta awo atumiwe ha guluisa enya Isalele, avuile nji woma. Mavu asendesele gudigita, Nzambi wavuishile enya Filistiya woma wakola.
16 Masuta a Saula akhalele mubandemena gu Gibea, mu mavu a enya giphuta gia Benjame, amonele luholo masuta a enya Filistiya abuile muamua-muamua mu phundo yawo.
17 Saula wawambelele masuta akhalele n’enji egi: “Ngabuba, tangenu masuta hagula tujiye nanyi gashigo mukatshi dietu.” Atangele masuta, amonele egi Yonatana nu muthu wakhalele gumubatela iluilo akhalelego hene.
18 Gungima Saula wawambelele Ahiya egi: “Suenesa Mushete wa Nzambi wa giamatshidia haha!” (Handaga mu tangua diene* Mushete wa Nzambi wa giamatshidia wakhalele gudi enya Isalele.)
19 Hakhalele Saula muzuela nu nganga-nzambi, masuta a enya Filistiya abuile luko tunga-tunga muavula mu phundo yawo. Hene Saula wawambelele nganga-nzambi egi: “Bemba ndaga udi mukalagala.”*
20 Saula nu masuta agasue akhalele n’enji adibungishile ha guya muluisa enya Filistiya. Tangua ahetele guene, amonele enya Filistiya adi gudiluisa ene hakhawo. Enya Filistiya akhalele diago tunga-tunga.
21 Enya Hebelu anyi atombele ha gukhala gu khanda ya enya Filistiya nu ayile nawo mu phundo yawo, avutugile gu khanda ya enya Isalele, asendesele gulandula Saula nu Yonatana.
22 Enya Isalele agasue anyi adisuegele gu khanda jia milundu ya Efrayime avuile egi enya Filistiya akhalele mulenga, ene nji a alanduile ha gualuisa.
23 Yehowa wahuluishile Isalele mu lusugu luene. Aluishile enya Filistiya uu nu gu Bete-Avene, abalegele nji Bete-Avene.
24 Uvi enya Isalele ahuidile handaga Saula wawambelele masuta ha gudiloga egi: “Muthu wagasue mbawudia gima* gutuama egi ngueze ibue nu gutuama egi ngubinge mbalagaji jiami, udi naye gutewa mukumbu!” Hene nga suta mumoshi gadilego mu lusugu luene.
25 Masuta agasue* anginyile mu gishitu. Mu gishitu giene muakhalele nu wigi mu mavu.
26 Tangua anginyile mu gishitu, amonele wigi mubulumuga mu mavu, uvi nga muthu mumoshi gawudilego handaga akhalele muvua woma mukunda nu gudiloga adilogele.
27 Uvi Yonatana gavuilego luholo sh’enji awambelele masuta ha gudiloga. Hene wasunuine muhango akhalele nawo ha mago, wanginyishile songi ya muhango wene mu gisela gia wigi. Tangua diadile muene wigi, meso enji aphelegetele.
28 Gungima suta mumoshi wamuwambelele egi: “Sh’aye wawambela masuta ha gudiloga egi: ‘Muthu wagasue uza mudia gima mangino, udi naye gutewa mukumbu!’ Gishina giene masuta agasue adi aguhuila.”
29 Uvi Yonatana wamuvutudile egi: “Tata wakambela athu a mu gifutshi egi lamba diakola. Ngadi ndambu ya wigi, henyaha tala luholo meso ami asendesa guhenya.*
30 Mangino gula nga wabembi egi masuta adie ima asangi gudi mbalagaji jiawo gifua luholo adi mutshigina, nga ashiyi luko enya Filistiya avula gubalega!”
31 Mu lusugu luene, masuta a Saula alanduile enya Filistiya sendese gu Mikemashi uu nu gu Ayalona ha guashiya. Uvi masuta ene ahuidile luko muavula.
32 Ayile muphushi ha gubuila ima atambudile ene gudi enya Filistiya. Azanguile imeme nu ngombe nu ana a ngombe, ayishiyile mu mavu; adile misunyi ya shitu jiene nu mahatshi ajio.
33 Muthu mumoshi wayile muwambela Saula egi: “Masuta adi mukalegela Yehowa gubola luholo adi mudia misunyi ya shitu nu mahatshi ajio.” Hene Saula wazuelele egi: “Muakalagala ndaga yabola! Langumunenu seso yakoma gugu muphushi.”
34 Gungima Saula wazuelele egi: “Balegenu mukatshi dia masuta, muawambele egi: ‘Muthu wagasue udi naye guza nu ngombe yenji nu gimeme gienji, mudi naye guyishiya haha hagula muyidie. Mudigo musunyi wa shitu nu mahatshi ayo hagula mukalegelago Yehowa gubola.’” Hene suta diagasue diajile nu ngombe mu phipha yene, ayishiyile ha seso diene diakoma.
35 Gungima Saula watungidile Yehowa giwotshielo. Giakhalele giwotshielo gia thomo giatungile muene mukunda nu Yehowa.
36 Gungima Saula wazuelele egi: “Tubulumugenu mu phipha eyi hagula tuluise enya Filistiya, tuazangule ima yawo uu nu hatshia gisugu. Mbatushigo mubemba nga mumoshi nu monyo.” Masuta amuvutudile egi: “Kalagala ndaga idi yabonga gu meso aye.” Nganga-nzambi wazuelele egi: “Tuhulenu gale Nzambi wa giamatshidia ha fundo edi.”
37 Saula wahudile Nzambi egi: “Ngudi naye gubulumuga ha guya muluisa enya Filistiya ba? Aye mbawukuatesa enya Isalele ha guabinga ba?” Uvi Nzambi gamuhanelego mvutu mu lusugu luene.
38 Saula watamegele manene agasue a enya Isalele, waawambelele egi: “Tudi naye gukamba gujiya gubola gutshi guakalegewa mangino.
39 Handaga ngudi muzuela giamatshidia gutuama dia Yehowa wahuluishile Isalele egi, gula tuajiya muthu wakalagala gubola, ikhale muthu muene udi mun’ami Yonatana, udi naye gushiyiwa.” Uvi nga muthu mumoshi gamuhanelego mvutu.
40 Gungima Saula wawambelele athu agasue a gu Isalele egi: “Enue khalenu haha, uvi ame nu mun’ami Yonatana tudi mukhala khanda iko.” Athu amuwambelele egi: “Kalagala ndaga idi yabonga gu meso aye.”
41 Gungima Saula wawambelele Yehowa egi: “Nzambi wa Isalele, tuhane mvutu mu njila ya Tumime!” Gungima Tumime yatombele Yonatana nu Saula, uvi athu ako akhalelego gawo nu gubola.
42 Saula wazuelele egi: “Tenu mubela ha gujiya gula ame nu mun’ami Yonatana, nanyi wakalagala gubola.” Mubela wakuatele Yonatana.
43 Gungima Saula wahudile Yonatana egi: “Nguwambele, ndaga itshi wakalagala?” Yonatana wamuvutudile egi: “Ngadi ndambo ya wigi ngazudi nu songi ya muhango ngudi nawo ha mago. Ame yowu! Ngushiyenu gami!”
44 Saula wazuelele egi: “Yonatana, Nzambi anguhane ndola yakola gula wafuilego.”
45 Uvi masuta awambelele Saula egi: “Yonatana gajiyilego gufua nga hazonda, handaga muene wahuluisa* enya Isalele. Tudi muzuela giamatshidia gutuama dia Yehowa egi nga sanga dienji dimoshi diajiyilego gubua mu mavu, handaga Nzambi wamukuatesa ha gukalagala ndaga yatshita muene mangino.” Ngenyi athu ahuluishile Yonatana, muene gafuilego.
46 Gishina giene Saula wabembele gulandula enya Filistiya. Enya Filistiya avutugile mu membo awo.
47 Saula wakolesele ufumu wenji gu Isalele, waluishile mbalagaji jienji jiagasue khanda nu khanda. Waluishile enya gu Moaba nu enya Amona nu enya Edome nu mafumu a gu Soba nu enya Filistiya. Mafundo agasue akhalele muya muene, wakhalele mubinga ita.
48 Waluile nu ngolo jiagasue. Wabingile enya Amaleke, wahuluishile nji enya Isalele ha mago a athu akhalele guatambula ima yawo.
49 Ana a Saula a mala akhalele: Yonatana, Yishevi nu Malekishua. Saula wakhalele nji nu ana a akhetu mbadi: wa thomo jina dienji Melabe, uvi wa galenge jina dienji Mikale.
50 Mukaji’a Saula jina dienji diakhalele Ahinoama, mun’a Ahimasa. Fumu wa masuta a Saula jina dienji diakhalele Abnere mun’a Nere; Abnere wakhalele galenge ga sh’a Saula.
51 Kishi wakhalele sh’a Saula. Nere wakhalele sh’a Abnere. Nere muene wakhalele mun’a Abiele.
52 Masugu agasue a uhinyinyi wa Saula, waluile ita yakola nu enya Filistiya. Gula Saula wamona yala wa ngolo, wakhalele gumuzula ha gubua suta dienji.
Mbimbi goshi'a diyiji
^ Nga “gitshinyi gia dihia ginyi ngombe jiabungishiwa hamoshi jiajiya gudima mu lusugu lumoshi.”
^ Mu Hebelu: “mu lusugu luene.”
^ Mu Hebelu: “Katula koko diaye.”
^ Mu Hebelu: “dipha.”
^ Mu Hebelu: “Gifutshi giagasue.”
^ Nga “gubadima.”
^ Nga “wabingisa.”
