Mukanda wa Thomo wa Samuele 15:1-35
15 Gungima Samuele wawambelele Saula egi: “Yehowa wangutumine ha gugumba maji hagula ubue fumu wa athu enji enya Isalele; henyaha tegelela ndaga jidi muzuela Yehowa.
2 Yehowa Nzambi wa Ngolo Jiagasue udi muzuela egi: ‘Mbanguhana enya Amaleke ndola handaga aluishile enya Isalele tangua akatugile gu Ejipitu.
3 Nda ushiye enya Amaleke. Udi naye guashiya nu ima yawo yagasue, uvuilago nga muthu mumoshi khenda.* Ashiye mukut’awo agasue: nu mala nu akhetu nu ana azonda nu ana a gitebe nu ngombe nu imeme nu shamo nu phunda.’”
4 Saula watamegele masuta, waatangele gu Telayime: Akhalele masuta 10 000 a mu giphuta gia Yuda, uvi ako 200 000 akhalele a mu iphuta iko ya enya Isalele.
5 Saula wayile uu nu mu dimbo dia Amaleke, waabandemene hehi nu baba.
6 Gungima Saula wawambelele enya Kena egi: “Ndenu, katugenu mukatshi dia enya Amaleke hagula ngumishiyigo nawo hamoshi; handaga muamonesele guzumba gua giamatshidia gudi enya Isalele agasue tangua akatugile gu Ejipitu.” Hene enya Kena akatugile mukatshi dia enya Amaleke.
7 Gungima Saula washiyile enya Amaleke sendese gu Havila uu nu gu Shule idi hehi nu Ejipitu.
8 Washiyile athu agasue nu phogo ya khusa. Uvi wakuatele Agaga fumu wa enya Amaleke, wamubemba nu monyo.
9 Saula nu masuta enji abembele Agaga nu monyo* nu shitu jiabalega gubonga: imeme nu ngombe nu shitu jia maji-maji nu ima yagasue yakhalele yabonga. Atshiginyilego guyishiya. Uvi ashiyile ima yagasue yakhalelego nu ndando nu inyi yakhalelego guasuanguluisa.
10 Gungima Yehowa wawambelele Samuele egi:
11 “Ngadibela* luholo ngatombele Saula ha gukhala fumu, handaga wangutuna nu watuna gutumagela mikhuala yami.” Samuele wadisagesele muavula, wakombelele Yehowa phipha ya mudidi.
12 Samuele wazugile nu gimenegena giagasue ha guya gudimona nu Saula, uvi amuwambelele egi: “Saula wayi gu Karmele. Watungi gale monima guene mukunda nu lutumbu luenji. Gungima Samuele wakuatele njila, wabulumugile gu Gilegale.”
13 Tangua Samuele wadimonele nu Saula, Saula wamuwambelele egi: “Yehowa agushimbige. Ngatumagela mbimbi jia Yehowa.”
14 Uvi Samuele wamuhudile egi: “Mukunda natshi ngudi muvua imeme nu ngombe mudila?”
15 Saula wamuvutudile egi: “Masuta ayizangula gudi enya Amaleke. Abambi* imeme nu ngombe jiabalega gubonga ha guhana mulambu gudi Yehowa Nzambi waye, uvi ima iko tuayishiyi diago.”
16 Samuele wamuvutudile egi: “Bemba guzuela! Tegelela ndaga jianguwambela Yehowa mu phipha ya mangino.” Saula wamuwambelele egi: “Zuela!”
17 Samuele wamuwambelele luko egi: “Tangua Yehowa wagumbile maji ha gubua fumu wa iphuta ya enya Isalele, wakhalele gudimona egi ushigo nu ndando.
18 Uvi gungima Yehowa wagutumine, waguwambelele egi: ‘Nda ushiye enya Amaleke handaga adi mukalagala gubola guavula. Aluise uu nu tangua mbawaashiya mukut’awo agasue.’
19 Mukunda natshi watunyi gutumagela Yehowa? Mukunda natshi wabubula ha guya muzula ima ya enya Amaleke? Mukunda natshi wakalagala ndaga jishigo musuanguluisa Yehowa?”
20 Uvi Saula wawambelele Samuele egi: “Ngatumagela Yehowa! Ngayi fundo diangutumile Yehowa, ngakuatshi Agaga fumu wa enya Amaleke hene ngeza n’enji. Uvi enya Amaleke ako ngaashiyi.
21 Mukatshi dia ima yawo yakhalele naye gushiyiwa, masuta azangula imeme nu ngombe jiabalega gubonga ha guhana mulambu gudi Yehowa Nzambi waye gu Gilegale.”
22 Samuele wazuelele egi: “Itshi yana suanguluisa Yehowa muavula? Milambu ya guwotshia nu milambu iko nga gutumagela ndaga jidi muzuela Yehowa? Tala! Gutumagela Nzambi gudi nu ndando yavula gubalega guhana milambu. Gutegelela muabonga gudi nu ndando yavula gubalega maji a imeme;
23 handaga gulumbugila Nzambi gudi guabola gifua guphonga ngombo. Gutshita ndaga nu lulendo gudi gifua gukalagala ndaga jia wanga nu gukombelela isongo.* Yehowa wagutuna, ushigo luko mukhala fumu handaga watunyi gutumagela mbimbi jienji.”
24 Saula wawambelele Samuele egi: “Ngakalagala gubola handaga ngatumagelego ndaga jiazuedi Yehowa, ngatumagelego nji mbimbi jiaye. Ngavui woma wa masuta ami, hene ngakalagala ndaga angutogi ha gutshita.
25 Uvi henyaha ngabuba, ngutotesele gubola guami, iza tuvutuge hagula ngufugame gutuama dia Yehowa.”
26 Uvi Samuele wawambelele Saula egi: “Ngushigo muya nu aye, handaga watunyi gutumagela mbimbi jia Yehowa. Yehowa nji wagutuna, mbawushigo mukhala luko fumu wa Isalele.”
27 Tangua diabalumugile Samuele ha guya, Saula wamukuatele gu songi ya mulele wenji wakhalelego nu mago, uvi mulele wene watawugile.
28 Hene Samuele wamuwambelele egi: “Mangino Yehowa wagutambula ufumu wa Isalele, mbawuwuhana gudi muthu muko udi wabonga gugubalega.
29 Nzambi wa lutumbu wa enya Isalele gajiyilego gumba mambo, mbagashigo nji musombegesa matangi enji;* handaga muene gashigo gifua athu hagula asombegese matangi enji.”*
30 Havuile Saula ngenyi, wazuelele egi: “Ngakalagala gubola. Uvi ngabuba, ngunemese gutuama dia manene a athu ami nu gutuama dia enya Isalele. Iza tuvutuge hagula ngufugame gutuama dia Yehowa Nzambi waye.”
31 Samuele wavutugile nu Saula, gungima Saula wafugamele gutuama dia Yehowa.
32 Samuele wazuelele egi: “Izenu nu Agaga fumu wa enya Amaleke haha.” Agaga gakhalelego mutshigina guya,* uvi wayile, wazuelele mu mutshima egi: ‘Ngushigo mushiyiwa luko.’*
33 Uvi Samuele wazuelele egi: “Akhetu avula ashigo nu ana handaga washiyile an’awo nu phogo yaye ya khusa, henyaha gin’aye nji mbagashigo mukhala nu ana.” Gungima Samuele washiyile Agaga nu phogo ya khusa gutuama dia Yehowa gu Gilegale.
34 Gungima Samuele wavutugile gu Rama, uvi Saula wavutugile gumbo dienji gu Gibea.
35 Samuele gamonelego luko Saula uu nu gu gufua guenji handaga wakhalele nu gikenene giavula mukunda nu Saula. Yehowa nji wadibelele luholo atombele Saula ha gukhala fumu wa enya Isalele.
Mbimbi goshi'a diyiji
^ Nga “ubembigo nga muthu mumoshi.”
^ Nga “avuidile Agaga khenda.”
^ Nga “Ngudi nu gikenene.”
^ Nga “Avui khenda mukunda nu.”
^ Mu Hebelu: “Isongo ya telafime,” yakotelesa egi nzambi jia mu fami; isongo.
^ Nga “mbagashigo muvua gikenene.”
^ Nga “hagula avue giekenene.”
^ Nga ndo yajiya gukhala egi, “gavuilego woma ha guya.”
^ Mu Hebelu: “Gikenene gia gufua giahui gale.”