Mukanda wa Thomo wa Samuele 16:1-23
16 Gungima Yehowa wawambelele Samuele egi: “Uu nu tangua ditshi mbawulandula gukhala nu gikenene mukunda nu Saula hoho ngamutunyi ha gukhala fumu wa Isalele? Zangula lumbinga luaye, luzalese nu maji. Nda gumbo dia Yese muenya gu Beteleheme, handaga ngatombi mun’enji mumoshi wa yala ha gukhala fumu.”
2 Uvi Samuele wamuvutudile egi: “Gula Saula wavua egi ngayi guene, mbawungushiya.” Yehowa wamuwambelele egi: “Zula mutumba wa ngombe, nda nawo. Mbawuzuela egi: ‘Ngeza ha guhana mulambu gudi Yehowa.’
3 Tamega Yese ha guza fundo udi muhana mulambu, gungima mbanguguwambela ndaga udi naye gutshita. Muthu munu mbangugudijiga, udi naye gumumba maji mukunda nu ame.”
4 Samuele wakalegele ndaga jiamuwambelele Yehowa. Tangua diahetele muene gu Beteleheme, akulu a mu dimbo ayile gumutagana nu gudigita. Amuhudile egi: “Waza ha gutuwambela ndaga yabonga ba?”
5 Samuele waavutudile egi: “Ayi, ngeza ha guhana Yehowa mulambu. Diphelegetesenu, zenu ha fundo ngudi muhana mulambu.” Gungima waphelegetesele Yese nu an’enji a mala, waatamegele nji ha guza ha fundo diakhalele muhana muene mulambu.
6 Tangua ahetele ha fundo diene, Samuele wamonele Eliyabe, wazuelele egi: “Yadiago muthu watombewa gudi Yehowa ha gumbiwa maji, muene yowu.”
7 Uvi Yehowa wawambelele Samuele egi: “Utadigo phala yenji nga gitala gienji, handaga ishigo muene ngatombi. Athu anago gumona ndaga gifua luholo luana mona Nzambi; handaga athu ana tala ndaga adi mumona nu meso awo, uvi Yehowa wana tala ndaga jidi mu mutshima.”
8 Gungima Yese watamegele Abinadaba, wamubalegesele gutuama dia Samuele, uvi Samuele wazuelele egi: “Muene nji Yehowa gamutombelego.”
9 Gungima Yese wabalegesele Shama gutuama dia Samuele, uvi Samuele wazuelele egi: “Muene nji Yehowa gamutombelego.”
10 Yese wabalegesele an’enji a mala sambadi gutuama dia Samuele, uvi Samuele wamuwambelele egi: “Yehowa gatombelego nga mumoshi mukatshi diawo.”
11 Gungima Samuele wahudile Yese egi: “An’aye agasue a mala enyawa ba?” Yese wamuvutudile egi: “Ndo, mona muko wa galenge gashigo haha; udi mubamba imeme.” Samuele wamuwambelele egi: “Tuma muthu aye amukambe, handaga tushigo musendesa gudia gula muene gahetelego haha.”
12 Yese watumine muthu ha guya mukamba Davidi, gungima wamubalegesele gutuama dia Samuele. Davidi wakhalele wabenga, wakhalele nu meso abonga, wakhalele nji wabonga. Yehowa wawambelele Samuele egi: “Zuga umumbe maji handaga muene ngatombi!”
13 Samuele wazanguile lumbinga lua maji, wambile Davidi maji ha meso a aphangi’enji a mala. Nyuma ya Yehowa yasendesele guhana Davidi ngolo sendese mu lusugu luene. Gungima Samuele wazugile, wavutugile gu Rama.
14 Nyuma ya Yehowa yakhalelego luko gudi Saula, Yehowa wabembele egi nyuma yabola ikhale gumusagesa muavula.
15 Lusugu lumoshi enya mudimo a Saula amuwambelele egi: “Fumu, wamona egi Nzambi wabemba egi nyuma yabola igusagese muavula.
16 Tuabuba, tuhane njila tugukambele muthu udi mujiya gushiga gitare muabonga. Ngenyi tangua diagasue mbadibemba Nzambi egi nyuma yabola igusagese muavula, muthu muene mbawugushigila gitare hagula udivue muabonga.”
17 Saula wawambelele enya mudimo enji egi: “Ngukambelenu muthu udi mujiya gushiga gitare muabonga, muze n’enji gudi ame.”
18 Muenya mudimo mumoshi wamuwambelele egi: “Ngudi mujiya muvuala mumoshi wana shiga gitare muabonga, mun’a Yese muenya gu Beteleheme. Muvuala muene udi muenya ngolo, mului wakola wa ita, wana zuela muabonga, udi nji wabonga. Yehowa udi nji n’enji.”
19 Saula watumine athu ha guwambela Yese egi: “Ngutumine mun’aye Davidi, munu wana bamba imeme.”
20 Yese watumine mun’enji Davidi gudi Saula. Wazanguile mapha nu matombe mu mulondo wa ilema ya shitu, waahagele holu dia phunda. Wazanguile nji mutumba wa khombo, wayihanele mun’enji Davidi ha guhana Saula.
21 Gungima Davidi wayile gudi Saula, wasendesele gumukalegela mudimo. Saula wasendesele gumuzumba muavula, Davidi wabuile nji mubatshi wa iluilo ya Saula.
22 Saula watumine mbimbi gudi Yese egi: “Ngabuba, ngudi mutshigina egi Davidi alandule gungukalegela mudimo, handaga ngudi musuanguluga n’enji.”
23 Tangua diagasue diakhalele mubemba Nzambi egi nyuma yabola isagese Saula muavula, Davidi wakhalele muzula gitare ha gushiga; ngenyi yakhalele mukuatesa Saula ha gudivua muabonga. Nyuma yabola nji yakhalele mubemba gumusagesa.*
Mbimbi goshi'a diyiji
^ Mu Hebelu: “Nyuma yabola yakhalele mukatuga gudi Saula.”
