Mukanda wa Thomo wa Samuele 18:1-30
18 Tangua Yonatana wavuile ndaga Davidi wawambelele Saula, Yonatana wasendesele guzumba Davidi muavula, abuile nji mafuta akola.*
2 Sendese lusugu lununu, Saula wahagele Davidi gu mudimo wenji, gatshiginyilego luko egi Davidi avutuge gudi sh’enji.
3 Yonatana nu Davidi adilogele* ha gukhala mafuta, handaga Yonatana wakhalele gumuzumba mangololo.*
4 Yonatana wahanele Davidi mulele wenji wa holu ushigo nu mago wakhalele musudiga muene, nu mulele wenji wa masuta nu phogo ya khusa nu uta wenji wa manana nu mukaba wenji.
5 Davidi wasendesele guya mulua ita gu khanda jiagasue jiakhalele gumutuma Saula, wakhalele nji mubinga.* Gishina giene Saula wamuhagele fumu wa masuta akhalele muya mulua ita. Ndaga yene yasuanguluishile athu agasue nu enya mudimo a Saula nji.
6 Davidi nu athu ako abingile enya Filistiya, hakhalele ene muvutuga, akhetu a mu membo agasue a Isalele azogele ha gutagana fumu Saula. Akhalele muyimba nu gukina nu gusuanguluga guagasue, akhalele mushiga tungoma nu lute.*
7 Akhetu akhalele mukina nu guyimba egi:
“Saula washiyile inunu ya athu,Uvi Davidi washiya makumi a inunu ya athu.”
8 Saula wavuile khabu jiavula handaga lungimbo luene luamusuanguluishilego. Wazuelele egi: “Akhetu awa adi muyimba egi Davidi washiya makumi a inunu ya athu, uvi ame phamba inunu. Guasala hazonda adi gumuhana nu wene ufumu!”
9 Sendese lusugu luene, Saula gakhalelego luko mushila Davidi mutshima.
10 Mu lusugu lualanduile, Davidi wakhalele mushiga gitare gifua muakhalele mukalagala muene; mu tangua diene, Nzambi wabembele egi nyuma yabola isagese Saula. Saula wasendesele gukalagala ndaga monzo gifua muenya malui,* wakhalele nu mulumbu ha mago.
11 Wasonele Davidi mulumbu wene, wazuelele egi: “Ngudi mukhokha Davidi gu gibayi!” Watshitshile ngenyi mbala jiyadi, uvi mu mbala jiene jiagasue Davidi walengele.
12 Gungima Saula wavuidile Davidi woma handaga Yehowa gakhalelego luko n’enji uvi wakhalele nu Davidi.
13 Saula wahagele Davidi fumu wa masuta 1 000 handaga gakhalelego luko mutshigina gumumona. Davidi wakhalele mutuameza masuta gu ita.*
14 Davidi wakhalele mubinga* ndaga jiagasue jiakhalele mukalagala muene. Yehowa wakhalele n’enji.
15 Tangua Saula wamonele egi Davidi wakhalele mubinga muavula mu ndaga jiagasue, wamuvuidile luko woma wavula.
16 Uvi enya Isalele agasue nu athu a mu giphuta gia Yuda akhalele muzumba Davidi, handaga muene wakhalele mutuameza masuta awo gu ita.
17 Gungima Saula wawambelele Davidi egi: “Mun’ami wa mukhetu wa somi Melabe muene yowu. Mbanguguhana n’enji hagula abue mukaji’aye. Uvi udi naye gulandula gumonesa gikhesa mu mudimo wami nu gulua ita ya Yehowa.” Saula wazuelele mu mutshima wenji egi: “Ame hakhami ngushigo gumushiya, uvi enya Filistiya ene mbaamushiya.”
18 Davidi wavutudile Saula egi: “Ame ngudi nanyi? Fami ya sh’ami ishigo nji nu ndando yavula gu Isalele, luholo lutshi ngajiya gubua giwaji gia fumu?”
19 Tangua diataganele ha guhana Melabe mun’a Saula gudi Davidi, uvi wakhalele wahanewa gale mu ulo gudi Adiliyele muenya gu Mehola.
20 Uvi Mikale mun’a Saula wakhalele muzumba Davidi. Ayile muwambela Saula ndaga yene, wasuangulugile diago.
21 Saula wazuelele egi: “Ngudi gumuhana mun’ami wa mukhetu hagula abue gifua muheto mukunda nu muene, hagula enya Filistiya mbaamushiye.” Saula wawambelele Davidi mbala ya ngiadi egi: “Udi mubua giwaji giami mangino.”*
22 Saula wawambelele enya mudimo enji egi: “Ndenu mu gisuegi muwambele Davidi egi: ‘Tala fumu udi musuanguluga nu aye, enya mudimo enji agasue ana guguzumba. Gila watshigina, iza ubue giwaji gia fumu.’”
23 Tangua enya mudimo a Saula awambelele Davidi ndaga yene, Davidi waavutudile egi: “Ame ngudi phutu, ngushigo nu ndando. Na luholo lutshi ngajiya gubua giwaji gia fumu?”
24 Enya mudimo ene awambelele Saula ndaga jiagasue jiazuelele Davidi.
25 Hene Saula wazuelele egi: “Ndenu muwambele Davidi egi: ‘Fumu gashigo gugutoga ima ha guzula mun’enji mu ulo, uvi wazuela egi umubatele phamba ilema 100 ya mila ya uyala ya masuta a enya Filistiya. Ngenyi fumu mbawuvutula gubola gudi mbalagaji jienji.’” Saula wazuelele ngenyi handaga wakhalele mutangiza egi enya Filistiya mbaashiya Davidi.
26 Enya mudimo ayile muwambela Davidi ndaga jiazuelele Saula, Davidi wasuangulugile ha gubua giwaji gia fumu. Gutuama egi tangua diahagele fumu ditagane,
27 Davidi nu athu enji ashiyile enya Filistiya 200, gungima wabatele fumu ilema 200 ya mila ya uyala ya masuta a enya Filistiya. Davidi wabuile giwaji gia fumu. Saula wamuhanele mun’enji wa mukhetu Mikale mu ulo.
28 Saula wakotelesele egi Yehowa wakhalele nu Davidi; wakotelesele nji egi Mikale wakhalele muzumba Davidi.
29 Saula wavuidile luko Davidi woma wavula, wabuile mbalagaji wenji monyo wenji wagasue.
30 Mafumu a enya Filistiya akhalele muya muluisa enya Isalele, uvi matangua agasue; Davidi wakhalele guabinga gubalega* masuta ako agasue a Saula. Jina dia Davidi diajiyiwe muavula.
Mbimbi goshi'a diyiji
^ Nga “wasendesele guzumba Davidi gifua muana zumba muene muila wenji.”
^ Nga “akotelele gikotelo.”
^ Nga “wakhalele muzumba Davidi gifua muana zumba muene muila wenji.”
^ Nga “wakhalele mutshita ndaga nu gutema guagasue.”
^ Gima gia gushigila mizike gia mu tangua dikulu, giakhalele gifua gitare.
^ Nga “wasendesele gutshita ndaga gifua profete.”
^ Mu Hebelu: “wakhalele muzoga nu muvutuga gutuama dia athu.”
^ Nga “wakhalelele mutshita ndaga nu gutema guagasue.”
^ Nga “udi mukota gikotelo gia ulo nu ame mangino.”
^ Nga “wakhalele mutshita ndaga nu gutema guavula diago.”
