Mukanda wa Thomo wa Samuele 19:1-24
19 Gungima Saula wawambelele mun’enji Yonatana nu enya mudimo enji agasue egi udi mutshigina gushiya Davidi.
2 Luholo Yonatana wakhalele muzumba Davidi muavula, wamuwambelele egi: “Tata udi mutshigina gugushiya. Hamene mu gimenegena utema gaye, kamba fundo dimoshi udisuege, ukhale guene.
3 Mbatuya nu guwenda nu tata mu temu, mbatumagana hehi nu fundo mbawudisuega, mbangumuhula nji ndaga yaye. Gula gudi nu mulonga, mbanguza guguwambela.”
4 Gungima Yonatana wazuelele ndaga jiabonga mukunda nu Davidi gudi sh’enji Saula. Wamuwambelele egi: “Fumu, ushigo naye gukalegela muenya mudimo waye Davidi gubola, handaga muene gagukalegelego gubola nga gumoshi. Ndaga jiakalegele muene jiakhalele mukunda nu gubonga guaye.
5 Davidi wambile monyo wenji mu gingonza ha gushiya muenya Filistiya, ngenyi Yehowa wahuluishile enya Isalele agasue gudi mbalagaji jiawo. Aye wasuangulugile tangua wamonele ndaga yene. Gula washiya Davidi, mbawukalagala gubola, mbawumuanga mahatshi a muthu gakalegelego gubola.”
6 Saula wavuile ndaga jiamuwambelele Yonatana, wadilogele egi: “Ngudi guguwambela giamatshidia mu jina dia Yehowa Nzambi wa monyo egi Davidi gashigo mushiyiwa.”
7 Yonatana watamegele Davidi, wamuwambelele ndaga jiene jiagasue. Wayile nu Davidi gudi Saula, Davidi walanduile gukalegela Saula mudimo gifua muakhalele muene mutshita thomo.
8 Gungima ita yazogele luko. Davidi wayile muluisa enya Filistiya, washiyile athu avula mukatshi diawo. Anyi asalele, alengele.
9 Lusugu lumoshi, Saula wakhalele hashi monzo yenji nu mulumbu wenji ha mago. Yehowa wabembele egi nyuma yabola imusagese muavula. Mu tangua diene, Davidi wakhalele mushiga miziki nu gitare.*
10 Saula wakambele gukhokha Davidi gu gibayi* nu mulumbu wenji, uvi Davidi washiwugile muphushi, mulumbu wene wadikumine gu gibayi. Davidi walengele mu phipha yene.
11 Gungima Saula watumine athu ha gubandemena gu inzo ya Davidi hagula amushiye mu gimenegena. Uvi mukaji’enji Mikale wamuwambelele egi: “Gula walengelego* mu phipha ya mangino, hamene mbawushiyiwa.”
12 Mu tangua diene, Mikale wazolele Davidi mbala imoshi ha fenetre ya inzo hagula alenge.
13 Mikale wazudile gisongo gia telafime,* wagihagele ha gitanda. Wazudile nji wanda wa uvuji wa khombo wawuhagele ha fundo diakhalele naye gukhala muto wa Davidi, gungima wayitshuigile nu mulele.
14 Saula watumine athu ha gukuata Davidi, uvi Mikale waawambelele egi: “Udi mukata.”
15 Saula watumine athu gumbo dia Davidi, waawambelele egi: “Mubatenu ha gitanda gienji, muze n’enji haha hagula ashiyiwe.”
16 Hanginyine athu ene, asangele gisongo gia telafime* ha gitanda nu wanda wa uvuji wa khombo ha fundo diakhalele naye gukhala muto wenji.
17 Saula wawambelele Mikale egi: “Mukunda natshi wanguhuiga? Walengesa mbalagaji wami.” Mikale wamuvutudile egi: “Wanguwambela egi: ‘Ngubembe nguye, gula ndo ngudi gugushiya!’”
18 Davidi walengele, wayile gudi Samuele gu Rama. Wamuwambelele ndaga jiagasue jiamukalegele Saula. Gungima muene nu Samuele ayile mukhala gu Nayota.
19 Gungima athu ayile muwambela Saula egi Davidi udi gu Nayota mu dimbo dia Rama.
20 Saula watumile athu mbala imoshi ha gukuata Davidi. Tangua athu ene amonele baprofete a gukola muzuela gifua luholo baprofete ana zuela nu luholo Samuele wakhalele guatuameza, ene nji ahetele nyuma ya Nzambi, asendesele gukalagala ndaga gifua baprofete.
21 Tangua awambelele Saula ndaga yene, watumine mbala imoshi athu ako. Uvi ene nji asendesele gukalagala ndaga gifua baprofete. Gungima Saula watumine luko athu ako mu mbala ya thathu, nu ene nji asendesele gukalagala ndaga gifua baprofete.
22 Gu gisugishilo Saula hakhenji wayile gu Rama. Hahetele muene gu wina diakoma dia meya didi gu Seku, wahudile athu egi: “Samuele nu Davidi adi gui?” Ene amuvutudile egi: “Adi gu Nayota mu dimbo dia Rama.”
23 Hakhalele Saula muya gu Nayota gu dimbo dia Rama, wahetele nji nyuma ya Nzambi; wasendesele gukalagala ndaga gifua baprofete njila-njila uu nu tangua ayile muheta gu Nayota mu dimbo dia Rama.
24 Hahetele Saula gudi Samuele, wakatudile milele yenji, muene nji wasendesele gukalagala ndaga gifua profete. Wabandele hashi thowa* lusugu luene luagasue nu phipha yene yagasue. Gishina giene athu ana zuela egi: “Saula nji udi profete ba?”
Mbimbi goshi'a diyiji
^ Gima gia gushigila miziki gia mu tangua dikulu, giakhalele gia gudisha nu gitare gia mangino.
^ Nga “kibindji.”
^ Nga “gula watuna gulengesa monyo waye.”
^ Nga “nzambi jia mu fami, isongo.”
^ Nga “nzambi jia mu fami, isongo.”
^ Nga “wakhalele phamba nu milele ya moshi.”
