Mukanda wa Thomo wa Samuele 2:1-36
2 Gungima Ana wakombelele egi:
“Mutshima wami udi nu gusuanguluga mukunda nu Yehowa;Yehowa wanguhanyi ngolo.*
Henyaha ngajiya guhana mvutu gudi mbalagaji jiami,Ngudi nu gusuanguluga handaga wanguhuluisa.
2 Gushigo nga muthu udi wa gijila gifua Yehowa,Gushigo nga muthu udi gifua aye,Gushigo nga seso idi yakola gifua Nzambi wetu.
3 Bembenu gudihala;Bembenu guzuela nu lulendo luagasue,Handaga Yehowa udi Nzambi wana jiya ndaga jiagasue.
Wana sophesa athu mu luholo luatagana.
4 Mata a manana a enya ngolo abogoga,Uvi athu aguleba abua enya ngolo.
5 Athu akhalele mudia muabonga adi naye gukamba mudimo hagula ahete mapha,Uvi athu akhalele nu nzala, ashigo luko nu nzala.
Mukhetu wakhalele gikunya wavuala ana a mala sambadi,Uvi mukhetu wakhalele nu ana a mala avula, wabua gikunya.*
6 Yehowa wana shiya nu wana guhuluisa;Wana tuma athu mu malumba* nu wana fuzumuna nji athu.
7 Yehowa wana buisa muthu phutu, wana buisa nji muthu muenya umonyi.
Wana bulumuna muthu nu wana gumukanduisa.
8 Wana katula muthu gashigo nu ndando mu fuphi;Nu wana katula phutu mu fuluguta dia mavu,*Ha guakhalesa fundo dimoshi nu mafumu,Nu guahana lutumbu.
Makunji a mavu adi a Yehowa,Muene wahagele mavu holu dia makunji ene.
9 Wana bamba athu adi agujinginyina gudi muene,Uvi athu abola mbaashiyiwa mu phipha,Handaga muthu gajiyilego gubinga mu ngolo jienji hakhenji.
10 Yehowa mbawushiya athu ana gumuluisa;*Mbawunumisa miandu gosa mu dilu ha gumonesa khabu jienji.
Yehowa mbawusophesa athu a ha mavu agasue.
Mbawuhana ngolo gudi fumi’enji,Mbawuvudisa luko ngolo* jia muthu wambile muene maji.”
11 Gungima Elekana wavutugile gumbo dienji gu Rama. Uvi mun’enji Samuele wasalele nu nganga-nzambi Eli, wasendesele gutshitshila Yehowa mudimo.
12 Ana a Eli akhalele athu abola; akhalelego munemesa Yehowa nga hazonda.
13 Akhalelego musuanguluga nu gitshinyi gia mbiji nganga-nzambi jiakhalele naye guzula. Tala ndaga akhalele mukalagala: Gula muthu waza muhana mulambu wa shitu, tangua mbiji yakhalele mubuagata* ha jigo, muenya mudimo wa nganga-nzambi wakhalele muza nu somo ya mazo thathu ha mago,
14 wakhalele guyinginyisa mu longa, mu nzungu ya mago mbadi, mu nzungu yakoma nga mu nzungu ya koko dimoshi. Gitshinyi giagasue giakhalele muza gu somo, nganga-nzambi wakhalele gugizula. Ana a Eli nu enya mudimo awo akhalele mutshita ngenyi gudi enya Isalele agasue akhalele muza gu Shilo.
15 Luko, gutuama egi muthu wakhalele muhana mulambu awetshie maji hagula mishi izoge, muenya mudimo wa nganga-nzambi wakhalele muza gumuwambela egi: “Hana nganga-nzambi mbiji hagula awetshie. Muene gashigo mutshigina mbiji yaye ya gutelega, phamba ya gibisu.”
16 Gula muthu muene wamuvutudila egi: “Nengena gale tuwetshie maji hagula mishi izoge, gungima uza muzangula yagasue watshigina;” muenya mudimo wakhalele muzuela egi: “Ndo nguhane luenyelu, gula ndo ngudi guyizangula gu ngolo!”
17 Hene gubola gua enya mudimo guabuile guakoma gu meso a Yehowa, handaga akhalelego munemesa milambu yakhalele muhanewa gudi Yehowa.
18 Samuele wakhalele mona wazonda, wakhalele mukalegela Yehowa mudimo, wakhalele nji musudiga efode ya linene.
19 Givo nu givo, gin’enji wakhalele gumulondela gazagu gazonda gashigo nu mago. Wakhalele gumubatela nago tangua akhalele mukanduga nu mulumi’enji gu Shilo ha guhana mulambu wa givo.
20 Lusugu lumoshi Eli washimbigile Elekana nu mukaji’enji. Wazuelele egi: “Yehowa agukuatese hagula mukhetu yowu aguvualele mona muko ha fundo dia mona muahanele gudi* Yehowa.” Gungima avutugile gumbo diayo.
21 Yehowa wavuidile Ana khenda, wamukuatesele, wavualele ana ako a mala thathu nu ana a akhetu mbadi. Uvi Samuele walanduile gukula tangua diakhalele muene mukalegela Yehowa mudimo.*
22 Mu tangua diene, Eli wakhalele diago muthu wagukola, uvi wavuile ndaga jiagasue an’enji akhalele mukalagala gudi enya Isalele agasue nu luholo akhalele mubungisa muila nu akhetu akhalele mukalagala mudimo ha mufulo wa inzo ya tenta ya gudibungishila.
23 Wakhalele guawambela egi: “Mukunda natshi mudi mulandula gutshita ndaga jia luholo elu? Ndaga jidi muzuela athu agasue mukunda nu enue jidi jiabola.
24 Ndo an’ami, ndaga jidi muzuelewa mukatshi dia akombeledi a Yehowa jishigo jiabonga.
25 Gula muthu wakalegela phangi’enji gubola, muthu muko wajiya gumutogela gudi Yehowa;* uvi gula muthu wakalegela Yehowa gubola, nanyi wajiya gukombelela mukunda nu muthu muene?” Uvi atunyile gutegelela sh’awo handaga Yehowa wazudile desizio dia guashiya.
26 Mu tangua diene, Samuele wakhalele mukula. Yehowa nu athu akhalele musuanguluga n’enji muavula.
27 Lusugu lumoshi, Nzambi watumine muthu mumoshi gudi Eli ha gumuwambela egi: “Yehowa wazuela egi: ‘Ngadijiyishile muabonga gudi enya fami ya khakh’aye tangua akhalele ahiga a Farao gu Ejipitu.
28 Ngatombele khakh’aye mukatshi dia iphuta yagasue ya Isalele hagula akhale nganga-nzambi wami ha guhana milambu ha giwotshielo giami, ha guhana uhafu,* nu ha gusudiga efode gutuama diami; ngahanele nji fami ya khakh’aye milambu yagasue idi naye guwetshiewa inyi enya Isalele* ana hana.
29 Mukunda natshi mudi musegulula* milambu ngawambelele athu ha guhana monzo yami? Mukunda natshi udi munemesa an’aye muavula gungubalega ame? Mukunda natshi mudi muzula itshinyi yabonga ya maji-maji ya milambu yagasue idi muhana enya Isalele?
30 “‘Gishina giene ame Yehowa Nzambi wa Isalele ngazuelele egi: “Fami yaye nu fami ya khakh’aye mbaangukalegela mudimo tangua diagasue.” Uvi henyaha ame Yehowa ngudi muzuela egi: “Mbayishigo mukhala luko ngenyi, handaga ngana tumbuisa athu ana gungutumbuisa, uvi ngana segulula athu ana gungusegulula.”
31 Tala! Mu masugu adi muza, mbangumikatula ngolo* jienu, aye nu enya fami ya khakh’aye. Ngenyi gushigo nga yala mumoshi wa fami yaye mbawubua muthu wagukola.
32 Tangua mbangutshita ndaga jiabonga mukunda nu enya Isalele, aye mbawumona phamba mbalagaji monzo yami. Mu fami yaye mbamushigo mukhala luko muthu wagukola nga hazonda.
33 Mbangubemba muthu mumoshi wa mu fami yaye nu monyo ha gukalagala mudimo gu giwotshielo giami; muthu muene mbawulebesa meso aye nu mbawugubatela gikenene. Uvi athu avula a mu fami yaye mbaashiyiwa gu phogo ya khusa.
34 Ndaga mbayibuila an’aye mbadi Hofeni nu Fineyase mbayikhala gijiyishilo mukunda nu aye: Mukut’awo agasue mbadi mbaafua mu lusugu lumoshi.
35 Mbangutomba nganga-nzambi mbawukhala wa gujinginyina gudi ame. Muene mbawukalagala ndaga jidi musuanguluisa mutshima wami; mbangubuisa enya fami yenji nganga-nzambi mayilago, muene mbawukhala nganga-nzambi mayilago mukunda nu muthu ngambile maji.
36 Enya fami yaye agasue asala mbaaza mufugama gutuama dienji ha guheta makuta nu mapha. Mbaamuwambela egi: “Ngabuba, ngutombe ha gukhala nganga-nzambi waye hagula nguhete gitshinyi gia dipha gia gudia.”’”
Mbimbi goshi'a diyiji
^ Mu Hebelu: “lumbinga.”
^ Mu Hebelu: “wamigina.”
^ Nga “Sheole,” yakotelesa egi fundo ana funda athu agasue. Tala Ukoteleshi wa Mbimbi (Malumba).
^ Nga ndo yajiya gukhala egi: “ha shita.”
^ Nga ndo yajiya gukhala egi: “Athu ana guluisa Yehowa mbavuishiwa woma.”
^ Mu Hebelu: “lumbinga.”
^ Nga “kubiluka.”
^ Mu Hebelu: “muasombele.”
^ Nga “gutuama dia Yehowa.”
^ Nga ndo yajiya gukhala egi: “Nzambi mbawubatula mulonga wenji.”
^ Nga ndo yajiya gukhala egi: “gukanduisa mishi ya milambu.”
^ Mu Hebelu: “ana a Isalele.”
^ Mu Hebelu: “guwasa nu kulu.”
^ Mu Hebelu: “koko.”
