Mukanda wa Thomo wa Samuele 20:1-42
-
Yonatana wasala wagujinginyina gudi Davidi (1-42)
20 Gungima Davidi wakatugile gu Nayota mu dimbo dia Rama. Wayile gudi Yonatana, wamuhudile egi: “Ndaga itshi ngatshitshi? Gubola gutshi ngakalegele? Ndaga itshi yabola ngakalegele sh’aye hene adi mutshigina gungushiya?”
2 Uvi Yonatana wamuvutudile egi: “Ndaga ya luholo elu yajiyilego gukalegewa! Mbawushigo mufua. Tala! Ndaga yagasue tata wana tshita, ikhale yazonda nga yakoma, wana gunguwambela. Mukunda natshi tata wajiya gungusuegela ndaga ya luholo elu? Mbayishigo mukalegewa nga hazonda.”
3 Uvi Davidi wamuwambelele egi: “Sh’aye udi mujiya muabonga egi wana gunguzumba mangololo. Yajiya nji gukhala egi wazuedi egi: ‘Yonatana gashigo naye gujiya ndaga eyi hagula imuhanyigo gikenene.’ Uvi ngudi guguwambela giamatshidia mu jina dia Yehowa Nzambi wa monyo nu mu jina diaye egi, guasala hazonda ngudi mufua gami!”
4 Yonatana wawambelele Davidi egi: “Ndaga yagasue mbawunguwambela, mbangugukalegela nayo.”
5 Davidi wawambelele Yonatana egi: “Hamene idi lusugu lua wano wa mbeji ihe-ihe, ame ngudi naye gudia mesa amoshi nu fumu. Gula watshigina, ngubembe nguye, mbangudisuega mu temu uu nu mu ngueze ya lusugu lua thathu.
6 Uvi gula sh’aye wangukamba, udi naye gumuwambela egi: ‘Davidi wangutogi egi udi naye guya muphushi gu Beteleheme handaga givo nu givo fami yawo yagasue yana gudibungisa giphungu gimoshi ha guhana mulambu.’
7 Gula wazuela egi ‘Gima ndo,’ ngenyi mbayimonesa egi ame muenya mudimo waye ngushigo nu ndaga ya guvuila woma. Uvi gula wavua khabu, ngenyi mbawukotelesa egi sh’aye udi diago mutshigina gungutshita gubola.
8 Monesela muenya mudimo waye guzumba gua giamatshidia, handaga tuadilogele gutuama dia Yehowa ha gukhala mafuta. Uvi gula ngakalagala ndaga yabola, aye hakhaye ngushiye. Mukunda natshi udi naye gunguhana ha mago a sh’aye?”
9 Uvi Yonatana wamuwambelele egi: “Ngajiyilego gukalagala ndaga ya luholo elu nga hazonda! Gula ngajiya egi tata udi diago mutshigina gugukalagala gubola, mbangudi guguwambela.”
10 Uvi Davidi wahudile Yonatana egi: “Luholo lutshi mbangujiya gula sh’aye waguhanyi mvutu nu khabu?”
11 Yonatana wawambelele Davidi egi: “Iza tuye mu temu.” Hene mukut’awo agasue mbadi ayile mu temu.
12 Yonatana wawambelele Davidi egi: “Yehowa Nzambi wa Isalele akhale temue wetu. Hamene nu hamene dienji, mbangukamba gujiya ndaga tata udi mutshigina gukalagala. Gula gashigo luko nu matangi a gugushiya, mbangutuma muthu ha guza guguwambela.
13 Gula ngajiya egi tata udi mutshigina gugukalagala gubola uvi ame nu guguwambela ndo ndaga yene hagula wajiya gulenga ha gudibamba, Yehowa anguhane ndola yakola. Yehowa akhale nu aye gifua muakhalele muene nu tata.
14 Aye mbawungumonesela guzumba gua giamatshidia gifua luholo Yehowa wana gutuzumba, tangua ngudi nu monyo nga tangua mbangufua ba?
15 Tangua Yehowa mbawushiya mbalagaji jiaye jiagasue ha mavu, ubuitshigo mutshima ha gumonesela enya fami yami guzumba gua giamatshidia.”
16 Yonatana wakotele gikotelo nu fami ya Davidi, wazuelele egi: “Yehowa mbawuhana ndola gudi mbalagaji jia Davidi.”
17 Hene Yonatana watogele Davidi ha gudiloga luko ha gumonesa egi wakhalele gumuzumba, handaga Yonatana wakhalele muzumba Davidi nu mutshima wenji wagasue.
18 Gungima Yonatana wawambelele Davidi egi: “Hamene mbayikhala lusugu lua wano wa mbeji ihe-ihe. Athu mbaamona egi ushigo guene handaga fundo diaye mbadikhala dia githuhu.
19 Mu lusugu lua thathu, athu mbaamona luko egi ushigo guene. Mbawuya gudisuega ha fundo wadisuegele lusugu lunu.* Udi naye gukhala guene hehi nu seso.
20 Mbangusonona mifula thathu gu khanda ya seso diene gifua ngudi musonona gima.
21 Gungima mbangutuma muenya mudimo wami ha guya muzula mifula yene. Gula ngamuwambela egi: ‘Tala, mifula idi hehi nu aye, nda uyizule,’ ngenyi wajiya guvutuga; handaga ngudi guguwambela giamatshidia mu jina dia Yehowa Nzambi wa monyo egi, mbayikotelesa egi ushigo nu ndaga yaguvuila woma nu gushigo nu ndaga yabola mbayigubuila.
22 Uvi gula ngawambela muvuala muene egi: ‘Tala, mifula idi gualeha nu aye,’ ngenyi lenga gaye handaga Yehowa udi mutshigina egi uye.
23 Yehowa akhale temue wetu ivo nu ivo mukunda nu gudiloga tuadilogele ame nu aye ha gukhala mafuta.”
24 Gungima Davidi wayile gudisuega mu temu. Tangua lusugu lua wano wa mbeji ihe-ihe luataganele, fumu wayile mukhala gu mesa ha gudia.
25 Fumu wakhalele ha fundo diana khala muene tangua diagasue, hehi nu gibayi. Yonatana wakhalele ha sambua dienji, Abnere wakhalele gu khanda ya Saula, uvi fundo dia Davidi diakhalele dia githuhu.
26 Saula gazuelelego nga gima mu lusugu luene, handaga watangijile egi: “Guajiya gukhala nu ndaga yatshita egi Davidi gakhadigo waphelegeta. Yadiago, yajiya gukhala egi gashigo waphelegeta.”
27 Gungima dia lusugu lua wano wa mbeji ihe-ihe, yakotelesa egi lusugu lua mbadi, fundo dia Davidi diakhalele luko dia githuhu. Hene Saula wahudile mun’enji Yonatana egi: “Mukunda natshi hamene nu mangino mun’a Yese gajilego mudia nu esue?”
28 Yonatana wamuvutudile egi: “Davidi wangutogi ha guya gu Beteleheme.
29 Wanguwambela egi: ‘Ngabuba, ngubembe nguye handaga fami yetu yagasue idi naye gudibungisa gu Beteleheme ha guhana mulambu, phangi’ami wangububila nji ha guya. Gula wanguvuila diago khenda, ngubembe nguye mu gisuegi ha gutala aphangi’ami.’ Gishina giene gajilego ha gudia nu fumu gu mesa enji.”
30 Saula wavuidile Yonatana khabu jiakola, wamuwambelele egi: “Aye mun’a mukhetu wa muto wakola, udi mutangiza egi ngushigo mujiya egi watombi ha gukhala gu khanda ya mun’a Yese? Idi diago ndaga ya musonyi mukunda nu aye nu gin’aye.*
31 Tangua diagasue mun’a Yese mbawukhala nu monyo, aye nu ufumu waye mbamukhala mu gingonza. Henyaha tuma muthu aye angukambele n’enji, handaga udi naye gushiyiwa.”
32 Uvi Yonatana wahudile sh’enji Saula egi: “Mukunda natshi Davidi udi naye gushiyiwa? Ndaga itshi yakalagala muene?”
33 Tangua Saula wavuile ngenyi, wasonuene Yonatana mulumbu wenji ha gumushiya. Hene Yonatana wakotelesele egi sh’enji wakhalele diago mutshigina gushiya Davidi.
34 Yonatana wakatugile mbala imoshi gu mesa nu khabu jiakola. Gadilego nga gima mu lusugu lua mbadi gungima dia wano wa mbeji ihe-ihe, handaga wakhalele nu gikenene mukunda nu Davidi luholo sh’enji wahanele Davidi musonyi.
35 Mu gimenegena Yonatana wayile mu temu ha gudimona nu Davidi ha fundo adivuile. Wayile nu muenya mudimo wenji wa muvuala.
36 Yonatana wawambelele muenya mudimo wenji egi: “Nda muphushi unguzudile mifula nguza musonona.” Muenya mudimo muene wayile muphushi, Yonatana wasonele mufula gualeha nu fundo diakhalele muene.
37 Hahetele muenya mudimo ha fundo diabuile mufula, Yonatana wamuwambelele mu dijui diakola egi: “Mufula udi gualeha nu aye!”
38 Wamuwambelele luko egi: “Tshita muphushi! Ushiphigo!” Muenya mudimo wa Yonatana wanonele mifula, wajile nayo gudi fumu wenji.
39 Muenya mudimo gakoteleselego nga gima gimoshi; phamba Yonatana nu Davidi akhalele mujiya ndaga jiakhalele mubalega.
40 Gungima Yonatana wahanele iluilo yenji gudi muenya mudimo, wamuwambelele egi: “Vutuga nayo guembo.”
41 Davidi wakhalele wagudisuega hehi nawo gu khanda ya gu sud. Tangua muenya mudimo muene wayile, Davidi wazogele, wafugamele ha mabongo gutuama dia Yonatana, washiwugile phala mu mavu mbala thathu; gungima adihanele beze, adidile. Uvi Davidi wadidile mangololo.
42 Yonatana wawambelele Davidi egi: “Nda mu guhuima handaga tuadilogele gale gutuama dia Yehowa egi: ‘Yehowa akhale temue mayilago hakatshi diami nu aye, nu hakatshi dia ajigulu* ami nu ajigulu* aye.
Gungima Davidi wayile genji, uvi Yonatana wavutugile guembo.
Mbimbi goshi'a diyiji
^ Mu Hebelu: “mu lusugu lua mudimo.”
^ Mu Hebelu: “musonyi mukunda nu thowa ya gin’aye.”
^ Mu Hebelu: “mbuto.”
^ Mu Hebelu: “mbuto.”
