Mukanda wa Thomo wa Samuele 21:1-15
21 Gungima Davidi wayile gu Nobe gumbo dia nganga-nzambi Ahimeleke. Tangua Ahimeleke wamumonele, wavuile woma, wasendesele gudigita. Wahudile Davidi egi: “Mukunda natshi udi hakhaye? Mukunda natshi ushigo nga nu muthu muko?”
2 Davidi wamuvutudile egi: “Fumu wangutumi ha gutshita ndaga imoshi. Uvi wanguwambela egi: ‘Uwambelago nga muthu mumoshi ndaga ngagutumi ha gutshita nga ndaga ngaguwambela.’ Tuadivui nu athu ami ha guya mutagana fundo dimoshi ngenyi.
3 Ngabuba, gula udi nu mapha thano, wajiya gunguhana. Nga ndo wajiya gunguhana gima giagasue udi nagio.”
4 Uvi nganga-nzambi wavutudile Davidi egi: “Ngushigo nu mapha ako uvi ngudi phamba nu mapha agijila. Athu aye ajiya guadia gula abungishilego muila nu akhetu.”
5 Davidi wavutudile nganga-nzambi egi: “Tuabungishilego muila nu akhetu, handaga tangua tuana guya mulua ita, tuana bungisago muila nu akhetu. Athu ami ana tshita yagasue ha gukhala aphelegeta gu meso a Nzambi ikhale tangua ana tshita midimo ishigo ya gijila. Mangino adi naye diago gukhala aphelegeta handaga adi mutshita mudimo wa gijila!”
6 Nganga-nzambi wamuhanele mapha a gijila, handaga guakhalelego nu mapha ako phamba mapha ahanewe gudi Nzambi, anyi akatudiwe gutuama dia Yehowa lusugu luene ha guhaga mapha ahe-ahe.
7 Mu lusugu luene, muenya mudimo mumoshi wa Saula wakhalele guene. Yakhalele mutoga egi akhale gutuama dia Yehowa. Jina dienji diakhalele Doege muenya Edome. Wakhalele fumu wa abambi a imeme ya Saula.
8 Davidi wahudile Ahimeleke egi: “Udi nu phogo ya khusa nga nu mulumbu haha ba?” Ngajilego nu phogo ya khusa nga nu iluilo yami handaga fumu wangutumi muphushi.”
9 Nganga-nzambi wamuvutudile egi: “Phogo ya khusa ya Goliyate muenya Filistiya yago washiyile mu baba dia Ela idi haha. Idi yagulanga ha mulele gungima dia efode. Gula udi mutshigina guyizula, izule handaga phamba yene idi haha.” Davidi wazuelele egi: “Gushigo nu iko yabonga gubalega eyi. Nguhane nayo.”
10 Mu lusugu luene, Davidi wakatugile ha gulenga Saula, gungima wahetele gudi fumu Akishe wa gu Gate.
11 Enya mudimo a Akishe amuwambelele egi: “Yowu ishigo Davidi fumu wa gifutshi gia Isalele ba? Ishigo muene athu akhalele mukinyila nu guyimbila egi:
‘Saula washiyile inunu ya athu,Uvi Davidi washiya makumi a inunu ya athu’?”
12 Davidi watangigijile mbimbi jiene, hene wavuile woma wavula mukunda nu Akishe fumu wa gu Gate.
13 Gishina giene gutuama diawo,* wasendesele gukalagala ndaga gifua muthu wana kata misongo ya muto. Wakhalele nji mukalagala ndaga gifua muenya malui mukatshi diawo, wakhalele musonega mifundunda mu mifolo ya dimbo nu gubulumuisa mate mu muevu wenji.
14 Gungima Akishe wawambelele enya mudimo enji egi: “Mudi mumona muabonga egi muthu yowu udi muenya malui! Mukunda natshi muangubatela n’enji?
15 Mudi mutangiza egi ngushigo nu enya malui haha, hene muangubatela muko? Muthu wa luholo elu gajiyilego gungina monzo yami!”
Mbimbi goshi'a diyiji
^ Mu Hebelu: “ha mago awo.”
