Mukanda wa Thomo wa Samuele 22:1-23
22 Gungima Davidi walengele, wayile gudisuega mu wina dia seso dia Adulama. Tangua aphangi’enji nu fami ya sh’enji yagasue avuile ndaga yene, ayile gumusanga guene.
2 Athu agasue akhalele nu malamba nu mikudi nu athu akhalelego nu gusuanguluga,* ayile nji gumusanga guene. Muene wabuile fumu wawo. Athu ene akhalele hehi nu 400.
3 Davidi wakatugile gu Adulama, wayile gu Mispa gu Moaba. Wawambelele fumu wa gu Moaba egi: “Ngabuba, tata nu mama ajiya gusala haha uu nu tangua mbangujiya ndaga Nzambi mbawukalagala mukunda nu ame.”
4 Waabembele gudi fumu wa gu Moaba, asalele guene masugu agasue akhalele Davidi yagudisuega gu milundu.
5 Gungima profete Gade wawambelele Davidi egi: “Bemba gudisuega gu milundu. Nda mu mavu a Yuda.” Hene Davidi wayile mu gishitu gia Helete.
6 Awambelele Saula egi amonyi Davidi nu athu enji. Saula wakhalele hashi gu Gibea ha mushin’a mutshi wa tamalise holu dia ga mulundu, wakhalele nu mulumbu wenji ha mago. Enya mudimo enji akhalele agumujieta.
7 Saula waawambelele egi: “Enue enya giphuta gia Benjame ngutegelelenu. Mukut’enu agasue mun’a Yese mbawumihana nji mahia nu ilanga ya vinyo ba? Mbawumihaga nji mafumu a athu 1 000 nga a athu 100 ba?
8 Mukut’enu agasue muanguyila giphungi! Gushigo nga nu muthu mumoshi wanguwambela egi mun’ami wakotshi gikotelo nu mun’a Yese! Gushigo nga nu muthu wanguvuila khenda nga gunguwambela egi mun’ami watumi muenya mudimo wami ha gungulumbugila. Henyaha ndaga yene yamonega haphelo.”
9 Doege muenya Edome, fumu wa enya mudimo a Saula wakhalele hene. Wavutudile Saula egi: “Ngamonyi mun’a Yese gu Nobe gumbo dia Ahimeleke mun’a Ahituba.
10 Ahimeleke wakambi utuameji wa Yehowa mukunda nu Davidi, wamuhanyi ima ya gudia. Wamuhanyi nji phogo ya khusa ya Goliyate muenya Filistiya.”
11 Fumu watamegele mbala imoshi nganga-nzambi Ahimeleke mun’a Ahituba nu nganga-nzambi jiagasue jia mu fami ya sh’enji anyi akhalele gu Nobe. Mukut’awo agasue ajile gudi fumu.
12 Saula wazuelele egi: “Tegelela mun’a Ahituba!” Muene wamuvutudile egi: “Ame yowu fumu!”
13 Saula wamuhudile egi: “Mukunda natshi aye nu mun’a Yese muanguyila giphungi? Wamuhana mapha nu phogo ya khusa, wamukambela nji utuameji wa Nzambi! Muene udi gunguluisa nu udi gungulumbugila gifua luholo ndaga yene yamonega haphelo mangino.”
14 Ahimeleke wavutudile fumu egi: “Mukatshi dia enya mudimo aye agasue, nanyi udi muthu wagushila mutshima* gifua Davidi? Udi giwaji giaye, fumu wa masuta ana gugubamba, wana nemesewa muavula mu inzo yaye.
15 Mangino ishigo mbala ya thomo ngakambela Davidi utuameji gudi Nzambi. Ngajiyilego gukalagala nga hazonda ndaga udi muzuela! Fumu ngabuba, utangijilago muenya mudimo waye ndaga yabola nga enya fami yagasue ya tata, handaga ngushigo mujiya nga gima gimoshi giatadila mulonga wene.”
16 Uvi fumu wamuwambelele egi: “Ahimeleke, nu aye nu enya fami yagasue ya sh’aye mudi mufua.”
17 Gungima fumu wawambelele masuta akhalele gumubamba, anyi akhalele agumujieta egi: “Shiyenu nganga-nzambi jia Yehowa, handaga adi gu khanda ya Davidi! Akhalele mujiya egi Davidi udi mulenga, uvi ene nu gunguwambela ndo!” Uvi masuta ene atunyile gawo gushiya nganga-nzambi jia Yehowa.
18 Gungima fumu wawambelele Doege egi: “Aye nda, shiya nganga-nzambi!” Doege muenya Edome wayile mbala imoshi waashiyile. Mu lusugu luene washiyile athu 85 akhalele agusudiga efode ya linene.
19 Wayile muluisa nji Nobe, dimbo dia nganga-nzambi; washiyile mala nu akhetu nu ana nu ana a gitebe nu ngombe nu phunda nu imeme nu phogo ya khusa.
20 Uvi Abiatare mun’a Ahimeleke, mujigulu wa Ahituba walengele, wayile gudi Davidi.
21 Abiatare wawambelele Davidi egi: “Saula washiya nganga-nzambi jia Yehowa.”
22 Davidi wawambelele Abiatare egi: “Tangua ngamonele Doege muenya Edome gu Nobe lusugu lununu, ngajiyile egi mbawudi muya muwambela Saula. Ame ngashiyisa enya fami yagasue* ya sh’aye.
23 Khala haha nu ame. Uvuigo woma, handaga gula muthu wakamba gugushiya,* idi gifua udi mukamba nji gungushiya ame;* mbangugubamba muabonga.”
Mbimbi goshi'a diyiji
^ Nga “akhalele nu gikenene mu mitshima.”
^ Nga “wagujinginyina.”
^ Nga “mionyo yagasue.”
^ Nga “monyo waye.”
^ Nga “monyo wami.”
