Mukanda wa Thomo wa Samuele 23:1-29
23 Gungima awambelele Davidi egi enya Filistiya adi muluisa dimbo dia Keyila, adi nji mukuya mbuto mu mafundo ana suwila* mbuto.
2 Davidi wahudile Yehowa egi: “Ngudi naye guya ha guluisa enya Filistiya ba?” Yehowa wamuwambelele egi: “Nda uluise enya Filistiya ha guhuluisa dimbo dia Keyila.”
3 Uvi athu a Davidi azuelele egi: “Tudi mu mavu a enya Yuda, uvi tudi muvua woma. Mbayikhala ndaga yabola gubalega gula tuaya gu dimbo dia Keyila ha guluisa masuta a enya Filistiya!”
4 Davidi wahudile luko Yehowa. Yehowa wamuwambelele egi: “Zuga, nda gu Keyila handaga mbanguhana enya Filistiya ha mago aye.”
5 Davidi nu athu enji ayile gu Keyila ha guluisa enya Filistiya; washiyile enya Filistiya avula, waatambuile shitu jiawo. Wahuluishile enya gu Keyila.
6 Tangua Abiatare mun’a Ahimeleke walengele ha guya musanga Davidi gu Keyila, wayile nu efode.
7 Athu awambelele Saula egi: “Davidi udi gu Keyila.” Saula wazuelele egi: “Nzambi wamuhana ha mago ami,* handaga waditela muheto luholo luangina muene mu dimbo diana kangewa nu ijidigo yakola.”
8 Saula wabungishile masuta enji agasue ha guya gu Keyila ha gujieta* Davidi nu athu enji.
9 Tangua Davidi wajiyile egi Saula udi gudilondega ha guza gumuluisa, wawambelele nganga-nzambi Abiatare egi: “Ngubatele efode.”
10 Davidi wakombelele egi: “Oo Yehowa Nzambi wa Isalele, ngavui egi Saula udi mutshigina guza gu Keyila ha gushiya dimbo diagasue mukunda nu ame.
11 Mafumu* a gu Keyila mbaadi gunguhana ha mago enji ba? Saula mbawudi muza gifua luholo ngayivui ba? Oo Yehowa Nzambi wa Isalele, ngabuba nguwambele.” Yehowa wamuwambelele egi: “Mbawudi muza.”
12 Davidi wahudile egi: “Mafumu a gu Keyila mbaadi gunguhana ame nu athu ami ha mago a Saula ba?” Yehowa wamuvutudile egi: “Mbaadi gumihana ha mago enji.”
13 Davidi nu athu enji hehi nu 600 akatugile mu dimbo dia Keyila, ayile gu khanda iko ha gukamba fundo ajiya gukhala mu guhuima. Tangua awambelele Saula egi Davidi walengi, gashigo luko gu Keyila, Saula gamuhatelego luko.
14 Davidi wayile mukhala mu mavu a luselenga, mu mafundo akhalele lamba ha guheta, gu khanda ya milundu idi mu mavu a luselenga adi hehi nu dimbo dia Zife. Saula wakhalele gumukamba tangua diagasue, uvi Yehowa gabembelego egi Saula amukuate.
15 Tangua Davidi wakhalele gu Holesha, mu mavu a luselenga adi hehi nu dimbo dia Zife, wavuile egi* Saula wakhalele mukamba guza ha gumushiya.
16 Yonatana mun’a Saula wayile mutala Davidi gu Holesha. Wamukuatesele* ha gushila diago Yehowa mutshima.
17 Wamuwambelele egi: “Uvuigo woma, tata mbagashigo guguheta; aye mbawudi mubua fumu gu Isalele, ame mbangukhala muthu wa mbadi gungima diaye. Tata nji wana jiya ndaga eyi.”
18 Gungima Davidi nu Yonatana akotele gikotelo gutuama dia Yehowa. Davidi wasalele gu Holesha, Yonatana wayile gumbo dienji.
19 Gungima mala a gu Zife ayile muwambela Saula gu Gibea egi: “Davidi udi wagudisuega hehi nu esue mu mafundo adi lamba ha guheta gu Holesha, gu ga mulundu ga Hakila gadi gu sud* ya Yeshimona.*
20 Fumu, wajiya guza tangua diagasue watshigina, mbatumuhana ha mago aye.”
21 Saula waawambelele egi: “Yehowa amikuatese handaga muanguvuila khenda.
22 Ndenu mukambe muabonga fundo didi muene nu muthu wamumonyi, handaga anguwambela egi udi diago watema muavula.
23 Kambenu muabonga ha gujiya mafundo agasue ana gudisuega muene, mungubatele ijiyishilo. Gungima ame mbanguya n’enu, gula udi mu gifutshi, mbangumukamba mukatshi dia fami jiagasue jia giphuta gia Yuda.”
24 Gungima athu ene abembele Saula, adiangele gu Zife. Mu tangua diene, Davidi nu athu enji akhalele mu mavu a luselenga a Maona gu Araba, gu khanda ya sud ya Yeshimona.
25 Saula nu athu enji ayile ha gukamba Davidi. Tangua awambelele Davidi ndaga yene, wayile mbala imoshi mu seso diakoma diakhalele mu mavu a luselenga a Maona, wakhalele guene. Tangua Saula wavuile ndaga yene, walanduile Davidi mu mavu a luselenga a Maona.
26 Saula wahetele sambua diko dia mulundu, Davidi nu athu enji akhalele gu sambua diko dia mulundu. Davidi wakhalele muya muphushi ha gulenga Saula, uvi Saula nu athu enji asuenele hehi nu Davidi nu athu enji ha guakuata.
27 Uvi muthu mumoshi wajile muwambela Saula egi: “Za muphushi, enya Filistiya aza muluisa gifutshi!”
28 Saula wabembele gulandula Davidi, wayile muluisa enya Filistiya. Gishina giene ana tamega fundo diene egi Seso dia Ukhaphumunyi.
29 Gungima Davidi wakatugile guene, wayile mukhala mu mafundo adi lamba ha guheta gu Ene-Gedi.
Mbimbi goshi'a diyiji
^ Nga “gusungunuina.”
^ Mu Hebelu: “wamudiga ha mago ami.”
^ Nga “gujienga.”
^ Nga ndo yajiya gukhala egi: “Afumi’a mavu.”
^ Nga ndo yajiya gukhala egi: “wavuile woma handaga.”
^ Mu Hebelu: “Wakolesele koko guenji.”
^ Mu Hebelu: “gu khanda ya koko dia madia.”
^ Nga ndo yajiya gukhala egi: “mu mavu a luselenga.”
