Mukanda wa Thomo wa Samuele 24:1-22
24 Saula wayile muluisa enya Filistiya. Havutugile muene, amuwambelele mbala imoshi egi: “Tala! Davidi udi mu mavu a luselenga a Ene-Gedi.”
2 Gungima Saula wazudile mala 3 000 atombele muene gu Isalele ya mudidi, wayile mukamba Davidi nu athu enji mu maseso, fundo khombo jia mu milundu jiana jinga.
3 Saula wahetele gu phango jia imeme jialondewe nu maseso; phango jiene jiakhalele gu khulo ya njila. Wina dia seso diakhalele fundo diene, Saula wanginyile muene ha gudizunga.* Davidi nu athu enji akhalele hashi gu khokha* ya wina diene dia seso.
4 Masuta a Davidi amuwambelele egi: “Mangino Yehowa udi guguwambela egi: ‘Tala! Ngahana mbalagaji waye ha mago aye, mutshite ndaga yagasue watshigina.’” Davidi wazugile, wakokele mage-mage songi ya mulele wa holu wa Saula ushigo nu mago.
5 Gungima mutshima wa Davidi wasendesele gumubudiga, handaga wakokele songi ya mulele wa Saula wa holu.
6 Davidi wawambelele masuta enji egi: “Ngajiyilego gukalagala ndaga ya luholo elu gudi fumi’ami, handaga Yehowa wamutombele ha gukhala fumu. Yehowa mbagashigo musuanguluga nga hazonda gula ngakalagala ndaga yabola gudi muthu Yehowa watombele ha gukhala fumu.”
7 Mbimbi eji jiazuelele Davidi jiakangele masuta enji njila* ha gushiya Saula. Saula wazogele mu wina, wayile genji.
8 Gungima Davidi wazogele mu wina, watamegele Saula egi: “Fumu!” Tangua Saula watalele gungima, Davidi wafugamele, washiwugile phala mu mavu.
9 Davidi wawambelele Saula egi: “Mukunda natshi udi muvua ndaga jidi muzuela athu egi: ‘Davidi udi mukamba gugutshita gubola’?
10 Lusugu lua mangino wadimonela hakhaye egi Yehowa waguhanyi ha mago ami mu wina dia seso. Muthu mumoshi wanguwambela egi ngugushiye, uvi ngaguvuila khenda, ngazuedi egi: ‘Ngajiyilego gutshita fumu wami gubola handaga Yehowa wamutombele.’
11 Tata, tala! Ngudi nu songi ya mulele waye wa holu ha mago; tangua ngabatula mulele wene, ngakhala naye gugushiya, uvi ngagushiyilego. Mangino wamona muabonga egi ngushigo mutshigina gugutshita gubola nga gugulumbugila. Ngagutshitshilego nga gubola gumoshi, uvi aye udi gungukamba ha gungushiya.
12 Yehowa akhale nzuji hakatshi diaye nu ame. Yehowa mbawuvutula gubola udi gungukalegela, uvi ame mbangushigo gugutshita gubola nga hazonda.
13 Gifua muana zuela gishima gimoshi gia mualeha egi: ‘Ndaga jiabola jiana katuga gudi muthu wabola,’ uvi ame mbangushigo gugutshita gubola nga hazonda.
14 Fumu wa Isalele udi mukamba guluisa nanyi? Ame ngudi nanyi? Ame imbua ya gufua, gambuangala ga githuhu!
15 Yehowa akhale nzuji, atusophese aye nu ame. Muene mbawumona mulonga wami nu mbawunguzuelela, mbawungusophesa nu mbawunguhuluisa ha mago aye.”
16 Tangua Davidi wamanesele guzuela mbimbi eji, Saula wamuhudile egi: “Aye mun’ami Davidi udi muzuela ba?” Gungima Saula wasendesele gudila mangololo.
17 Wawambelele Davidi egi: “Aye udi muthu wabonga gungubalega ame; handaga wangutshitshila ndaga jiabonga, uvi ame ngaguvutudila gubola.
18 Mangino wangukalegela ndaga jiabonga gifua luholo wanguwambela, wangushiyilego ngatshima Yehowa wanguhanyi ha mago aye.
19 Gula muthu wakuata mbalagaji wenji, wajiya gumubemba hagula aye mu guhuima ba? Yehowa mbawugukuatesa mukunda nu ndaga wangukalegela mangino.
20 Ngutegelele! Ngumujiya egi mbawudi mubua fumu, ufumu wa Isalele mbawulandula gukhala ha mago aye.
21 Diloge mu jina dia Yehowa egi mbawushigo mushiya ajigulu* ami gula ngafua, mbawushigo nji mutotesa jina diami mu fami ya tata.”
22 Davidi wadilogele gudi Saula, gungima Saula wayile gumbo dienji. Uvi Davidi nu athu enji ayile gudisuega gu milundu.
Mbimbi goshi'a diyiji
^ Mu Hebelu: “ha gutshuiga ikanzo yenji.”
^ Nga “gu kumo.”
^ Nga ndo yajiya gukhala egi: “jiaamuangele.”
^ Mu Hebelu: “mbuto.”
