Mukanda wa Thomo wa Samuele 25:1-44
25 Gungima Samuele wafuile; enya gu Isalele agasue adibungishile ha gumudila, amufundjile hehi nu inzo yenji gu Rama. Davidi wakatugile, wayile mu mavu a luselenga a Parane.
2 Guakhalele nu muthu mumoshi gu Maona, wakhalele nu shitu gu Karmele.* Muthu muene wakhalele nu umonyi wavula: wakhalele nu imeme 3 000 nu khombo 1 000. Mu tangua diene, wakhalele mukoka imeme yenji uvuji gu Karmele.
3 Yala muene jina dienji Nabale, wakhalele mujigulu wa Kalebe. Mukaji’enji jina dienji Abigayile. Mukhetu muene wakhalele watema, wakhalele nji wabonga; uvi mulumi’enji wakhalele muenya ndaga jiakola, wakhalele nji muthu wabola.
4 Hakhalele Davidi mu mavu a luselenga, wavuile egi Nabale udi mukoka imeme yenji uvuji.
5 Davidi watumine mavuala a mala kumi gu Karmele. Waawambelele egi: “Gula muaheta gumbo dia Nabale, nguhudilenu n’enji gula udi gikuatshi.
6 Gungima muwambelenu egi: ‘Guhuima gukhale nu aye nu athu a monzo yaye nu ima yaye yagasue.
7 Ngavui egi udi mukoka imeme yaye uvuji. Tangua tuakhalele nu abambi a imeme yaye, tuaakalegelego nga ndaga imoshi yabola. Gushigo nga gima gimoshi giatotele masugu agasue akhalele ene gu Karmele.
8 Hula athu aye agutele lumene. Ngudi gugutoga ha guyamba athu ami nu gusuanguluga, handaga idi sungi ya wano.* Ngabuba, hana mun’aye Davidi nu enya mudimo aye ima ya gudia.’”
9 Athu a Davidi ayile, awambelele Nabale ndaga jiagasue jia awambelele Davidi. Tangua amanesele guzuela,
10 Nabale waavutudile egi: “Davidi muene udi nanyi? Mun’a Yese udi nanyi? Masugu awa enya mudimo avula adi mulenga gumbo dia mafumu awo.
11 Ngajiyilego guzula mapha ami nu meya ami nu shitu ngashiyila athu adi mubatula uvuji wa imeme, ha guhana athu adi mukatuga gula gui.”
12 Athu a Davidi avutugile, amuwambelele ndaga jiene jiagasue.
13 Davidi wawambelele athu enji mbala imoshi egi: “Mukut’enu agasue zulenu phogo jienu jia khusa!” Azudile phogo jiawo jia khusa, Davidi nji wazudile phogo yenji ya khusa. Athu hehi nu 400 ayile nu Davidi, uvi athu ako 200 asalele mutalela ima.
14 Mu tangua diene, muenya mudimo mumoshi wajile muwambela Abigayile mukaji’a Nabale egi: “Davidi udi mu mavu a luselenga. Watumi athu enji ha guza mumenega fumi’etu, uvi muene waashingi.
15 Athu ene atukalegele ndaga nu gisemo giavula. Atukalegelego nga ndaga imoshi yabola. Tuatoteselego nga gima gimoshi masugu agasue tuakhalele nawo mu temu.
16 Masugu agasue tuakhalele nawo tangua tuakhalele mubamba imeme, akhalele gifua gibayi* giakhalele gutubamba phipha nu muanya.
17 Tshita yagasue wajiya gutshita, gula ndo malamba aza mubuila fumi’etu nu athu agasue a monzo yenji. Muene udi gifua muthu wa githuhu, gushigo nu muthu wajiya gumuwambela gima.”
18 Abigayile wazudile muphushi mapha 200, mabungu mbadi akoma a matombe a vinyo nu sea* thano jia mbuto jia gukalanga nu bagato 100 alondewe nu mabundu a vinyo, nu bagato 200 alondewe nu mabundu a figi, washiyile nji imeme thano. Wahagele ima yene yagasue ha phunda.
19 Gungima wawambelele enya mudimo enji egi: “Diangelenu gutuama, ame nguza gumilandula.” Uvi gawambelelego mulumi’enji Nabale nga gima.
20 Abigayile wakhalele mubulumuga mu mulundu holu dia phunda. Davidi nu athu enji akhalele muza uvi akhalelego gumumona handaga wakhalele muza gu khanda iko ya mulundu. Gungima, ataganele.
21 Davidi wakhalele muza nu guzuela egi: “Ngalabele gubamba ima yagasue ya muthu yowu mu mavu a luselenga. Gushigo nga nu gima gienji gimoshi giatotele. Uvi muene wanguvutudila gubola mu ndaga jiabonga ngamukalegele.
22 Nzambi ahane mbalagaji jiami* ndola yakola gula uu nu mu gimenegena ngashiyilego mala agasue* a monzo ya Nabale.”
23 Tangua Abigayile wamonele Davidi, watulugile muphushi holu dia phunda, wafugamele gutuama dia Davidi, washiwugile phala mu mavu.
24 Gungima wabuile mu malu enji, wazuelele egi: “Fumu, tshita gifua gubola gudi guami; ngabuba, nguhane njila nguzuele. Tegelela ndaga jidi muzuela muenya mudimo waye.
25 Ngabuba fumu, ulandulago ndaga jiazuedi Nabale muthu wa githuhu; handaga Nabale* udi muthu waheya gifua mudi mukotelesa jina dienji. Uvi ame muenya mudimo waye ngamonelego athu watumi.
26 Henyaha fumu, ngudi guguwambela giamatshidia mu jina dia Yehowa Nzambi wa monyo nu gutuama diaye egi, Yehowa wagukandji hagula ushiyigo athu nu uvutulago gubola mu gubola.* Mbalagaji jiaye nu athu agasue adi mutshigina gugutshita gubola, abue gifua Nabale.
27 Henyaha ngabuba fumu, zula kado* gaga ngagubatela, uhane mavuala a mala mudi nawo.
28 Ngabuba fumu, ngutotesele. Yehowa mbawutshita egi ajigulu aye ahinyine matangua avula, handaga aye wana lua ita mukunda nu Yehowa. Sendese wavualewe, khenji agusangele nu gubola nga gumoshi.
29 Gula muthu udi mutshigina gugushiya, Yehowa Nzambi waye mbawugubamba gifua luholo muthu wana bamba ima ya ndando mu kuba. Muene mbawusonona monyo wa mbalagaji jiaye gifua luholo ana sonona maseso nu lanse.
30 Tangua Yehowa mbawugukalegela ndaga jiagasue jiabonga jiagulayele muene nu mbawuguhaga fumu ya Isalele yagasue,
31 mbawushigo gudibela* mu mutshima luholo walabele gushiya athu nu wavutuile gubola mu gubola.* Gula Yehowa wagukalegela ndaga jiabonga, tangiza muenya mudimo waye.”
32 Hene Davidi wavutudile Abigayile egi: “Yehowa Nzambi wa Isalele atumbuishiwe. Muene wagutumi ha guza gungutagana mangino!
33 Nzambi agushimbige mukunda nu gutema guaye! Agushimbige nji handaga wangukanda hagula ngushiyigo athu nu nguvutulago gubola mu gubola.*
34 Ngudi guguwambela giamatshidia mu jina dia Yehowa Nzambi wa Isalele, munu wangukangi njila hagula ngugukalegelago gubola egi: Gula nga wajilego muphushi ha gutagana nu ame, nga yala wagasue* wa monzo ya Nabale wakhadi naye gufua gutuama egi guma gutshie.”
35 Davidi watshiginyile ima yamubatele Abigayile, wamuwambelele egi: “Vutuga mu guhuima gumbo diaye. Tala, ngavua ndaga wazuela. Mbangutshita ndaga wangutogi.”
36 Havutugile Abigayile gudi Nabale, wamusangele mutshita wano wakoma gifua fumu. Nabale* wakhalele nu gusuanguluga, matombe akhalele amukuatshi gale muavula. Abigayile gamuwambelelego nga gima uu nu hatshiele gisugu.
37 Mu gimenegena tangua matombe amuhuile gu meso, Abigayile wamutele lumene. Mutshima wamuzogele. Wamaganele tshididi gifua seso.
38 Gungima dia masugu kumi, Yehowa washiyile Nabale.
39 Tangua Davidi wavuile egi Nabale wafua, wazuelele egi: “Yehowa atumbuishiwe! Handaga wasophesa mulonga wami mukunda nu mashingo angushingile Nabale. Wangukandele hagula ngukalagalago ndaga imoshi yabola. Yehowa wavutudila Nabale gubola guakalegele muene.” Gungima Davidi watumile athu ha guya muwambela Abigayile egi udi mutshigina gumuzula mu ulo.
40 Enya mudimo a Davidi ayile gudi Abigayile gu Karmele, amuwambelele egi: “Davidi watutuma tuguzule hagula ubue mukaji’enji.”
41 Abigayile wazugile mbala imoshi, wafugamele phala mu mavu. Wazuelele egi: “Wambelenu fumu wami egi; ‘Ame muenya mudimo waye ngudi hehi ha guwevua ikanzo ya enya mudimo a fumi’ami.’”
42 Gungima Abigayile wazugile muphushi, wanginyile holu dia phunda. Enya mudimo enji thano a akhetu akhalele gumulandula gungima; wayile nu enya mudimo a Davidi, wabuile mukaji’enji.
43 Davidi wazudile nji Ahinoama wa gu Yizelele mu ulo. Mukut’awo agasue mbadi, abuile akaji’enji.
44 Uvi Saula wakhalele wahanyi gale mun’enji wa mukhetu Mikale mukaji’a Davidi, mu ulo gudi Phaleti mun’a Layisha wa gu Galime.
Mbimbi goshi'a diyiji
^ Karmele adi muzuelela haha idi dimbo dia mu mavu a Yuda; uvi ishigo Mulundu wa Karmele.
^ Mu Hebelu: “mu lusugu luabonga.”
^ Nga “kibindji.”
^ Sea imoshi yakhalele balitre 7,33. Tala App. B14.
^ Nga ndo yajiya gukhala egi: “ahane Davidi.”
^ Mu Hebelu: “muthu wagasue udi mususa gu gibayi.” Mbimbi ya Hebelu akhalele mukalegela ha gusegulula mala.
^ Yakotelesa egi: “muthu waheya.”
^ Nga “udihuluisago.”
^ Mu Hebelu: “gishimbigo.”
^ Mu Hebelu: “gudihula muavula nga gukhakhuga.”
^ Nga “luholo wadihuluishile.”
^ Nga “ngudihuluisago.”
^ Mu Hebelu: “muthu wagasue udi mususa gu gibayi.” Mbimbi ya Hebelu akhalele mukalegela ha gusegulula mala.
^ Mu Hebelu: “Mutshima wa Nabale.”
