Mukanda wa Thomo wa Samuele 26:1-25
26 Gungima enya gu Zife ayile gudi Saula gu Gibea, amuwambelele egi: “Davidi udi yagudisuega mu gamulundu ga Hakila gadi ha sambua dia Yeshimona.*
2 Saula nu athu 3 000 atombele muene gu Isalele, ayile mu mavu a luselenga a Zife ha gukamba Davidi.
3 Saula wahagele phundo yenji mu gamulundu ga Hakila gadi ha sambua dia Yeshimona, hehi nu njila. Davidi wakhalele mujinga mu mavu a luselenga. Wavuile egi Saula waji mu mavu a luselenga ha gumukamba.
4 Davidi watumile athu ha gukamba gujiya gula Saula waji gale.
5 Gungima Davidi wayile fundo diahagele Saula phundo yenji. Wamonele fundo diabandele Saula nu Abnere mun’a Nere, fumi’a masuta a Saula. Saula wabandele hakatshi na katshi dia phundo, masuta akhalele a gumujieta.
6 Davidi wawambelele Ahimeleke muenya Hete nu Abishayi mun’a Seluya, phangi’a Yoabe egi: “Nanyi uya gungutuala gu phundo ya Saula?” Abishayi wamuvutudile egi: “Ame nguya gugutuala.”
7 Davidi nu Abishayi anginyile mu phundo mu phipha. Asangele Saula ya gubanda, mulumbu wenji wakhalele wa gujiga mu mavu hehi nu muto wenji. Abnere nu masuta ako akhalele a gubanda a gumujieta.
8 Abishayi wawambelele Davidi egi: “Mangino Nzambi wahana mbalagaji waye ha mago aye. Ngabuba, ngubembe ngumutue mulumbu, ngumukhokhe mu mavu mbala imoshi. Ngushigo gumutua mbala jiyadi.”
9 Uvi Davidi wawambelele Abishayi egi: “Umutshitshigo gubola, handaga gula muthu wakalagala gubola gudi muthu Yehowa watombele ha gukhala fumu, muthu muene mbawuhanewa ndola.”
10 Davidi wamuwambelele luko egi: “Ngudi guguwambela giamatshidia mu jina dia Yehowa Nzambi wa monyo egi: Yehowa muene hakhenji mbawudi gumushiya. Nga ndo gudi nu lusugu mbawumufua gifua athu agasue, nga ndo mbawufua gu ita.
11 Luholo ngana nemesa Yehowa, matangi ajiyilego gungujila ha gutshita gubola gudi muthu Yehowa watombele ha gukhala fumu. Zula mulumbu udi hehi nu muto wenji nu bungu dia meya, tuye nadio.”
12 Davidi wazudile mulumbu nu bungu dia meya diakhalele hehi nu muto wa Saula, ayile gawo. Gushigo nga nu muthu mumoshi waamonele, nga wajiyile, nga ndo waphaphumugile. Mukut’awo agasue akhalele gu tulo handaga Yehowa waabandesele tulo tuakola.
13 Gungima Davidi wayile ha sambua diko dia baba, wamaganele holu dia mulundu, gualeha nu fundo diakhalele Saula.
14 Davidi watamegele mu dijui diakola gu khanda ya masuta nu Abnere mun’a Nere egi: “Abnere, aye gunguvua ba?” Abnere wamuvutudile egi: “Nanyi udi mushila fumu matululu?”
15 Davidi wahudile Abnere egi: “Aye ushigo yala wa ngolo ba? Nanyi udi gifua aye gu Isalele? Mukunda natshi wabambelego fumi’aye? Handaga suta mumoshi wanginyi mu phundo ha gumushiya.
16 Wakalagala diago ndaga yabola. Ngudi guguwambela giamatshidia mu jina dia Yehowa Nzambi wa monyo egi udi naye gufua handaga wabambelego fumu waye, muthu Yehowa watombele. Tala muabonga fundo udi! Mulumbu wa fumi’aye nu bungu dia meya diakhadi hehi nu muto wenji idi gui?”
17 Saula wavuile dijui dia Davidi, wamuhudile egi: “Mun’ami Davidi, idi dijui diaye ngudi muvua ba?” Davidi wamuvutudile egi: “Ayi fumu, ame ngudi muzuela.”
18 Wazuelele luko egi: “Fumu, mukunda natshi udi mukamba muenya mudimo waye ha gumuluisa? Ndaga itshi ngatshitshi? Gubola gutshi ngakalagala?
19 Fumu ngabuba, tegelela muenya mudimo waye: Gula Yehowa udi gugutuma ha gunguluisa, muene atshigine* mulambu wami wa mbuto. Uvi gula athu adi gugutuma, athu ene atewe mukumbu gutuama dia Yehowa, handaga mangino ene angukaya mu mavu* Yehowa wahanele athu enji. Idi gifua adi muzuela egi: ‘Nda ukalegele nzambi jiko!’
20 Henyaha ungushiyigo gualeha nu fundo tuana kombelela Yehowa. Fumu wa Isalele udi mulandula gambuangala ga githuhu gifua udi muhata nguadi mu mulundu.”
21 Saula wamuvutudile egi: “Ngakalagala gubola. Mun’ami Davidi vutuga, mbangushigo gugutshita gubola nga hazonda. Mangino wazudi monyo wami nu ndando yavula. Ame ngagukalegela ndaga nu guheya guagasue, ngakalagala gubola guakoma.”
22 Davidi wazuelele egi: “Mulumbu wa fumu wene wuwu haha. Tumenu muvuala mumoshi wa yala, aze awuzule.
23 Yehowa mbawuhana lufuto gudi muthu wagasue wana kalagala ndaga jiabonga nu wana sala wa gujinginyina gudi muene, handaga mangino Yehowa waguhanyi ha mago ami uvi ame ngatshiginyilego gutshita gubola gudi muthu Yehowa watombele ha gukhala fumu.
24 Tegelela! Gifua luholo ngazula monyo waye nu ndando mangino, monyo wami nji ukhale nu ndando gu meso a Yehowa. Muene anguhuluise mu malamba ami agasue.”
25 Saula wavutudile Davidi egi: “Mun’ami Davidi, Nzambi agukuatese. Mbawukalagala ndaga jiakoma, mbawubinga mu ndaga jiagasue mbawutshita.” Gungima Davidi wayile genji, Saula wavutugile gumbo dienji.
Mbimbi goshi'a diyiji
^ Nga ndo yajiya gukhala egi: “mavu a luselenga.”
^ Mu Hebelu: “avue vumba.”
^ Mu Hebelu: “uhinganyi.”