Mukanda wa Thomo wa Samuele 27:1-12
-
Enya Filistiya ahana Davidi dimbo dia Sikelage (1-12)
27 Uvi Davidi wazuelele mu mutshima wenji egi: “Gudi nu lusugu Saula mbawungushiya. Idi mulomba egi ngulenge, nguye mu mavu a enya Filistiya; ngenyi Saula mbawubemba gungukamba mu mavu agasue a enya Isalele. Mbanguhuluisa monyo wami.”
2 Gungima Davidi nu athu 600 akhalele n’enji, ayile gu Gate gudi fumu Akishe mun’a Maoke.
3 Davidi nu athu enji akhalele gu Gate gudi fumu Akishe, muthu nu muthu wakhalele nu enya fami yenji. Davidi wakhalele nu akaji’enji mbadi: Ahinoama wa gu Yizelele nu Abigayile wa gu Karmele, munu wakhalele thomo mukaji’a Nabale.
4 Tangua awambelele Saula egi Davidi walengi, waya gu Gate, wabembele gumukamba.
5 Davidi wawambelele Akishe egi: “Gula watshigina, nguhane fundo mukatshi dia tumembo tuazonda ngukhale guene; handaga muenya mudimo waye gajiyilego gukhala nu aye mu dimbo dia ufumu.”
6 Lusugu luene, Akishe wamuhanele dimbo dia Sikelage. Gishina giene Sikelage yabuile dimbo dia mafumu a gu Yuda uu nu mangino.
7 Davidi watshitshile givo gimoshi nu mbeji nguana mu dimbo dia enya Filistiya.
8 Davidi nu athu enji akhalele muya muluisa enya Geshule, enya Gilizite nu enya Amaleke. Athu ene akhalele gu khanda ya mavu adi musendesa gu Telame uu nu gu Shule, uu nu mu mididilo ya mavu a Ejipitu.
9 Tangua Davidi wakhalele muluisa membo ene, wakhalele mushiya athu agasue, mala nu akhetu. Wakhalele muzula imeme, ngombe, phunda, shamo nu milele. Gungima wakhalele muvutuga gudi Akishe.
10 Akishe wakhalele gumuhula egi: “Dimbo ditshi muayi muluisa mangino?” Davidi wakhalele gumuvutudile egi: “Tuayi gu sud* ya Yuda” nga ndo “Gu sud ya gifutshi gia enya Yelamele” nga ndo “Gu sud ya gifutshi gia enya Kena.”
11 Davidi gakhalelego mubemba nga yala nga mukhetu nu monyo, hagula ayigo gu Gate. Wakhalele muzuela egi: “Ngenyi gushigo nga nu muthu mbawuya muzuela egi: ‘Tala ndaga yakalagala Davidi.’” (Wakalegele ngenyi matangua agasue akhalele muene mu dimbo dia enya Filistiya.)
12 Akishe wakhalele mutshigina ndaga jiakhalele muzuela Davidi. Wazuelele egi: “Davidi wadibolesa diago nu akuaku’enji enya Isalele, mbawulandula gukhala muenya mudimo wami.”
Mbimbi goshi'a diyiji
^ Nga “Negebe.”
