Mukanda wa Thomo wa Samuele 28:1-25
-
Saula waya gudi nganga-ngombo gu Ene-Dole (1-25)
28 Mu tangua diene, enya Filistiya abungishile masuta awo ha guya muluisa enya Isalele. Akishe wawambelele Davidi egi: “Udi mujiya muabonga egi aye nu athu aye muya gungutuala gu ita.”
2 Davidi wawambelele Akishe egi: “Fumu, udi mujiya muabonga ndaga mbangutshita.” Akishe wamuwambelele egi: “Gishina giene aye mbawukhala mubambi wami masugu agasue.”*
3 Samuele wafuile. Enya Isalelele agasue amudidile nu amufundjile mu dimbo dienji gu Rama. Saula wakayele nganga-ngombo jiagasue gu Isalele nu athu ana zuela ndaga mbajibua gutuama.
4 Masuta a enya Filistiya adibungishile, ahagele phundo yawo gu Shuneme. Uvi Saula wabungishile masuta agasue a Isalele, ahagele phundo yawo gu Gileboa.
5 Tangua Saula wamonele phundo ya enya Filistiya, wavuile woma, mutshima wasendesele gumubudiga mangololo.
6 Saula wakambele utuameji gudi Yehowa mbala jiavula, uvi Yehowa gamuhanelego mvutu nga gu nzoji, nga mu njila ya Ulime nga ya baprofete.
7 Gu suga Saula wawambelele enya mudimo enji egi: “Ngukambelenu nganga-ngombo mumoshi wa mukhetu hagula nguye nguphonge.” Enya mudimo enji amuvutudile egi: “Gudi nu mukhetu mumoshi wana phonga gu Ene-Dole.”
8 Saula wasombegesele milele hagula athu amujiyigo, wayile nu athu enji muyadi mu phipha gudi mukhetu muene. Wamuwambelele egi: “Ngabuba, phonga hagula unguwambele ndaga mbajibua gutuama. Ngutamegele muthu nguza guguwambela.”
9 Uvi mukhetu muene wamuwambelele egi: “Udi mujiya muabonga egi Saula wakayele nganga-ngombo jiagasue mu gifutshi nu athu agasue ana zuela ndaga mbajibua gutuama. Mukunda natshi udi gungutela muheto hagula ngushiyiwe?”
10 Saula wadilogele gudi mukhetu muene mu jina dia Yehowa. Wazuelele egi: “Ngudi guguwambela giamatshidia mu jina dia Yehowa Nzambi wa monyo egi gushigo nga nu ndaga imoshi yabola mbayigubuila mukunda nu mulonga owu!”
11 Mukhetu muene wamuhudile egi: “Udi mutshigina egi ngugutamegele nanyi?” Saula wamuvutuile egi: “Ngutamegele Samuele.”
12 Tangua mukhetu muene wamonele “Samuele,”* wakalugile mangololo, wawambelele Saula egi: “Mukunda natshi wanguhuigi? Aye udi Saula!”
13 Saula wamuwambelele egi: “Uvuigo woma; itshi wamona?” Mukhetu muene wamuvutuile egi: “Ngamona muthu mumoshi gifua nzambi muzoga mu mavu.”
14 Saula wahudile mukhetu muene mbala imoshi egi: “Muthu muene udi luholo lutshi?” Muene wamuvutudile egi: “Udi muthu wagukola, udi nu mulele wa holu ushigo nu mago.” Saula wakotelesele egi yakhalele “Samuele,” wafugamele, washiwugile phala mu mavu.
15 Gungima “Samuele” wahudile Saula egi: “Mukunda natshi udi gungusagesa? Mukunda natshi wangutamega?” Saula wamuvutudile egi: “Ngudi nu gikenene giavula. Enya Filistiya aza gunguluisa, Nzambi gashigo luko nu ame. Gashigo gunguhana mvutu nga mu njila ya baprofete nga gu nzoji; gishina giene ngagutamega hagula unguwambele ndaga ngudi naye gutshita.”
16 “Samuele” wazuelele egi: “Mukunda natshi wangutamega? Yehowa gashigo luko nu aye, gashigo luko musuanguluga nu aye.
17 Yehowa mbawukalagala ndaga jiaguwambelele muene mu njila yami egi: Yehowa mbawugutambula ufumu, mbawuwuhana gudi muthu muko; muthu muene Davidi.
18 Watumagelego mbimbi ya Yehowa, washiyilego enya Amaleke anyi amuhanele khabu jiakola. Gishina giene Yehowa udi gugukalegela ndaga eji mangino.
19 Aye nu enya Isalele agasue Yehowa mbawumihana nji ha mago a enya Filistiya. Hamene aye nu an’aye a mala mbamuza gungusanga. Yehowa mbawuhana nji masuta a enya Isalele ha mago a enya Filistiya.”
20 Tangua Saula wavuile mbimbi jia “Samuele,” wavuile woma wavula, wabuile mu mavu. Gakhalelego luko nu ngolo nga hazonda, handaga lusugu luene nu phipha yene yagasue gadilego nga gima.
21 Tangua mukhetu muene wajile gudi Saula, wamonele egi udi gudisagesa muavula, hene wamuwambelele egi: “Ame muenya mudimo waye ngatumagela mbimbi jiaye, ngambi monyo wami mu gingonza* ha gukalagala ndaga wangutogi.
22 Ngabuba, tegelela ndaga muenya mudimo waye udi mutshigina guguwambela. Ngudi guguhana ndambo ya dipha udie, tungolo tugukuate hagula wajiya guvutuga.”
23 Uvi Saula watunyile, wazuelele egi: “Ngushigo mudia.” Uvi enya mudimo enji nu mukhetu muene amububidile ha gudia. Gu suga wavuile ndaga amuwambelele, wazugile mu mavu, wakhalele ha gitanda.
24 Mukhetu muene wakhalele nu mutumba wa ngombe wa maji-maji monzo yenji. Wawushiyile muphushi, wazudile phupha, walonda pate; gungima walondele mapha ashigo nu levire.
25 Wazudile ima yene, wahana Saula nu enya mudimo enji, adia. Gungima azugile mu phipha, ayile.
Mbimbi goshi'a diyiji
^ Mu Hebelu: “mbawukhala mubambi wa muto wami masugu agasue.”
^ Nga “muthu wakhalele mumonega gifua Samuele.”
^ Nga “ngahagele monyo wami ha mago ami.”
