Mukanda wa Thomo wa Samuele 29:1-11
-
Enya Filistiya atuna gushila Davidi mutshima (1-11)
29 Enya Filistiya abungishile masuta awo agasue gu Afeka, uvi enya Isalele ahagele phundo yawo hehi nu gito gia muta udi hehi nu Yizelele.
2 Mafumu a enya Filistiya nu masuta awo akhalele muya gutuama mu thundu ya athu 100 nu mu thundu ya athu 1 000. Davidi nu athu enji nu Akishe akhalele gualandula gungima.
3 Uvi mafumu a enya Filistiya amuhudile egi: “Itshi enya Hebelu awa adi mutshita haha?” Akishe waavutudile egi: “Yowu Davidi, muenya mudimo wa fumu Saula wa gu Isalele. Sendese ngudi n’enji, givo gimoshi nu holu giabalega gale. Khenji ngamumonelego nu gubola nga gumoshi sendese lusugu lualengele muene gudi fumi’enji uu nu mangino.”
4 Uvi mafumu a enya Filistiya avuidile Akishe khabu. Amuwambelele egi: “Vutula muthu yowu. Mubembe avutuge mu dimbo wamuhanele. Gayigo nu esue gu ita, gula ndo wajiya gutubalumugila mu tangua dia gulua ita; handaga wajiya gubatela fumu wenji mito ya athu etu hagula asuanguluge n’enji.
5 Yowu ishigo Davidi athu akhalele mukinyila nu guyimbila egi:
‘Saula washiyile inunu ya athu,Uvi Davidi washiya makumi a inunu ya athu’?”
6 Hene Akishe watamegele Davidi, wamuwambelele egi: “Ngudi guguwambela giamatshidia mu jina dia Yehowa Nzambi wa monyo egi aye udi muthu wabonga. Ngatshigina egi uye nu masuta ami gu ita, handaga khenji ngagumonelego nu gubola gumoshi sendese lusugu wajile gudi ame uu nu mangino. Uvi mafumu ashigo gugushila mutshima.
7 Vutuga mu guhuima, utshitshigo nga ndaga imoshi yajiya guhana mafumu a enya Filistiya khabu.”
8 Uvi Davidi wahudile Akishe egi: “Ndaga itshi ngatshitshi? Gubola gutshi wamonyi gudi ame muenya mudimo waye sendese lusugu ngajile uu nu mangino? Mukunda natshi ngushigo naye guya nu aye gu ita ha guluisa mbalagaji jiaye?”
9 Akishe wamuvutudile egi: “Mukunda nu ame, wana khala muthu wabonga gifua muanjelo wa Nzambi. Uvi mafumu a enya Filistiya azuedi egi: ‘Gashigo muya nu esue gu ita.’
10 Hamene mu gimenegena, aye nu athu aye mudi naye guzuga ha guya tangua guma mbagutshia.”
11 Gungima Davidi nu athu enji azugile mu gimenegena, avutugile mu mavu a enya Filistiya. Uvi enya Filistiya ayile gu Yizelele.
