Mukanda wa Thomo wa Samuele 3:1-21
-
Samuele wabua profete (1-21)
3 Mu tangua diene, Samuele wakhalele mukalegela Yehowa mudimo mu utuameji wa Eli. Uvi mu masugu ene Yehowa gakhalelego muzuela luko nu athu muavula; athu akhalelego nji mumona vizio muavula.
2 Lusugu lumoshi Eli wakhalele wa gubanda gu sugu yenji. Meso enji akhalelego mumona luko muabonga.
3 Muenda wa Nzambi wakhalele khenji ujimiwa galego, Samuele wakhalele nji mubanda mu tempelo* ya Yehowa, fundo diakhalele mushete wa Nzambi.
4 Gungima Yehowa watamegele Samuele. Samuele watayele egi: “Ame yowu.”
5 Samuele wayile muphushi gudi Eli, wamuwambelele egi: “Wangutamega ba? Ame yowu.” Uvi Eli wamuvutudile egi: “Ndo, ngagutamegelego. Vutuga ubande.” Samuele wavutugile ha gubanda.
6 Yehowa wamutamegele luko egi: “Samuele!” Samuele wazugile, wayile gudi Eli, wamuwambelele egi: “Wangutamega? Ame yowu.” Uvi Eli wamuvutudile egi: “Ndo, ngagutamegelego mun’ami. Vutuga ubande.”
7 (Mu tangua diene, Samuele wakhalele khenji gajiya galego Yehowa, Yehowa nji wakhalele khenji gazuela n’enji ndo.)
8 Yehowa wamutamegele luko mbala ya thathu egi: “Samuele!” Samuele wazugile, wayile gudi Eli, wamuwambelele egi: “Wangutamega? Ame yowu.”
Eli wakotelesele egi Yehowa wakhalele mutamega Samuele.
9 Eli wamuwambelele egi: “Nda ubande. Gula wagutamega luko, muwambele egi: ‘Zuela Yehowa, muenya mudimo waye udi gugutegelela.’” Hene Samuele wavutugile ha gubanda luko.
10 Gungima Yehowa wajile, wamaganele ha fundo diene, wamutamegele luko egi: “Samuele, Samuele!” Samuele wamuvutudile egi: “Zuela, muenya mudimo waye udi gugutegelela.”
11 Yehowa wawambelele Samuele egi: “Tala! Ngudi mutshita ndaga imoshi gu Isalele, muthu wagasue mbawuyivua, mbayikhala gifua muandu gu matshui enji.
12 Mu lusugu luene, mbangutaganesa ndaga jiagasue ngazuelele mukunda nu Eli nu fami yenji.
13 Muwambele egi ngudi muhana fami yenji ndola ya mayilago mukunda nu gubola gua an’enji handaga adi mutshita ndaga jiabola, ashigo munemesa Nzambi, uvi muene gashigo guabalela.*
14 Gishina giene ngawambelele Eli nu enya fami yenji egi gushigo nga mulambu umoshi wajiya gutotesa gubola guawo.”
15 Samuele wabandele uu nu mu gimenegena; gungima wakangudile mifulo ya inzo ya Yehowa. Uvi wakhalele muvua woma ha guwambela Eli ndaga jiamonele muene mu vizio.
16 Eli watamegele Samuele egi: “Samuele mun’ami!” Muene wavutudile egi: “Ame yowu.”
17 Wamuhudile egi: “Ndaga itshi yaguwambela Nzambi? Ngabuba ungusuegelago. Nzambi aguhane ndola yakola gula wangusuegela nga mbimbi imoshi mu ndaga jiagasue jiaguwambela muene.”
18 Samuele wamuwambelele ndaga jiagasue, gamusuegelego nga gima. Gungima Eli wazuelele egi: “Idi Yehowa. Akalagale ndaga jiagasue jiatshigina muene.”
19 Samuele wakhalele mukula; Yehowa wakhalele n’enji, wakhalele nji mutagenesa ndaga jiagasue jiakhalele muzuela Samuele.*
20 Enya Isalele agasue sendese gu Dane uu nu gu Belesheba ajiyile egi Samuele wakhalele profete wa Yehowa.
21 Yehowa walanduile gudimonesa mu vizio gu Shilo; handaga guene Yehowa wakhalele gudijiyisa gudi Samuele. Yehowa wakhalele nji gumuwambela ndaga guene.
Mbimbi goshi'a diyiji
^ Yakotelesa egi: “inzo ya tenta.”
^ Nga “guandingila.”
^ Mu Hebelu: “gushigo nga mbimbi yenji imoshi yakhalele mubua mu mavu.”
