Mukanda wa Thomo wa Samuele 30:1-31
30 Davidi nu athu enji ahetele gu dimbo dia Sikelage mu lusugu lua thathu. Enya Amaleke ayile muluisa athu akhalele gu khanda ya sud* nu dimbo dia Sikelage. Amuangele dimbo diene nu adimbile tshuya.
2 Akuatele akhetu nu athu agasue akhalele mu dimbo diene, ana azonda nu mambuta. Ashiyilego nga muthu mumoshi. Aazudile, aya nawo.
3 Tangua Davidi nu athu enji ahetele mu dimbo, asangele dimbo diakondewa gale. Akaji’awo nu an’awo a mala nu a akhetu ayi gale mu uhiga.
4 Davidi nu athu enji asendesele gudila mangololo uu nu tangua ahuidile mukunda nu gudila.
5 Enya Amaleke akuatele nji akaji’a Davidi mbadi: Ahinoama wa gu Yizelele nu Abigayile munu wakhalele thomo mukaji’a Nabale, muenya gu Karmele.
6 Davidi wakhalele nu gikenene giavula handaga athu enji akhalele mutshigina gumusonona maseso ha gumushiya. Mukut’awo agasue avuile khabu luholo an’awo a mala nu a akhetu ayile mu uhiga. Uvi Davidi wahetele ngolo gudi Yehowa Nzambi wenji.
7 Davidi wawambelele nganga-nzambi Abiatare mun’a Ahimeleke egi: “Ngabuba, ngubatele efode.” Abiatare wazudile efode, wabatela Davidi.
8 Davidi wahudile Yehowa egi: “Nguhata athu awa amuangi dimbo ba? Mbangudi guakuata ba? Muene wamuvutudile egi: “Ahate, mbawudi guakuata. Mbawuhuluisa athu nu ima yagasue akuyi.”
9 Mbala imoshi, Davidi wazudile athu 600 akhalele n’enji, ayile uu nu gu baba* dia Besole. Tangua ahetele guene, athu ako asalele guene.
10 Davidi nu athu 400 ayile nu gulandula athu ene; uvi athu ako 200 azawugilego baba dia Besole, handaga akhalele aguhuila muavula. Hene asalele guene.
11 Athu a Davidi amonele muenya gu Ejipitu mumoshi mu temu; ayile n’enji gudi Davidi. Amuhuile ima ya gudia nu meya a gunua,
12 amuhanele nji gato galondewe nu mabundu a figi, nu bagato mbadi alondewe nu mabundu a vinyo. Gungima dia gudia, wavuile ngolo; handaga wakhalele khenji gadia ndo nga gima, khenji ganuago meya masugu thathu.*
13 Davidi wamuhudile egi: “Udi muenya mudimo wa nanyi? Udi muenya gui?” Muene wamuvutudile egi: “Ngudi muenya gu Ejipitu; ngudi muenya mudimo wa muenya Amaleke mumoshi, uvi fumi’ami wangubembi handaga ngudi mukata, masugu thathu abalega gale.
14 Tuayi muluisa athu gu khanda ya sud* ya Kerete nu mu mavu a Yuda nu gu khanda ya sud* ya mavu a Kalebe. Tuakondi nji dimbo dia Sikelage tshuya.”
15 Davidi wamuhudile egi: “Wajiya guya gungutuala ha fundo didi athu akuyi ima ba?” Muvuala muene wamuvutudile egi: “Gutuama egi nguye ngugutuale ha fundo didi athu ene, diloge thomo mu jina dia Nzambi egi ushigo gungushiya nu ushigo muya gunguhana ha mago a fumi’ami.”
16 Muthu muene wayile nu Davidi fundo athu ene akhalele; athu ene akhalele agumuangana gu khanda yene yagasue. Akhalele mutshita wano, mudia, munua handaga atambudile ima yavula mu gifutshi gia enya Filistiya nu mu mavu a Yuda.
17 Davidi wasendesele gualuisa sendese mu gimenegena gia mutshiatshia uu nu mu ngueze; waashiyile agasue, phamba athu 400 alengele holu dia shamo.
18 Davidi watambudile ima yagasue inyi enya Amaleke akuyile, wahuluishile akaji’enji mbadi.
19 Gushigo nga muthu, nga gima giawo gimoshi giatotele, ikhale giazonda nga giakoma. Azudile an’awo a mala nu a akhetu nu ima ya enya Amaleke; Davidi watambudile ima yawo yagasue yakuyiwe.
20 Davidi watambudile imeme nu ngombe jiagasue jia enya Amaleke. Athu enji ahagele shitu jiene gutuama dia shitu jiawo. Azuelele egi: “Eyi ima ya Davidi yatambula muene gu ita.”
21 Davidi wahetele gu baba dia Besole fundo athu 200 asalele, anyi ahuidile ha guya n’enji hamoshi. Athu ene ajile mutagana Davidi nu athu akhalele n’enji. Tangua Davidi wahetele fundo akhalele, waahudile gula adi gikuatshi.
22 Uvi mukatshi dia athu ayile nu Davidi, ako akhalele enya mutshima wabola nu athu a githuhu. Azuelele egi: “Luholo athu awa ayile ndo nu esue, tushigo guahana nga gima gimoshi tuatambula gu ita. Azule phamba akaji’awo nu an’awo, aye.”
23 Uvi Davidi waawambelele egi: “An’etu, mutshitshigo ngenyi nu ima yatuhanyi Yehowa. Watubambi, watukuatesa ha gubinga nzangi jiaji gutuluisa.
24 Nanyi wajiya gutshigina ndaga mudi muzuela? Muthu wagasue wayi mulua ita, mbawuzula ima luholo lumoshi nu muthu munu wasadi mutalela ima. Athu agasue mbaazula ima luholo lumoshi.”
25 Sendese lusugu lununu, desizio diazudile Davidi diabuile mukhuala gu Isalele uu nu mangino.
26 Tangua Davidi wavutugile gu Sikelage, wazudile ima yatambuile muene gu ita, watumine ndambo gudi akulu a gu Yuda anyi akhalele mafut’enji. Waawambelele egi: “Eyi kado* ngamitumina. Idi ima tuatambula mbalagaji jia Yehowa gu ita.”
27 Wayitumile gudi enya gu Betele, nu enya gu Ramote ya gu Negebe,* nu enya gu Yatile,
28 nu gudi enya gu Aloele, enya gu Sifemota nu enya gu Eshetemoa,
29 nu enya gu Lakala, nu enya gu membo a Yelamele nu enya gu membo a enya Kena,
30 nu enya gu Holema, nu enya gu Bole-Ashana, nu enya gu Ataka,
31 nu gudi enya gu Hebrone, nu gudi athu akhalele mu mafundo agasue Davidi nu athu enji ayile.
Mbimbi goshi'a diyiji
^ Nga “gu Negebe.”
^ Tala Ukoteleshi wa Mbimbi (Baba).
^ Mu Hebelu: “masugu thathu nu phipha thathu.”
^ Nga “Negebe.”
^ Nga “Negebe.”
^ Mu Hebelu: “ishimbigo.”
^ Nga “gu sud.”
