Mukanda wa Thomo wa Samuele 31:1-13
-
Gufua gua Saula nu an’enji thathu a mala (1-13)
31 Enya Filistiya akhalele mulua nu enya Isalele. Masuta a enya Isalele alengele gutuama dia enya Filistiya, avula mukatshi diawo ashiyiwe gu mulundu wa Gileboa.
2 Enya Filistiya alanduile Saula nu an’enji a mala; ashiyile an’enji Yonatana, Abinadaba nu Malekishua.
3 Ita yakolele gu khanda ya Saula, athu ana sonona mifula amumonele, amunamenesele mangololo.
4 Saula wawambelele muthu wakhalele gumubatela iluilo egi: “Zula phogo yaye ya khusa ungutue nayo, hagula athu awa ambiwego gu mukanda angumonesago lamba nu angushiyigo.”* Uvi muthu muene watunyile, handaga wakhalele muvua woma wavula. Hene, Saula wazanguile phogo yenji ya khusa, wabuile holu diayo.
5 Tangua muthu wakhalele mubatela Saula iluilo wamonele egi fumi’enji wafua, muene nji wabuile holu dia phogo yenji ya khusa, wafuile hamoshi n’enji.
6 Hene Saula nu an’enji a mala thathu nu muthu wakhalele gumubatela iluilo nu masuta enji agasue, afuile mu lusugu luene.
7 Tangua enya Isalele anyi akhalele mu baba nu anyi akhalele mu membo a gu khanda ya Yordane amonele egi masuta a Isalele alenga, Saula nu an’enji afua, ene nji abembele membo awo, alengele. Gungima enya Filistiya ajile, akhalele mu membo ene.
8 Mu lusugu lualanduile, enya Filistiya ajile ha guzula ima ya athu afuile, asangele Saula nu an’enji thathu agufua gu mulundu wa Gileboa.
9 Abatuile muto wa Saula, azanguile iluilo yenji. Atumine mbimbi mu gifutshi gia enya Filistiya ha guta lumene mu tempelo* jia isongo yawo nu gudi athu agasue.
10 Ahagele iluilo yenji mu tempelo ya Ashitolete, akudigile kimbi gienji gu gibayi gia Bete-Shana.
11 Tangua enya gu Yabeshe ya gu Gileade avuile ndaga enya Filistiya akalegele Saula,
12 masuta agasue a mu dimbo diene azugile, ayile phipha-phipha, akatuile kimbi gia Saula nu imbi ya an’enji gu gibayi gia Bete-Shana; avutugile nayo gu Yabeshe, ayimbile tshuya.
13 Gungima azudile ifuwa yawo, ayifundjile ha mushin’a mutshi wa tamalise gu Yabeshe. Atunyile nji gudia masugu sambadi.
