Mukanda wa Thomo wa Samuele 4:1-22
4 Enya Isalele agasue akhalele muvua ndaga jiakhalele muzuela Samuele.
Lusugu lumoshi, ayile mulua ita nu enya Filistiya; atungile phundo yawo hehi nu Ebenezele, uvi enya Filistiya atungile phundo yawo hehi nu Afeka.
2 Enya Filistiya adilondele ha guya mulua ita nu enya Isalele, uvi abalegele enya Isalele ngolo, a abingile, ashiyile enya Isalele 4 000 ha fundo akhalele mulua ita.
3 Tangua masuta avutugile gu phundo, akulu a enya Isalele azuelele egi: “Mukunda natshi Yehowa wabemba egi mangino enya Filistiya atubinge?* Tuyenu gu Shilo tuzule mushete wa gikotelo wa Yehowa, hagula tuze nawo utukuatese ha gubinga mbalagaji jietu.”
4 Hene atumine athu gu Shilo, azanguile mushete wa gikotelo wa Yehowa Nzambi wa Ngolo Jiagasue udi wa gukhala ha nguasa yenji ya ufumu holu* dia basheribe. Tangua akhalele mubata mushete wa gikotelo wa Nzambi wa giamatshidia, ana a Eli mbadi Hofeni nu Fineyase akhalele nji nawo.
5 Tangua ahetele nu mushete wa gikotelo wa Yehowa mu phundo, enya Isalele agasue asendesele gumba milolo mangololo, hene mavu adigitshile.
6 Tangua enya Filistiya avuile milolo yene, adihudile egi: “Mukunda natshi milolo idi muzoga ngenyi mu phundo ya enya Hebelu?” Gungima a awambelele egi enya Isalele aza nu Mushete wa Yehowa mu phundo yawo.
7 Hene enya Filistiya avuile woma, azuelele egi: “Nzambi waza mu phundo ya enya Hebelu!” Gungima azuelele luko egi: “Tuafua getu handaga ndaga ya luholo elu khenji yakalegewe galego!
8 Tuafua getu! Nanyi mbawutuhuluisa ha mago a Nzambi yowu wakoma? Nzambi yowu muene wahanele enya Ejipitu malamba a maluholo agasue mu mavu a luselenga.
9 Enue enya Filistiya muvuigo woma, khalenu gifua mala hagula mubuigo enya mudimo a enya Hebelu gifua luholo ene abuile enya mudimo enu. Luenu diago gifua mala!”
10 Gungima enya Filistiya aluile nu enya Isalele, a abingile. Enya Isalele alengele, muthu nu muthu wavutugile gumbo dienji. Ashiyile athu avula, masuta 30 000 a enya Isalele afuile.
11 Enya Filistiya atambudile nji mushete wa Nzambi, ayile nawo; ana mbadi a Eli Hofeni nu Fineyase afuile nji.
12 Muthu mumoshi wa mu giphuta gia Benjame wakatugile muphushi ha fundo diakhalele ene mulua ita, wahetele gu Shilo mu lusugu luene. Wakhalele nu milele yagutawuga nu fuphi mu muto.
13 Tangua diahetele muene gu Shilo, Eli wakhalele wa gukhala hashi gu khulo ya njila, wakhalele mutala handaga wakhalele nu gikenene giavula mukunda nu Mushete wa Nzambi wa giamatshidia. Muthu muene wanginyile mu dimbo ha gutela athu lumene. Tangua athu agasue avuile ndaga yene, asendesele gukaluguga.
14 Tangua Eli wavuile matululu, wahudile egi: “Mukunda natshi athu adi mukaluguga ngenyi?” Muthu muene wajile muphushi ha gumutela lumene.
15 (Mu tangua diene Eli wakhalele nu ivo 98, meso enji akhalelego luko mumona muabonga.)
16 Gungima muthu muene wawambelele Eli egi: “Ngakatuga fundo didi muluiwa ita! Ngalengi guene mangino ha guza haha.” Eli wamuhudile egi: “Ndaga itshi yabua mun’ami?”
17 Muthu muene wamuwambelele egi: “Enya Filistiya abingi enya Isalele, ashiyi athu avula hene enya Isalele alengi. An’aye muyadi Hofeni nu Fineyase ashiyiwa, enya Filistiya atambula nji Mushete wa Nzambi wa giamatshidia.”
18 Tangua muthu muene watangele jina dia Mushete wa Nzambi wa giamatshidia, Eli wakatugile ha nguasa yakhalele muene hehi nu mufulo wa dimbo, wabuile khata.* Shingo yamubogogele, wafuile handaga wakhalele muthu wa gukola nu wakhalele muthu wakoma. Wasophesele enya Isalele ivo 40.
19 Giwaji gienji, mukaji’a Fineyase wakhalele gu vumo, wakhalele nji hehi ha guvuala. Tangua diavuile muene egi enya Filistiya atambula Mushete wa Nzambi wa giamatshidia, giwaji gienji nu mulumi’enji afui, wasondomene, misongo ya guvuala yamukuatele, mbala imoshi wavualele.
20 Gutuama egi afue, akhetu akhalele n’enji hehi amuwambelele egi: “Uvuigo woma handaga wavuala mona wa yala.” Uvi muene wahenele tedie, gazuelelego nga gima.*
21 Wahanele mona muene jina egi Ikaboda,* handaga wazuelele egi: “Lutumbu lua Isalele luatambudiwa,” wazuelele ngenyi handaga wakhalele mutangiza luholo enya Filistiya atambudile Mushete wa Nzambi wa giamatshidia nu ndaga yabuidile giwaji gienji nu mulumi’enji.
22 Wazuelele egi: “Lutumbu lua Isalele luatambudiwa handaga enya Filistiya atambula Mushete wa Nzambi wa giamatshidia.”
Mbimbi goshi'a diyiji
^ Mu Hebelu: “Mukunda natshi Yehowa watubinga gutuama dia enya Filistiya?”
^ Nga ndo yajiya gukhala egi: “hakatshi.”
^ Nga “wabuile giangima.”
^ Nga “gahagelego mutshima mu ndaga yene.”
^ Yakotelesa egi: “Lutumbu luaya gui?”