Mukanda wa Thomo wa Samuele 5:1-12
5 Tangua enya Filistiya atambudile Mushete wa Nzambi wa giamatshidia, awukatudile gu Ebenezele, ayile nawo gu Asedode.
2 Enya Filistiya azanguile Mushete wa Nzambi wa giamatshidia ayile nawo mu tempelo* ya Dagona, awuhagele hehi nu gisongo gia Dagona.
3 Mu lusugu lualanduile, enya Asedode azugile nu gimenegena giagasue, asangele gisongo gia Dagona gia gubua phala mu mavu gutuama dia Mushete wa Yehowa. Azanguile gisongo giene, agihagele luko ha fundo giakhalele.
4 Mu lusugu luko lualanduile, azugile mu gimenegena giagasue, asangele luko gisongo gia Dagona gia gubua hashi phala mu mavu gutuama dia Mushete wa Yehowa. Muto nu mago a gisongo giene akhalele agubooga, agubua hashi mu njila idi mubata gu mufulo wa tempelo. Phamba gitshinyi ginyi giakhalele gifua ishui* giene giasalele gia gumagana.
5 Gishina giene uu nu mangino nganga-nzambi jia Dagona nu athu agasue ana ngina mu tempelo yenji gu Asedode, anago gubalegela mu njila yene.
6 Yehowa wahanele ndola gudi enya Asedode nu athu ako a mu membo a hehi. Waasagesele, waahanele misongo ya emoroyide.*
7 Tangua enya Asedode amonele ndaga yene, azuelele egi: “Mushete wa Nzambi wa enya Isalele ushigo naye gukhala luko haha, handaga muene watuhana ndola yakola esue nu nzambi wetu Dagona.”
8 Hene atamegele mafumu agasue a enya Filistiya, a ahudile egi: “Itshi tudi naye gutshita nu Mushete wa Nzambi wa enya Isalele?” Ene avutudile egi: “Tudi naye guwutuma gu Gate.” Hene atumine Mushete wa Nzambi wa enya Isalele guene.
9 Tangua Mushete wene wahetele gu Gate, Yehowa wahanele athu agasue a mu dimbo ndola. Yaahanele woma wavula. Wahanele athu agasue misongo ya emoroyide* sendese gudi ana azonda uu nu gudi athu a gukula.
10 Hene atumine Mushete wa Nzambi wa giamatshidia gu Ekrone. Uvi tangua Mushete wene wahetele gu Ekrone, athu agasue akalugugile egi: “Atubatela Mushete wa Nzambi wa enya Isalele hagula esue nu athu etu tufue!”
11 Gungima atamegele mafumu agasue a enya Filistiya, a awambelele egi: “Vutulenu Mushete wa Nzambi wa enya Isalele; uvutulenu guma wakatugile hagula esue nu akuaku’etu tufuigo.” Handaga athu agasue a mu dimbo akhalele muvua woma wa gufua; Nzambi wa giamatshidia waahanele ndola yakola.
12 Athu anyi akhalelego mufua, akhalele mukata misongo ya emoroyide.* Matululu a athu a mu dimbo akhalele mukaluguga ha gutoga ukuateshi, akhalele mukanduga uu nu mu dilu.
Mbimbi goshi'a diyiji
^ Nga “inzo.”
^ Mu Hebelu: “phamba Dagona.”
^ Nga “mutumba.”
^ Nga “mutumba.”
^ Nga “mutumba.”
