Mukanda wa Thomo wa Samuele 6:1-21
-
Enya Filistiya avutula Mushete gu Isalele (1-21)
6 Mushete wa Yehowa watshitshile mbeji sambadi mu membo a enya Filistiya.
2 Enya Filistiya atamegele nganga-nzambi nu athu ana zuela ndaga mbajibua mu masugu adi muza, a ahudile egi: “Itshi tudi naye gukalagala nu Mushete wa Yehowa? Tuwambelenu luholo tudi naye guwuvutula guma wakatugile.”
3 A avutudile egi: “Gula mudi mutshigina guvutula mushete wa gikotelo wa Yehowa Nzambi wa Isalele, muwuvutulago mago a githuhu. Uvi mudi naye gumuvutudila nawo hamoshi nu milambu hagula amitotesele. Yene ndaga mudi naye gutshita hagula musagewe nu mujiye mukunda natshi adi gumihana ndola ya luholo elu.”
4 Enya Filistiya ahudile egi: “Mulambu utshi tudi naye gumutumina hagula atutotesele gubola?” Ene avutudile egi: “Ha gutadila mutango wa mafumu a enya Filistiya, mudi naye gutuma isongo thano ya emoroyide* yalondewe nu wolo nu isongo thano ya phugu yalondewe nji nu wolo; handaga mukut’enu agasue nu mafumu enu muahetshi ndola ya luholo lumoshi.
5 Mudi naye gulonda isongo idi gifua emoroyide nu isongo iko idi gifua phugu idi mubolesa mavu enu, ha gutumbuisa Nzambi wa Isalele. Ngenyi wajiya gubemba gumihana ndola nu nzambi jienu nu mavu enu.
6 Mukunda natshi mudi mukolesa mitshima yenu gifua luholo enya gu Ejipitu nu Farao akolesele mitshima yawo? Nzambi waahanele ndola yakola hene abembele enya Isalele ha guya.
7 Henyaha londenu phusu-phusu ihe-ihe, zangulenu nji ngombe mbadi jidi muwamuesa jinyi khenji jiabatele galego muhitu.* Jijitshigenu gu phusu-phusu uvi muvutule ana a ngombe jiene mu luphango.
8 Zangulenu Mushete wa Yehowa, uhagenu holu dia phusu-phusu; uvi isongo ya wolo mudi mutuma gifua mulambu mukunda nu gubola guenu, imbenu mu mushete uko muyihage hehi nu Mushete wa Nzambi. Gungima itumenu, iye.
9 Talenu: Gula yaya mu mavu a Isalele mu njila ya gu Bete-Shemeshe, mbayimonesa egi muene watuhanyi ndola eyi yakola yatubuila. Uvi gula yayilego mu njila yene, ngenyi mbatujiya egi ishigo muene watuhanyi malamba awa uvi alabi gutubuila.”
10 Enya Filistiya akalegele gifua luholo a awambelele. Azanguile ngombe mbadi jiakhalele muwamuesa, ajijitshigile gu phusu-phusu, uvi akangele ana a ngombe jiene mu luphango.
11 Gungima ahagele Mushete wa Yehowa holu dia phusu-phusu, ahagele nji mushete wakhalele nu isongo ya phugu yalondewe nu wolo nu isongo ya emoroyide yalondewe nji nu wolo.
12 Ngombe jiene jiayile phamba mu njila yakhalele muya gu Bete-Shemeshe. Jiayilego* nga gu koko dia madia nga gu koko dia mahidi, jiakhalele muya phamba mu njila imoshi. Jiakhalele muya nu gudila. Mu tangua diene, mafumu a enya Filistiya akhalele muza nu gu jilandula gungima uu nu mu mididilo ya Bete-Shemeshe.
13 Athu a gu Bete-Shemeshe akhalele mukatula mbuto jia ble mu baba.* Tangua atuphuile meso, amona Mushete, asuangulugile muavula diago.
14 Phusu-phusu yene yanginyile mu dihia dia Yoshua muenya gu Bete-Shemeshe, yamaganele muene hehi nu seso diakoma. Athu ene aboguele mabaya a phusu-phusu, a ambile tshuya, gungima azanguile ngombe ajihanele mulambu wa guwetshia gudi Yehowa.
15 Enya Levi akatudile Mushete wa Yehowa holu dia phusu-phusu nu mushete wakhalele nu ima yalondewe nu wolo, ayihagele holu dia seso yakoma. Mala a gu Bete-Shemeshe ahanele milambu ya guwotshia nu milambu iko gudi Yehowa.
16 Tangua mafumu thano a enya Filistiya amonele ndaga yene, avutugile gu Ekrone mu lusugu luene.
17 Mukunda nu emoroyide jialondewe nu wolo jinyi enya Filistiya atumidile Yehowa hagula a atotesele gubola: Imoshi yakhalele mukunda nu dimbo dia Asedode, iko mukunda nu dimbo dia Gaza, iko mukunda nu dimbo dia Asekelone, iko mukunda nu dimbo dia Gate, iko mukunda nu dimbo dia Ekrone.
18 Mutango wa isongo ya phugu yalondewe nu wolo wakhalele luholo lumoshi nu membo agasue a enya Filistiya akhalele nu ibayi nu anyi akhalelego nu ibayi. Membo ene akhalele mutuamezewa gudi mafumu thano.
Seso diakoma diahagele enya Bete-Shemeshe Mushete wa Yehowa uu nu mangino didi mu dihia dia Yoshua muenya gu Bete-Shemeshe, diana kuatesa athu ha guwunguluga.
19 Nzambi washiyile mala a gu Bete-Shemeshe handaga atalele Mushete wa Yehowa. Washiyile athu 50 070;* athu adidile mangololo handaga Yehowa washiyile athu avula gubalega.
20 Hene enya gu Bete-Shemeshe adihudile egi: “Nanyi wajiya gumagana gutuama dia Yehowa Nzambi yowu wa gijila? Gula muene wakatuga gumbo dietu, mbawuya gudi akuatshi?”
21 Hene atumine athu ha guya muwambela enya Kiriyate-Yalima egi: “Enya Filistiya avutula Mushete wa Yehowa. Bulumugenu muwuzangule, muye nawo.”
Mbimbi goshi'a diyiji
^ Nga “mitumba.”
^ Nga “muphando.”
^ Nga “Jiahambulugilego.”
^ Nga “fundo dishigo nu milundu.”
^ Mu Hebelu: “mala 70, mala 50 000.”
