Mukanda wa Thomo wa Samuele 7:1-17
7 Gungima mala a gu Kiriyate-Yalima ajile, azanguile Mushete wa Yehowa ayile nawo gu inzo ya Abinadaba holu dia mulundu. Atombele* mun’enji Eleazale ha gubamba Mushete wa Yehowa.
2 Sendese lusugu Mushete wahetele gu Kiriyate-Yalima, ivo 20 yabalegele. Gungima enya Isalele agasue asendesele gukamba* Yehowa.
3 Samuele wawambelele enya Isalele agasue egi: “Gula muatshigina guvutugila Yehowa nu mutshima wenu wagasue, katulenu nzambi jia ngenji nu isongo ya Ashitolete mukatshi dienu. Kombelelenu phamba Yehowa, dihanenu gudi muene nu mutshima wenu wagasue, ngenyi muene mbawumihuluisa ha mago a enya Filistiya.”
4 Hene enya Isalele akatudile isongo ya Bale nu isongo ya Ashitolete, uvi akombelele phamba Yehowa.
5 Gungima Samuele wazuelele egi: “Bungisenu enya Isalele agasue gu Mispa hagula ngukombelele Yehowa mukunda nu enue.”
6 Adibungishile gu Mispa. Athayele meya, a abundudile gutuama dia Yehowa; mu lusugu luene, atunyile nji gudia mukunda nu gukombelela. Azuelele egi: “Tuakalegela Yehowa gubola.” Gungima Samuele wasendesele gusophesa milonga ya enya Isalele gu Mispa.
7 Tangua enya Filistiya avuile egi enya Isalele adibungishile gu Mispa, mafumu a enya Filistiya akandugile ha guya muluisa enya Isalele. Tangua enya Isalele avuile ndaga yene, avuile woma mukunda nu enya Filistiya.
8 Hene awambelele Samuele egi: “Landula gukombelela Yehowa Nzambi wetu hagula atukuatese nu atuhuluise ha mago a enya Filistiya.”
9 Samuele wazanguile mutumba wa gimeme, wawuhanele mulambu wa guwetshia gudi Yehowa; gungima wakombelele Yehowa ha gukuatesa enya Isalele, Yehowa wavuile gutoga guenji.
10 Tangua Samuele wakhalele muhana mulambu wa guwetshia, enya Filistiya ajile ha guluisa enya Isalele. Yehowa wanumishile enya Filistiya miandu yakola; abuile tunga-tunga, hene enya Isalele a abingile.
11 Mala a enya Isalele azogele mu dimbo dia Mispa, alanduile enya Filistiya. A ashiyile uu nu gu khanda ya sud ya Bete-Kale.
12 Gungima Samuele wazanguile seso, wayihagele hakatshi dia Mispa nu Yeshana. Watamegele seso yene egi Ebenezele,* handaga wazuelele egi: “Uu nu luenyelu, Yehowa yowu genji gutuhuluisa.”
13 Hene enya Isalele abingile enya Filistiya. Enya Filistiya akhalelego luko muza muluisa membo a enya Isalele. Masugu agasue akhalele Samuele nu monyo, Yehowa gakhalelego mubemba egi enya Filistiya aluise enya Isalele.
14 Membo agasue enya Filistiya atambudile gudi enya Isalele, a avutudile nawo sendese gu Ekrone uu nu gu dimbo dia Gate. Enya Isalele azanguile luko membo awo anyi akhalele ha mago a enya Filistiya.
Enya Isalele akhalele nji mu guhuima nu enya Amole.
15 Samuele wasophesele Isalele monyo wenji wagasue.
16 Givo nu givo, Samuele wakhalele muwenda mu membo agasue a enya Isalele. Wakhalele muya gu Betele, gu Gilegale nu gu Mispa; wakhalele nji musophesa enya Isalele mu mafundo awa agasue.
17 Gungima wakhalele muvutuga gu dimbo dia Rama handaga guene guakhalele inzo yenji. Wakhalele nji musophesa enya Isalele guene; watungile giwotshielo guene mukunda nu Yehowa.
Mbimbi goshi'a diyiji
^ Mu Hebelu: “Amubuishile wa gijila.”
^ Nga “gudila gutuama dia.”
^ Yakotelesa egi: “Seso dia guhuluisa.”
