Mukanda wa Thomo wa Samuele 8:1-22
8 Tangua Samuele wabuile muthu wa gukola, watombele an’enji ha gubua manzuji gu Isalele.
2 Mun’enji wa somi jina dienji Yowele, wa mbadi jina dienji Abiya; akhalele manzuji gu Belesheba.
3 Uvi an’enji alanduilego gifezegeselo gienji; akhalele mukamba guheta makuta mu luholo luabola, athu akhalele guahana mbongo nga ima iko hagula asophesago milonga nu giamatshidia giagasue.
4 Lusugu lumoshi, akulu agasue a enya Isalele adibungishile, ayile mumona Samuele gu Rama.
5 Amuwambelele egi: “Tala, wabua muthu wagukola, uvi an’aye ashigo mulandula gifezegeselo giaye. Henyaha tutombele fumu hagula atutuameze* gifua luholo idi mu ifutshi yagasue.”
6 Uvi Samuele gasuangulugilego* luholo enya Isalele amuwambelele egi: “Tutombele fumu hagula atutuameze.” Hene wakombelele Yehowa.
7 Yehowa wamuwambelele egi: “Kalagala ndaga jiagasue jidi ene guguwambela, handaga ishigo aye atunyi uvi ame adi mutuna hagula ngukhadigo fumu wawo.
8 Adi mutshita ndaga gifua luholo muana tshita ene sendese lusugu azogele gu Ejipitu; ana gungubemba mbala jiavula ha gukombelela nzambi jiko, adi mukalagala nji luholo lumoshi gudi aye.
9 Kalagala ndaga adi guguwambela. Uvi awambele haphelo malamba mbaabuila; awambele nji ndaga fumu muene mbawatoga ha gukalagala.”
10 Gungima Samuele wawambelele athu akhalele gumutoga ha guakambela fumu ndaga jiagasue jiamuwambelele Yehowa.
11 Wazuelele egi: “Talenu ndaga mbajimikalegela fumu mbawumihinyina: Mbawuzula an’enu a mala ha guabuisa awendeshi a phusu-phusu jienji, ako mbaakhala muwendesa tubalu tuenji, uvi ako mbaakhala muya phushi gutuama dia phusu-phusu jienji.
12 Mbawuzangula an’enu ako ha guabuisa mafumu a masuta 1 000 nga a masuta 50. An’enu ako mbaamudimina mahia, ako mbaamukatudila mbuto, ako mbaamufudila mata a ita, uvi ako mbaamulondela ima ya phusu-phusu jienji.
13 Mbawuzangula an’enu a akhetu ha gukhala mulonda mananashi, ima ya gudia, nu ha gulonda mapha.
14 Mbawuzangula mahia enu abalega gubonga nu mahia enu a vinyo nu a olive abalega gubonga, mbawahana gudi enya mudimo wenji.
15 Mbawuzangula gitshinyi gia kumi gia mbuto jienu nu gia mabundu enu a vinyo, mbawuyihana gudi athu ana tshita mudimo monzo yenji nu gudi enya mudimo enji ako.
16 Muene mbawuzula enya mudimo enu a mala nu enya mudimo enu a akhetu, nu ngombe jienu jiabalega gubonga nu phunda jienu, mbawujihaga ha gumukalegela mudimo.
17 Muene mbawuzangula gitshinyi gia kumi gia imeme yenu nu khombo jienu, mbamubua nji enya mudimo enji.
18 Gudi nu lusugu enue mbamudibela mukunda nu fumu muaditombela. Uvi mu lusugu luene, Yehowa mbagashigo gumitegelela.”
19 Uvi enya Isalele atunyile ndaga jiawambelele Samuele, azuelele egi: “Gima ndo. Uvi tudi mutshigina gukhala nu fumu mbawutuhinyina.
20 Ngenyi mbatukhala gifua ifutshi iko; fumu wetu mbawutusophesa, mbawututuameza nu mbawuluisa mbalagaji jietu.”
21 Samuele wavuile ndaga jiagasue jiazuelele athu, gungima wajiwambelele Yehowa.
22 Yehowa wawambelele Samuele egi: “Tshita ndaga jidi ene muzuela, atombele fumu ha guatuameza.” Gungima Samuele wawambelele enya Isalele egi: “Muthu nu muthu avutuge mu dimbo diawo.”
