Mukanda wa Thomo wa Samuele 9:1-27
-
Samuele watagana nu Saula (1-27)
9 Guakhalele nu yala mumoshi wa mu giphuta gia Benjame, jina dienji Kishi. Yala muene wakhalele mujigulu wa Abiele. Abiele wakhalele mun’a Selole, Selole wakhalele mun’a Bekolata, Bekolata wakhalele mun’a Afia. Kishi wakhalele muenya giphuta gia Benjame, wakhalele nji nu umonyi wavula.
2 Kishi wakhalele nu mona wa yala mumoshi jina dienji Saula. Saula wakhalele muvuala, wakhalele nji wabonga diago, guakhalelego nu muthu muko wabonga gifua muene gu Isalele. Wakhalele waleha gubalega athu agasue; athu agasue akhalele gumusugila ha phanga.
3 Lusugu lumoshi, phunda* jia Kishi jiatotele. Hene wawambelele mun’enji Saula egi: “Ngabuba, zula muenya mudimo mumoshi, ndenu n’enji mukambe phunda.”
4 Saula nu muenya mudimo wenji abalegele gu khanda ya milundu ya Efrayime ayile uu nu gu khanda ya Shalisha, uvi amonelego phunda jiene. Ayile nji uu nu gu khanda ya Shalima uvi ajimonelego. Abalegele mu membo agasue a enya giphuta gia Benjame, uvi ajimonelego nji.
5 Tangua ahetele gu khanda ya Sufe, Saula wawambelele muenya mudimo wenji egi: “Iza tuvutuge, gula ndo tata wajiya gusendesa gudisagesa mukunda nu esue ha fundo dia gudisagesa mukunda nu phunda jiatotshi.”
6 Uvi muenya mudimo wamuwambelele egi: “Tala, gudi nu muthu mumoshi wa Nzambi mu dimbo edi. Athu ana gumunemesa muavula. Ndaga jiagasue jiana zuela muene jiana tagenesewa. Tuye tumutale, matangua ako wajiya gutuwambela fundo tuajiya gumona phunda.”
7 Uvi Saula wamuhudile egi: “Gula tuaya, itshi mbatuhana muthu muene? Handaga tushigo luko nu mapha mu makuba* etu; tushigo nji nu gima giko tuajiya guhana gifua kado gudi muthu wa Nzambi wa giamatshidia. Itshi tudi nayo tuajiya gumuhana?”
8 Muenya mudimo wamuvutudile egi: “Tala, ngudi nu ndambo ya makuta a utadi wa siliva.* Mbanguahana muenya mudimo wa Nzambi wa giamatshidia, muene mbawutuwambela fundo tuajiya gumona phunda jiene.”
9 (Mu tangua dikulu gu Isalele, gula muthu udi mutshigina guhula Nzambi, akhalele muzuela egi: “Iza tuye gudi muthu wana diangela gumona ndaga mbajibua.” Handaga athu ana tamegewa mangino egi baprofete, thomo akhalele mutamegewa egi athu ana diangela gumona ndaga mbajibua.)
10 Saula wawambelele muenya mudimo wenji egi: “Ndaga wazuela idi yabonga, tuye.” Hene ayile mu dimbo diakhalele muthu wa Nzambi wa giamatshidia.
11 Tangua akhalele mukanduga ha guya mu dimbo diene, ataganele nu ana a akhetu akhalele muzoga mu dimbo ha guya muthaya meya. A ahudile egi: “Muthu wana diangela gumona ndaga mbajibua udi mu dimbo edi ba?”
12 Ana a akhetu ene avutudile egi: “Ayi udi guene. Tala muene munu gutuama dienu. Ndenu muphushi; mangino weji mu dimbo handaga athu adi muhana milambu ha fundo dia gukombelela.
13 Gula muangina mu dimbo, mudi gumusanga. Ndenu muphushi handaga udi naye gukanduga ha fundo dia gukombelela hagula adie. Athu ashigo mudia gula muene gahetelego guene handaga muene udi naye gukombelela mukunda nu milambu. Gula muene wakombelela, athu ajiya giwa gudia. Ndenu muphushi luenyelu mudi gumusanga guene.”
14 Saula nu muenya mudimo wenji akandugile. Tangua anginyile mu dimbo, ataganele nu Samuele; wakhalele muzoga ha gutagana nawo ha guya nawo ha fundo dia gukombelela.
15 Gutuama egi Saula ahete mu dimbo diene, Yehowa wawambelele* Samuele egi:
16 “Hamene mu tangua edi, mbangugutumina yala mumoshi wa mu mavu a enya giphuta gia Benjame. Udi naye gumumba maji hagula abue fumu wa athu ami enya Isalele; muene mbawahuluisa ha mago a enya Filistiya. Handaga ngamonyi malamba adi mubuila athu ami, ngavui nji gudila guawo.”
17 Tangua Samuele wamonele Saula, Yehowa wamuwambelele egi: “Muthu ngaguwambela egi ‘Muene udi naye gutuameza athu ami,’* muene yowu.”
18 Saula wasuenele gudi Samuele ha mufulo wa dimbo, wamuwambelele egi: “Ngabuba, nguleze inzo ya muthu wana diangela gumona ndaga mbajibua.”
19 Samuele wamuvutudile egi: “Muthu muene ame yowu. Balega gutuama diami tukanduge ha fundo dia gukombelela; mangino muza mudia nu ame. Hamene mu gimenegena mbanguguwambela ndaga jiagasue udi mutshigina gujiya* gungima mbangugubemba ha guya.
20 Mudisagesago mukunda nu phunda jinyi jiatotshi masugu thathu abalega gale, handaga jiamuenega gale. Ima yagasue yabonga ya gu Isalele idi ya nanyi? Ishigo yaye nu fami* yagasue ya sh’aye ba?”
21 Saula wamuvutudile egi: “Ame ngudi muenya giphuta gia Benjame, ga giphuta gazonda mukatshi dia iphuta ya Isalele; fami yetu nji ishigo nu ndando yavula mukatshi dia fami jiagasue jia giphuta gia Benjame. Mukunda natshi udi gunguwambela giwa ndaga jia luholo elu?”
22 Gungima Samuele wazanguile Saula nu muenya mudimo wenji, wayile nawo mu inzo ana dila; waahanele mafundo abalega gubonga mukatshi dia athu atamegewe. Athu akhalele hene akhalele mala 30.
23 Samuele wawambelele muthu wakhalele mutelega ima egi: “Iza nu gitshinyi gia ima inyi ngaguhanyi nu ngaguwambela ha gubamba.”
24 Muthu muene wajile nu kulu dia mbiji nu ima iko yakhalele holu, wayihagele yagasue gutuama dia Saula. Gungima Samuele wawambelele Saula egi: “Ima eyi idi gutuama diaye ayibambi mukunda nu aye. Dia, agubambela nayo hagula uyidie luholo tuadibungisa haha. Handaga ngaawambela egi: ‘Ngudi nu ngenji.’” Hene Saula wadile nu Samuele mu lusugu luene.
25 Gungima akatugile ha fundo dia gukombelela, avutugile mu dimbo. Samuele walanduile guta maga nu Saula holu dia inzo* yenji.
26 Mu lusugu lualanduile, hatshiele gisugu, azugile nu gimenegena giagasue. Samuele watamegele Saula holu dia inzo, wamuwambelele egi: “Dilonde uye, handaga ngushigo mutshigina gugushiphisa.” Hene Saula wadilondele, muene nu Samuele azogele.
27 Tangua ahetele gu songi ya dimbo, Samuele wawambelele Saula egi: “Wambela muenya mudimo waye adiangele gutuama.” Muenya mudimo muene wadiangele gutuama diawo. Gungima Samuele wazuelele luko egi: “Uvi aye magana. Ngudi nu ndaga yaguguwambela yakatuga gudi Nzambi.”
Mbimbi goshi'a diyiji
^ Mu Hebelu: “phunda jia akaji.”
^ Nga “khombe.”
^ Mu Hebelu: “Gitshinyi gia nguana gia shekele imoshi.” Shekele imoshi yakhalele bagrame 11,4. Tala App. B14.
^ Mu Hebelu: “wakangudile matshui a.”
^ Nga “muene mbawubamba athu ami.”
^ Mu Hebelu: “ndaga jiagasue jidi mu mutshima waye.”
^ Nga “inzo.”
^ Mu tangua dikulu, jinzo jiavula jia gu Isalele jiakhalele nu fundo holu dia yangi dinyi athu akhalele mudia, muwenda nga mubanda.
