Mukanda wa Thomo Gudi Enya gu Tesalonike 2:1-20
2 Aphangi, mudi mujiya muabonga egi guza guetu mukatshi dienu guazolele mbuto.
2 Ngatshima thomo tuataganele nu malamba avula nu usageshi tangua tuakhalele gu Filiphi gifua luholo mudi guyijiya, uvi Nzambi wetu watuhuile gikhesa gia gumilongesa lukuma luabonga ludi muza gudi muene ikhale tuataganele nu umbalagaji wakola.*
3 Handaga malongo tudi gumihana ashigo abola, tushigo nji guahana nu matangi abola nga mukunda nu gumihuiga.
4 Uvi luholo tuatombewe gudi Nzambi ha gulongesa lukuma luabonga, tuana zuela ndo ha gusuanguluisa athu, uvi ha gusuanguluisa Nzambi handaga muene wana tala mu mitshima yetu.
5 Gifua luholo mudi guyijiya, tuazuelelego mbimbi jia mulebo mukatshi dienu. Tuakambelego gudimonesa gifua tudi athu abonga ha gumihuiga hagula mutuhane ima. Nzambi yowu mujiya ndaga yiyi muabonga.
6 Luholo tudi apostolo a Klisto, tuakhalele naye gukhala ginemo giakola mukunda nu enue, uvi tuakambelego egi athu atutumbuise. Tuakambelego lutumbu nga gudi enue nga gudi athu ako.
7 Uvi tuabuile athu atuluga mukatshi dienu gifua luholo mama wana wamuesa an’enji nu wana guakalegela ndaga nu guzumba.
8 Luholo tuakhalele nu guzumba guakola mukunda nu enue, tuakhalele hehi* ha gumilongesa lukuma luabonga lua Nzambi nu ha guhana monyo wetu mukunda nu enue handaga tuamizumbile muavula diago.
9 Aphangi, enue mujiya mudimo wakola tuakalegele nu lamba tuamonele. Tangua tuakhalele gumilongesa lukuma luabonga lua Nzambi, tuatshitshile mudimo phipha nu muanya hagula tukhadigo ginemo giakola nga gudi muthu mumoshi mukatshi dienu.
10 Aphangi, enue mujiya egi tangua tuakhalele mukatshi dienu, tuakhalele athu agujinginyina, tuakalegele ndaga jiabonga, tuakhalelego nga nu gubola gumoshi gu meso enu. Nzambi nji yowu mujiya ndaga eyi.
11 Mudi mujiya muabonga egi tuakhalele gumihana malongo, tuakhalele gumikolesa, tuakhalele mutemesa muthu wagasue mukatshi dienu gifua muana tshita tata gudi an’enji,
12 hagula mulandule guwenda mu luholo luatagana ludi musuanguluisa Nzambi yonu wamitamegele mu Ufumu wenji nu mu lutumbu luenji.
13 Gishina giene tuana hana Nzambi mersi tangua diagasue handaga tangua muavile mbimbi ya Nzambi tuamilongesele, muayitshiginyilego gifua mbimbi ya athu, uvi muayitshiginyile egi idi mbimbi ya Nzambi gifua luholo idi yene. Aphangi Mbimbi yene idi gumikuatesa.
14 Aphangi, mualandula gifezegeselo gia mahungu a Nzambi adi gu Yudea hamoshi nu Klisto Yesu, handaga muamonesewe lamba gudi athu a mu gifutshi gienu gifua luholo ene adi mumonesewa lamba gudi enya Yuda,
15 anyi ashiyile Fumu Yesu nu baprofete nu atusagesele. Ana suanguluisa ndo Nzambi, ndaga ana tshita ene jianago gubata gubonga nga gudi muthu mumoshi.
16 Ene adi mukamba ha gutukanga njila ha gulongesa enya ifutshi mbimbi mbayaahuluisa. Tangua adi mutshita ngenyi, adi muvudisa gubola guawo, uvi gu suga khabu jia Nzambi mbajidi guajila.
17 Uvi aphangi, tangua athu atukatudile gu ngolo mukatshi dienu mukunda nu tangua diazonda, (tuadikhaphele mu muila uvi mu mitshima ndo), tuakalegele yagasue ha guza gumimona* luko handaga tuakhalele muvua uhote wenu muavula.
18 Gishina giene tuatshiginyile guza gumitala, ame Phaula ngatshiginyile gale guza gumitala, ishigo mbala imoshi uvi mbala mbadi, uvi Satana watukangele njila.
19 Gutuama egi Fumu Yesu avutuge, nanyi udi felela dietu nu gusuanguluga guetu nu gifulu gietu gia lutumbu? Ishigo enue ba?
20 Enue mudi diago lutumbu luetu nu gusuanguluga guetu.
Mbimbi goshi'a diyiji
^ Nga ndo yajiya gukhala egi, “mukatshi dia malamba avula.”
^ Mu Greke: “tuasuangulugile.”
^ Mu Greke: “ha gumona phala jienu.”
