Mukanda wa Thomo Gudi Enya gu Tesalonike 4:1-18
4 Aphangi, ha gusugisa, tuamihanele malongo ha gujiya luholo muajiya gusuanguluisa Nzambi. Muana tshita gale ngenyi, uvi henyaha tudi gumitoga nu gububa guagasue mu jina dia Fumu Yesu egi landulenu gutshita ngenyi muavula gubalega.
2 Mudi mujiya muabonga malongo tuamihanele mu jina dia Fumu Yesu.
3 Handaga Nzambi udi mutshigina egi mukhale athu a gijila, mutune uthambi.*
4 Muthu wagasue mukatshi dienu udi naye gujiya luholo lua gukanda muila wenji hagula akhale muthu wa gijila nu hagula Nzambi amutshigine.*
5 Mukhadigo gifua athu anago gujiya Nzambi, handaga ana landula nzala jiawo jiakola jia gubungisa muila.
6 Mukunda nu ndaga eyi, muthu mumoshi gakalegelago phangi’enji gubola. Gakambigo gumutambula gima gienji gu ngolo, handaga Yehowa wana hana ndola gudi athu ana tshita ndaga jia luholo elu, gifua luholo tuamiwambelele nu tuamitemesele masugu abalega.
7 Nzambi gatutamegelego ha gukhala athu a usala, uvi ha gukhala athu a gijila.
8 Hene, muthu udi mutuna malongo wawa gashigo mutuna muthu, uvi udi mutuna Nzambi yonu wamihanele nyuma yenji.
9 Mu ndaga yatadila guzumba aphangi tushigo nu funu ya gumisonegela, handaga Nzambi wana gumilongesa ha guzumba athu ako.
10 Muana tshita gale ngenyi gudi aphangi agasue a gu Maseduane. Uvi tudi gumitoga egi itshitenu luko muavula gubalega.
11 Kalagalenu ngolo ha gukhala mu guhuima, mukhadigo gudinginyisa mu ndaga jiangane. Tshitenu mudimo nu mago enu gifua luholo tuamiwambelele,
12 hagula athu adi hanze ya hungu amone egi mudi muwenda mu luholo luatagana nu mushigo guatoga nga gima gimoshi.
13 Aphangi, tudi mutshigina egi mujiye ndaga yatadila athu afile gale, hagula mukhadigo gudisagesa muavula gifua athu ashigo nu felela.
14 Gula tudi mutshigina egi Yesu wafile nu wafuzumugile, tudi mutshigina nji egi Nzambi mbawufuzumuna athu anyi afile mu gudivua nu Yesu.
15 Tudi gumiwambela mu njila ya mbimbi ya Yehowa egi mukatshi dietu, athu anyi mbaakhala nu monyo mu lusugu mbaluza Fumu mbaashigo mudiangela guya mu dilu gutuama dia athu afile;
16 handaga Fumu mbawukatuga mu dilu, mbawubulumuga nu mulolo wakola nu dijui diakola dia Fumu ya anjelo nu gudila gua phungi ya Nzambi. Mu tangua diene, athu anyi afile mu gudivua nu Klisto mbaakhala athu a thomo ha gufuzumuga.
17 Gungima, esue mbatukhala nu monyo mbatudibungisa nawo hamoshi, mbatukanduishiwa mu matuta ha gutagana nu Fumu mu muhehe, mbatukhala n’enji ivo nu ivo.
18 Na hene, landulenu gudikolesa mu mbimbi jiji.
Mbimbi goshi'a diyiji
^ Mu Greke: porneya. Tala Ukoteleshi wa Mbimbi.
^ Nga “hagula athu amunemese.”
