Mukanda wa Thomo Gudi Enya gu Tesalonike 5:1-28
5 Aphangi mu ndaga yatadila matangua nu sungi, ishigo nu funu egi tumisonegele nga gima gimoshi.
2 Handaga mudi mujiya muabonga egi lusugu lua Yehowa mbaluza diago gifua nzangi mu phipha.
3 Tangua mbadizuela ene egi: “Tudi mu guhuima nu mu ubambi!” gufua mbaguajila mu gisagumuisa gifua luholo misongo ya guvuala yana jila mukhetu wa vumo. Ene mbaamonyigo luholo lua gulenga nga hazonda.
4 Uvi aphangi, enue mushigo mu phipha hagula lusugu luene lumisagumuise gifua luholo muanya wana zogela nzangi mu gisagumuisa.
5 Handaga mukut’enu agasue mudi mu muanya. Tushigo mu phipha.
6 Hene, tukhadigo mubanda gifua athu ako, uvi tukhale nu gikolekole nu matangi a ungambi.
7 Handaga mu phipha muene athu ana banda tulo, mu phipha muene nji athu ana kuatewa matombe.
8 Uvi luholo tudi mu muanya tukhalenu nu matangi a ungambi, tusudigenu gutshigina nu guzumba gifua gazawu ga ita ha thulo ha gudibamba, tusudigenu nji felela dia guhuluga gifua gifulu gia ita,
9 handaga Nzambi gatutombelego ha gutuvila khabu, uvi watutombele ha gutuhuluisa mu njila ya Fumu wetu Yesu Klisto,
10 yago wafile mukunda nu esue hagula tujinge n’enji hamoshi ikhale tudi nu gikolekole nga tudi gu tulo.*
11 Gishina giene, khalenu gudihana gikhesa nu gudikolesa gifua luholo muana guyikalagala gale.
12 Aphangi, tudi gumitoga ha gunemesa athu ana kalagala mudimo wakola mukatshi dienu, anyi ana gumituameza mu mudimo wa Fumu nu ana gumitemesa.
13 Khalenu guanemesa muavula nu guzumba guagasue mukunda nu mudimo wawo, khalenu mu guhuima nu athu ako.
14 Aphangi, tudi gumitoga egi temesenu* athu anyi ashigo mutumaga, zuelenu mbimbi jiabonga gudi athu adi nu gikenene,* kuatesenu athu adi aguleba, khalenu nu guhuiminyina gudi athu agasue.
15 Tshitenu yagasue hagula nga muthu mumoshi gavutulago gubola mu gubola, uvi tangua diagasue tshitenu ndaga jiabonga mukatshi dienu nu gudi athu ako.
16 Suangulugenu tangua diagasue.
17 Khalenu mukombelela tangua diagasue.
18 Hanenu mersi mu ndaga jiagasue. Nzambi wana tshigina egi alandudi a Klisto Yesu atshite ngenyi.
19 Mujimigo tshuya tua nyuma.
20 Musegululago mbimbi jia baprofete.
21 Kambenu gujiya ndaga jiagasue, jinginyinenu gu ndaga jiabonga.
22 Tunenu ndaga jiabola jia maluholo agasue.
23 Ngudi musamba egi Nzambi wa guhuima amibuise athu a gijila mukunda nu mudimo wenji. Abambe makalegelo* abonga muana monegesa, nu monyo* wenu, nu muila wenu, hagula mukhadigo nu gubola mu ndaga jiagasue uu nu tangua Fumu wetu Yesu Klisto mbawuza.
24 Nzambi wamitamegele mbawutagenesa diago ndaga jiji jiagasue, handaga muene wana tagenesa mbimbi jienji.
25 Aphangi, landulenu gukombelela mukunda nu esue.
26 Menegenu aphangi agasue nu gudiyamba.*
27 Ngudi gumitoga mu jina dia Fumu ha gutanga mukanda wuwu gutuama dia athu agasue.
28 Khenda jiavula jia Fumu wetu Yesu Klisto jikhale nu enue.
Mbimbi goshi'a diyiji
^ Nga “nga tuafua.”
^ Nga “hanenu malongo gudi athu.”
^ Nga “athu adi aguleba muila.”
^ Nga “nyuma.” Mu Greke: “pneu’ma.”
^ Tala Ukoteleshi wa Mbimbi (Monyo).
^ Mu Greke: “nu beze ya gijila.”
