Mukanda wa Thomo Gudi Timote 3:1-16
3 Mbimbi eyi idi yatagana ha guyishila mutshima: Muthu udi mutshigina gubua mukulu, watshigina ha gukalagala mudimo wabonga.
2 Mukulu udi naye gudituameza mu luholo luatagana hagula athu amonyigo nga ndaga yabola yaguzuela mukunda nu muene. Udi naye gukhala nu mukhetu phamba mumoshi, udi naye gukhala nu makalegelo abonga, udi naye gukhala muthu wana tangiza muabonga, gashigo naye gukhala muenya lumuamua, udi naye gukhala nu khadilo dia guyamba athu, udi naye gujiya gulongesa.
3 Gashigo naye gukhala muthu wana kuatewa matombe, gashigo naye gukhala muenya khuta,* gashigo naye gukhala muenya ndaga jiakola, gashigo naye gukhala muenya nguma, gashigo naye gukhala muthu wana zumba makuta.
4 Udi naye gukhala muthu wana tuameza fami yenji muabonga, udi naye gukhala nu ana atumaga nu adi nu makalegelo abonga.
5 (Handaga gula muthu gashigo mutuameza fami yenji muabonga, luholo lutshi muene wajiya gubamba hungu dia Nzambi?)
6 Gashigo naye gukhala mulandudi muhe-muhe, gula ndo wajiya gubua muenya lulendo, ngenyi mbaamusophesa gifua luholo asophesele Diabulu.
7 Udi naye nji gukhala nu lukuma luabonga gudi enya hanze hagula gaseguluishiwago* nu gabuigo mu muheto wa Diabulu.
8 Luholo lumoshi nji, akuateshi a mudimo adi naye gukhala athu ana hagewa mutshima, ashigo naye gukhala enya makano mbadi,* ashigo naye gukhala athu ana nua matombe* avula, ashigo naye nji gukhala nu nzala ya guheta ima mu luholo luabola.
9 Adi naye gukhala a gujinginyina gu gisuegi gia gijila giatadila gutshigina nu mutshima waphelegeta.
10 Adi naye nji gulolewa thomo ha gujiya gula adi atagana ha gukalagala mudimo wene, gungima gula ashigo nga ndaga imoshi yabola, ajiya gubua akuateshi a mudimo.
11 Luholo lumoshi nji, akhetu adi naye gukhala athu a gushila mutshima, ashigo naye gukhala enya mambo, adi naye gukhala nu makalegelo abonga, adi naye gukhala agujinginyina gudi Nzambi mu ndaga jiagasue.
12 Mukuateshi wa mudimo udi naye gukhala nu mukhetu phamba mumoshi. Udi naye gutuameza an’enji nu fami yenji mu luholo luabonga.
13 Handaga mala anyi ana kalagala mudimo mu luholo luabonga ana nemesewa nu ana khalago nu woma ha guzuelela gutshigina guawo mukunda nu Klisto Yesu.
14 Ngumumona egi gualeha ndo ngumuza gununu, uvi ngagusonegela mukanda wuwu
15 hagula gila ngashipha ujiye luholo lua gudituameza mu inzo ya Nzambi, inyi idi hungu dia Nzambi wa monyo, kunji nu fondasio ya giamatshidia.
16 Gisuegi gia gijila giatadila gujinginyina gudi Nzambi gidi diago giakoma: Yesu wabuile muthu, Nzambi wamutamegele egi muthu wabonga tangua diazudile muene luko muila wa mu nyuma nu havutugile muene gudi anjelo, lukuma luenji lualongesewe gudi enya ifutshi, enya ha mavu ahagele gutshigina gudi muene, muene wahetele lutumbu.
Mbimbi goshi'a diyiji
^ Nga “muthu wana beta athu ako.”
^ Nga “guvuishiwa musonyi.”
^ Nga “enya mambo.”
^ Mu Greke: “vinyo.”
