Mukanda wa Thomo Gudi Timote 4:1-16
4 Nyuma ya Nzambi idi muzuela haphelo egi mu masugu adi muza athu avula mbaashigo mukhala luko nu gutshigina, handaga mbaalandula mbimbi jia mambo* jiana monega gifua jiana katuga gudi Nzambi nu malongo a bademo.
2 Mbaalandula mbimbi jia athu ana mba mambo, mitshima ya athu ene yana khala gifua yakondewe nu utadi wa tshuya.
3 Ana tunyisa athu ha gudizula mu ulo, ana tunyisa nji athu ha gudia ima yafugile Nzambi. Uvi Nzambi wafugile ima yene hagula athu adi nu gutshigina nu adi mujiya diago giamatshidia ayidie, amuhane mersi.
4 Ima yagasue yafugile Nzambi idi yabonga. Gushigo nu gima gimoshi giajiya gutunyiwa gula tudi muhana Nzambi mersi ha gugidia.
5 Handaga mbimbi ya Nzambi nu isambu yana buisa ima yene yabonga.
6 Gula wahana aphangi malongo awa, mbawubua muenya mudimo wabonga wa Klisto Yesu. Mbawumonesa egi udi ya gukula nu udi ya gujinginyina mu mbimbi jia gutshigina nu mu malongo abonga walandudile.
7 Tuna mene jia mambo jianago gunemesa Nzambi, gifua jinyi akhetu agukola ana zuela, uvi kalagala ngolo ha gusala ya gujinginyina gudi Nzambi.
8 Saga jia gukolesa muila jiana bata gubonga mu ndaga jiazonda, uvi gukhala ya gujinginyina gudi Nzambi guana bata gubonga mu ndaga jiagasue, handaga guana gutuhana felela dia gukhala nu monyo mangino nu ha guheta monyo mu masugu adi muza.
9 Ndaga eji jidi jiatagana ha gujishila mutshima nu jidi naye gutshiginyiwa.
10 Gishina giene tudi mukalagala ngolo handaga tuana sha mutshima gudi Nzambi wa monyo, Muhuluishi wa athu a maluholo agasue, wana huluisa muavula athu adi a gujinginyina gudi muene.
11 Landula guhana malongo awa nu gualongesa.
12 Ubembigo egi nga muthu mumoshi asegulule ulenge waye, uvi khala gifezegeselo giabonga mukunda nu athu adi a gujinginyina gudi Nzambi mu guzuela, mu makalegelo, mu guzumba, mu gutshigina nu mu mutshima waphelegeta.
13 Gutuama egi nguze, landula gudihana ha gutanga gutuama dia athu avula, khala muhana athu ako gikhesa* ha gukalagala ndaga jiabonga, khala nji gualongesa.
14 Ubolesago khapho diaguhanewe mu njila ya mbimbi jia baprofete tangua hunji dia akulu diaguhagele mago.
15 Khala mutangigiza ndaga eji, dihane diago mu ndaga jiene. Ngenyi, athu agasue mbaamona diago egi udi mukula mu nyuma.
16 Khala watema mu luholo luaye lua guwenda nu mu malongo aye. Kolesela mu ndaga eji. Gula watshita ngenyi, mbawudihuluisa nu mbawuhuluisa nji athu adi gugutegelela.
