Mukanda wa Thomo Gudi Timote 5:1-25
5 Ubalelago* kota dia yala, uvi muwambele ndaga mu luholo luabonga gifua luholo wana wambela sh’aye. Wambela mavuala a mala gifua aphangi aye a mala.
2 Akhetu a gukola awambele gifua amama, mavuala a akhetu gifua aphangi’aye a akhetu nu mutshima waphelegeta.
3 Kuatesa* akhetu a gafunda anyi adi diago hakhawo.*
4 Uvi gula mukhetu wa gafunda udi nu ana nga nu ajigulu, ene adi naye thomo gukuatesa enya fami yawo ha gumonesa egi adi a gujinginyina gudi Nzambi. Adi naye guhana mvuaji jiawo nu akhakh’awo ima adi naye funu, handaga gutshita ngenyi gudi guatagana gu meso a Nzambi.
5 Mukhetu wa gafunda udi diago hakhenji nu udi gashigo nga nu gima wana haga felela dienji gudi Nzambi. Wana landula gububila Nzambi nu gumukombelela phipha nu muanya.
6 Uvi mukhetu wa gafunda udi mukamba gutagenesa nzala jia muila wenji udi ya gufua ngatshima udi nu monyo.
7 Landula guahana malongo awa hagula akhadigo nga nu gubola gumoshi.
8 Gula muthu gashigo mutagenesa nzala jia enya fami yenji nu jia athu adi monzo yenji, muene wabembele gale gusha gutshigina mu ndaga tuana tshigina. Gubola guenji guabalega gua muphagano.
9 Udi naye gusonega jina dia mukhetu wa gafunda mu mukanda gula udi nu ivo 60, gula wakhalele nu yala phamba mumoshi,
10 gula udi mujiyiwa egi wakhalele mutshita ndaga jiabonga, gula wasansele ana, gula wakhalele muyamba athu, gula wakhalele muweva ikanzo ya athu a gijila, gula wakhalele mukuatesa athu akhalele mu lamba, gula wakhalele nji gudihana mu midimo yagasue yabonga.
11 Uvi usonegago majina a akhetu a gafunda anyi adi mavuala gu mukanda, handaga tangua nzala jia gubungisa muila jiana guakanga njila ha gukalegela Klisto mudimo, ana tshigina egi azudiwe gawo mu ulo.
12 Ene mbaasophesewa handaga ataganeselego ndaga alayele mukunda nu gutshigina.
13 Ndaga iko yenyeyi, ene ashigo nu mudimo wa gukalagala, adi muya nu guwenda inzo nu inzo. Ndaga iko yabalega gubola idi egi ene adi mubua enya izuele-zuele, enya lufeto, adi gudinginyisa mu ndaga jiangane, adi nji muzuela ndaga ashigo naye guzuela.
14 Ngudi mutshigina egi akhetu a gafunda anyi adi mavuala aye mu ulo, avuale ana, akuatese enya inzo yawo, ahanyigo mbalagaji njila ya guzuela ndaga jiabola mukunda nu esue.
15 Ako mukatshi diawo abembele gale njila yabonga ha gulandula Satana.
16 Gula phangi wa mukhetu udi nu enya fami yenji adi akhetu a gafunda, udi naye guakuatesa hagula akhadigo ginemo mukunda nu hungu. Ngenyi hungu diajiya gukuatesa akhetu a gafunda anyi adi akhawo.*
17 Akulu ana tuameza mu luholo luabonga adi naye gunemesewa muavula diago. Adi naye gunemesewa ngenyi gula adi mutshita mudimo wakola mu guzuela nu mu gulongesa.
18 Handaga mukanda wa Nzambi udi muzuela egi: “Ushigo naye gujitshiga ngombe gu bonzo tangua idi mudiata mbuto ha gujisuwa.” Udi nji muzuela egi: “Muenya mudimo udi naye guheta lufuto luenji.”
19 Gula afunda mukulu,* matemue adi naye gukhala mbadi nga thathu, gula ndo ushigo naye gutshigina.
20 Muthu udi mutshita gubola, mubalele ha meso a athu agasue hagula itemese athu ako.*
21 Ngudi guguwambela gutuama dia Nzambi nu gutuama dia Klisto Yesu nu gutuama dia anjelo atombewe egi tumagela malongo awa, ukhadigo nu khadilo dia gutangijila athu ako ndaga jiabola, nga lutondo.
22 Ububulago guhaga mago nga gudi muthu mumoshi,* udinginyisago mu gubola gua athu ako; landula gukhala nu mutshima waphelegeta.
23 Unuigo luko meya,* uvi nua ndambo ya matombe mukunda nu vumo nu mukunda nu misongo wana kata tangua diagasue.
24 Gubola gua athu ako guana monega gutuamena dia athu agasue nu ana sophesewa mbala imoshi, uvi gubola gua athu ako guanaza mumonega gungima.
25 Luholo lumoshi nji, midimo yabonga yana jiyiwa gudi athu agasue, midimo yabola nji yajiyilego gusuegewa.
Mbimbi goshi'a diyiji
^ Nga “udingilago.”
^ Mu Greke: “hana ginemua.”
^ Mu Greke: “anyi adi diago akhetu a gafunda.” Yakotelesa egi, ashigo nu muthu ya guakuatesa.
^ Mu Greke: “anyi adi diago akhetu a gafunda.” Yakotelesa egi, ashigo nu muthu ya guakuatesa.
^ Nga “muthu ya gukola.”
^ Mu Greke: “hagula athu ako avue woma.”
^ Yakotelesa egi, ububulago guhana muthu ginemo.
^ Nga “bemba gunua phamba meya.”
