Mukanda wa Thomo Gudi Timote 6:1-21
6 Athu anyi adi ahiga alandule gunemesa mafumu awo muavula, hagula athu azuedigo ndaga jiabola mukunda nu jina dia Nzambi nu malongo enji.
2 Gula mafumu awo adi Aklisto, ahiga ashigo naye gutuna guanemesa handaga adi aphangi. Uvi a akalegele mudimo nu mutshima umoshi, handaga athu mbaaheta gubonga gua mudimo wene adi aphangi Aklisto anyi tuana zumba.
Landula gualongesa ndaga eji nu guakolesa ha gujikalegela.
3 Gula muthu walongesa malongo ako nu gashigo mutshigina malongo abonga adi mukatuga gudi fumu wetu Yesu Klisto nu gula malongo enji ashigo mukuatesa athu ha gukhala ya gujinginyina gudi Nzambi,
4 udi muenya lulendo luakola nu gashigo mukotelesa nga gima. Wana tshigina guzola nguma nu guhaga giphapha mukunda nu mbimbi. Ndaga eji jiana tuma athu ha gukhala nu fuwa, ha gumana, ha guzuela ndaga jiabola mukunda nu athu ako* nu ha gutuna gushila athu ako mutshima.
5 Jiana tuma nji athu anyi matangi awo abolele gale nu ashigo luko mukotelesa giamatshidia ha gumana tangua diagasue mukunda nu ndaga jia githuhu. Ana tangiza egi gukombelela Nzambi mbaguabatela ikumba.
6 Idi yadiago egi gula muthu udi mukombelela Nzambi nu udi musuanguluga nu ima idi naye muene, wana heta gubonga guavula.
7 Tuajilego nga nu gima gimoshi ha mavu nu mbatushigo muya nga nu gima gimoshi.
8 Hene, gula tudi nu ima ya gudia nu milele,* tusuanguluge naye.
9 Uvi athu ana kamba gubua enya umonyi ana lolewa nu ana bua mu muheto nu mu nzala jia githuhu nu jiabola jinyi jiana bata athu mu gufua.
10 Handaga guzumba makuta gudi muji wa ndaga jiabola jia maluholo agasue. Athu anyi akudishile guzumba gua makuta abolesele gutshigina guawo, ataganele nu malamba a maluholo agasue.
11 Uvi aye muthu wa Nzambi, tuna ndaga eji. Landula ndaga jiabonga, khala ya gujinginyina gudi Nzambi, khala nu gutshigina nu guzumba, kolesela, khala muthu watuluga.
12 Lua ita yabonga mukunda nu gutshigina, kuata mangololo monyo wa ivo nu ivo unu Nzambi wagutamegele ha guheta nu unu watshiginyile ha meso a athu agasue.
13 Gutuama dia Nzambi munu wana hana ima yagasue monyo nu gutuama dia Klisto Yesu munu wazuelele nu gikhesa giagasue gutuama dia Phonse Philato, ngudi gugutoga
14 ha gutumagela mukhuala hagula ukhadigo nu ditona nga nu gubola gumoshi uu nu tangua mbadimonega Fumu wetu Yesu Klisto.
15 Muene udi Fumu ya gusuanguluga. Mu tangua diatombewe mukunda nu gumonega guenji, mbawumonesa ngolo jienji. Muene udi Fumu ya mafumu nu ya ahinyinyi agasue adi muhinyina.
16 Phamba muene udi gajiyilego gufua, wana khala mu muanya unu athu ajiyilego gusuena hehi, gushigo nga muthu wamumonele gale nga wajiya gumumona. Lutumbu nu ngolo jia ivo nu ivo jikhale gudi muene. Amen.
17 Wambela athu adi nu umonyi ha mavu awa* egi akhadigo enya lulendo,* ahagigo mutshima mu umonyi wana bola, uvi ahage mutshima gudi Nzambi yago wana gutuhana ima yagasue tuana khala nayo.
18 Awambele ha gutshita ndaga jiabonga, ha gukhala enya umonyi mu midimo yabonga, ha gukhala nu khadilo dia guhana nu ha gukhala hehi ha gukhaphela athu ima.
19 Gula atshita ngenyi, mbaabungisa umonyi wana katuga gudi Nzambi. Ngenyi mbaamonesa egi adi muhaga fondasio yabonga mukunda nu masugu adi muza, hagula ajiya gukuata mangololo monyo wa giamatshidia.
20 Timote, bamba ndaga jiaguhanewe, utegelelago mbimbi jia githuhu jinyi jianago gunemesa Nzambi nu matangi a athu anyi ana tangiza egi adi nu “ujiyi,” uvi ujiyi wawo wanago gudivua nu giamatshidia.
21 Athu ako amonesele nu lulendo luagasue egi adi nu ujiyi wa luholo elu abolesele gale gutshigina guawo.
Khenda jiavula jia Nzambi jikhale nu enue.
Mbimbi goshi'a diyiji
^ Nga “mashingo.”
^ Nga “fundo dia gudibamba.” Mu Greke: “ima ya guditshuiga.”
^ Nga “gindongo egi.” Tala Ukoteleshi wa Mbimbi.
^ Nga “gudikanduisa.”
