Mukanda wa Thomo wa Yone 2:1-29
2 An’ami azonda, ngudi gumisonegela ndaga eji hagula mutshitshigo gubola. Uvi gula muthu watshita gubola, tudi nu mukuateshi* udi nu Tata, mukuateshi muene udi Yesu Klisto muthu wabonga.
2 Muene udi mulambu* wahanewe mukunda nu gubola guetu hagula tudivue luko nu Nzambi, ishigo phamba mukunda nu gubola guetu hakhetu, uvi mukunda nu gubola gua ha mavu agasue.
3 Gula tudi mulandula gunemesa mikhuala yenji, idi mumonesa egi tuana gumujiya.
4 Gula muthu udi muzuela egi “ngana gumujiya,” uvi muene gashigo munemesa mikhuala yenji udi muenya mambo. Giamatshidia gishigo mukatshi dienji.
5 Uvi muthu yagasue watumagela mbimbi yenji, idi mumonesa egi wana zumba Nzambi muavula diago. Gutshita ngenyi guana monesa egi tuana gudivua n’enji muabonga.
6 Muthu yagasue udi muzuela egi wana gudivua n’enji muabonga udi naye gukalagala ndaga gifua muakalegele Yesu.*
7 Aphangi’ami ngana zumba, ngushigo gumisonegela mukhuala uhe-uhe, uvi ngudi gumisonegela mukhuala ukulu unu muajiyile sendese gu gisendeselo. Mukhuala wene ukulu udi mbimbi inyi muavile.
8 Ngudi gumisonegela luko mukhuala uhe-uhe, unu udi wa giamatshidia mukunda nu Yesu nu mukunda nu enue, handaga phipha idi mubalega, muanya wa giamatshidia udi gale mulema.
9 Muthu wagasue udi muzuela egi ngudi mu muanya, uvi muene nu umbalagaji nu phangi’enji, yowu genji mu phipha.
10 Muthu yagasue udi muzumba phangi’enji udi mu muanya. Gudi muene gushigo nga nu gima giajiya gumukhakhuisa.
11 Uvi muthu wagasue udi nu umbalagaji nu phangi’enji, udi mu phipha nu udi muwenda mu phipha. Muene gashigo mujiya fundo didi muya muene, handaga phipha yashiyile gale meso enji.
12 Ana azonda, ngudi gumisonegela handaga amitotesele gale masumu enu mukunda nu jina dienji.
13 Atata, ngudi gumisonegela handaga muajiyile muthu wakhalele guene sendese gu gisendeselo. Mavuala a mala, ngudi gumisonegela handaga muabingile muthu wabola. Enue ana azonda, ngudi gumisonegela handaga muajiyile Tata.
14 Atata, ngudi gumisonegela handaga muajiyile muthu wakhalele guene sendese gu gisendeselo. Mavuala a mala, ngudi gumisonegela handaga mudi nu ngolo. Mbimbi ya Nzambi idi mukatshi dienu, muabingile nji muthu wabola.
15 Muzumbigo mavu nga ima idi ha mavu. Gula muthu wazumba mavu, guzumba gua Tata gushigo mukatshi dienji.
16 Handaga ima yagasue ya ha mavu—nzala ya muila, nzala ya meso nu gudijiga ima udi naye nu lulendo luagasue*—yana katuga ndo gudi Tata, uvi yana katuga ha mavu.
17 Mavu awa adi mubalega nu nzala jienji jidi nji mubalega, uvi muthu udi mutshita gutshigina gua Nzambi udi musala mayilago.
18 Ana azonda, didi tangua dia gisugishilo, luholo muavile egi mbalagaji wa Klisto udi muza, henyaha mbalagaji jia Klisto jiavula jiamonega gale, hene tuajiya diago egi tudi mu tangua dia gisugishilo.
19 Azogele mukatshi dietu, uvi akhalelego athu etu; handaga gula nga akhalele athu etu, nga asalele nu esue. Uvi azogele mukatshi dietu ha gumonesa diago haphelo egi mukut’awo agasue akhalelego athu etu.
20 Enue muambiwe maji gudi muthu wa gijila, mukut’enu agasue mudi nu ujiyi.
21 Ngushigo gumisonegela handaga muajiyago giamatshidia, uvi ngudi gumisonegela handaga muajiya giamatshidia nu handaga mambo ana katugago mu giamatshidia nga hazonda.
22 Nanyi muenya mambo? Ishigo muthu udi mutuna egi Yesu gashigo Klisto ba? Muthu udi mutuna Tata nu Mona muene mbalagaji wa Klisto.
23 Muthu wagasue watuna Mona, Tata gajiyilego gumutshigina. Uvi muthu yagasue wahaga gutshigina gudi Mona, Tata mbawumutshigina nji.
24 Uvi enue, bambenu muabonga ndaga muavile sendese gu gisendeselo. Gula mudi mubamba muabonga ndaga muavile sadige gu gisendeselo, mbamudivua muabonga nu Mona, mbamudivua nji muabonga nu Tata.
25 Ndaga yatulayele muene yenyeyi: Monyo wa ivo nu ivo.
26 Ngamisonegela ndaga eji mukunda nu athu adi mukamba gumihuiga.
27 Uvi enue, Nzambi wamitombele mu njila ya nyuma* yenji, nyuma yene idi mukatshi dienu. Mushigo nu funu egi muthu amilongese nga gima gimoshi, uvi Nzambi wana kalegela nyuma yene ha gumilongesa ndaga jiagasue. Nyuma yene idi ya giamatshidia, yana gumba ndo mambo. Hene, khalenu gudivua n’enji gifua luholo nyuma yene yamilongesele ha gukalagala.
28 Enue ana azonda khalenu gudivua n’enji, hagula tangua mbadimonega muene muajiya guzuela woma ndo nu hagula mbamumulengigo nu musonyi mu lusugu mbaluza muene.
29 Gula mudi mujiya egi muene udi muthu wabonga, jiyenu nji egi muthu wagasue udi mutshita ndaga jiabonga udi mun’enji.
Mbimbi goshi'a diyiji
^ Nga “muzueledi.”
^ Nga “mulambu wa gutshuiga gubola.”
^ Mu Greke: “guwenda gifua muawendele muthu muene.”
^ Nga “gudisunzula mukunda nu ima udi naye.”
^ Mu Greke: “gumbiwa maji.”
