Mukanda wa Thomo wa Yone 3:1-24
3 Mudi mumona egi Tata watuzumbile diago muavula hagula tuajiya gutamegewa egi ana a Nzambi! Tudi diago an’enji. Gishina giene mavu anago gutujiya, handaga ene amujiyilego.
2 Aphangi ami a guzumba, henyaha tudi ana a Nzambi, uvi luholo mbatukhala khenji lumonesewa gale ndo. Tudi mujiya egi tangua mbadimonega muene, esue mbatukhala gifua muene, handaga mbatumona luholo ludi muene.
3 Muthu wagasue udi nu felela edi gudi muene, adibuise muthu waphelegeta gifua luholo muthu muene wana khala waphelegeta.
4 Muthu wagasue udi mulandula gutshita disumu udi mushiya mukhuala, handaga disumu didi gushiya mukhuala.
5 Mudi mujiya nji egi Yesu wajile ha gukatula masumu etu, muene nji gashigo nga nu disumu dimoshi.
6 Muthu wagasue udi gudivua n’enji muabonga, gana landula ndo gukalagala disumu. Muthu wagasue udi mulandula gukalagala disumu, gamumonele ndo nu gamujiyile ndo.
7 Ana a zonda, muthu gamihuigigo; muthu wagasue udi mulandula gukalagala ndaga jiabonga, udi muthu wabonga gifua luholo Yesu udi muthu wabonga.
8 Muthu udi mulandula gutshita disumu wajile gudi Diabulu, handaga Diabulu watshitshile disumu sendese gu gisendeselo.* Gishina giene Mun’a Nzambi wajile ha gushiya midimo ya Diabulu.
9 Muthu wagasue udi mun’a Nzambi gana landula ndo gukalagala disumu, handaga nyuma* ya Nzambi yana khala nu muene, muene gajiyilego gulandula gukalagala disumu handaga udi mun’a Nzambi.
10 Ndaga eyi yana monesa gudisha gudi mukatshi dia ana a Nzambi nu ana a Diabulu: Muthu wagasue gashigo mukalagala ndaga jiabonga nu gashigo muzumba aphangi’enji, gashigo mun’a Nzambi.
11 Handaga mbimbi muavile sendese gu gisendeselo yenyeyi: Tudi naye gudizumba;
12 tushigo naye gukhala gifua Gayino, yonu wakatugile gudi muthu wabola nu washiyile phangi’enji. Na washiyile phangi’enji mukunda natshi? Handaga midimo yenji yakhalele yabola, uvi midimo ya phangi’enji yakhalele yabonga.
13 Aphangi, mudihudigo gula mavu awa ashigo gumitshigina.
14 Tudi mujiya egi tuakhalele gifua athu a gufua, uvi henyaha tudi nu monyo handaga tuana zumba aphangi’etu. Muthu gashigo muzumba aphangi’enji, yowu genji gifua muthu wa gufua.
15 Muthu wagasue udi nu umbalagaji nu phangi’enji udi mushiyi wa athu. Mudi mujiya muabonga egi gushigo nga muthu mumoshi wana shiya athu mbawuheta monyo wa ivo nu ivo.
16 Tuakotelesa guzumba handaga Yesu wahanele monyo wenji mukunda nu esue, esue nji tudi naye guhana monyo wetu mukunda nu aphangi’etu.
17 Muthu wagasue udi nu ima, uvi wamona phangi’enji mu lamba muene nu gumuvila ndo khenda, luholo lutshi guzumba gua Nzambi guajiya gukhala mukatshi dienji?
18 Ana a zonda, tushigo naye guzumba athu phamba gu kano, uvi guzumba gudi naye gumonega mu makalegelo, gudi naye nji gukhala gua giamatshidia.
19 Mukunda nu ndaga eyi mbatujiya diago egi tuakatugile mu giamatshidia, mbatutshigina diago egi Nzambi wana gutuzumba,
20 ngatshima mutshima wetu udi gutusagesa mu ndaga imoshi, handaga Nzambi udi wakoma gubalega mitshima yetu nu wana jiya ndaga jiagasue.
21 Aphangi’ami a guzumba, gula mitshima yetu ishigo gutubela, tuajiyilego guvua woma ha gusuena gudi Nzambi.
22 Ndaga yagasue tuamutoga, wana gutuhana naye handaga tuana tumagela mikhuala yenji nu tuana tshita ndaga jiana gumusuanguluisa.
23 Mukhuala wenji wenyowu: Tuhage gutshigina mu jina dia Mun’enji Yesu Klisto nu tuzumbe athu ako gifua luholo luatuhanele muene mukhuala.
24 Muthu yagasue udi munemesa mikhuala ya Nzambi, wana gudivua muabonga nu Nzambi, Nzambi nji wana gudivua muabonga nu muthu muene. Nyuma yana gutuhana Nzambi yana gutukuatesa ha gujiya egi wana gudivua muabonga nu esue.
