Mukanda wa Thomo wa Yone 5:1-21
5 Muthu yagasue udi mutshigina egi Yesu udi Klisto, muthu muene udi mun’a Nzambi. Muthu wagasue udi muzumba Tata Nzambi udi nji muzumba ana a Nzambi.
2 Tuana zumba ana a Nzambi tangua tuana nemesa Nzambi nu mikhuala yenji.
3 Guzumba Nzambi guakotelesa egi tutumagele mikhuala yenji, handaga mikhuala yenji yana khalago yanema.
4 Handaga muthu wagasue udi* mun’a Nzambi wana binga mavu. Ndaga idi gutukuatesa ha gubinga mavu idi gutshigina guetu.
5 Nanyi wajiya gubinga mavu? Ishigo muthu munu udi nu gutshigina egi Yesu udi Mun’a Nzambi?
6 Muthu wajile mu njila ya meya nu mahatshi udi Yesu Klisto. Uvi gajilego phamba nu meya, wajile nji nu meya nu mahatshi. Nyuma idi mutshiginyisa ndaga eyi handaga nyuma idi ya giamatshidia.
7 Ndaga thathu jidi mumonesa giamatshidia giatadila Yesu:
8 Nyuma, meya nu mahatshi; ima eyi thathu yana gudivua muabonga.
9 Tuana tshigina ndaga jiana zuela athu, uvi ndaga jiana zuela Nzambi jidi jiakoma. Handaga Nzambi wamonesele gula Mun’enji udi nanyi.
10 Muthu wagasue udi musha gutshigina guenji gudi Mun’a Nzambi, wana monesa egi wana bamba ndaga jiamulongesele Nzambi mu mutshima wenji. Muthu gashigo musha gutshigina gudi Nzambi udi mubuisa Nzambi muenya mambo, handaga gashigo musha gutshigina gu ndaga yazuelele Nzambi mukunda nu Mun’enji.
11 Ndaga yene yenyeyi, Nzambi watuhanele monyo wa mayilago, monyo wene mbatuwuheta mu njila ya Mun’enji.
12 Muthu udi gudivua nu Mona, muene mbawuheta monyo wuwu. Uvi muthu gashigo gudivua nu Mun’a Nzambi, mbagashigo muheta monyo wene.
13 Ngudi gumisonegela ndaga eji hagula mujiye egi enue mudi musha gutshigina mu jina dia Mun’a Nzambi, mudi nu monyo wa mayilago.
14 Tudi musha mutshima gudi Nzambi* egi ndaga yagasue tuana gumulomba idi gudivua nu gutshigina guenji, wana gututegelela.
15 Luholo tudi mujiya egi wana gututegelela gu ndaga yagasue tuana gumulomba, tudi mujiya egi mbatuheta ima yagasue tuana lomba handaga tuamulombi naye.
16 Gula muthu wamona phangi’enji mutshita gubola gunu gushigo mubata gu gufua, asambe hagula Nzambi ahane phangi muene monyo. Mbawuhana nji monyo gudi athu anyi ashigo mutshita gubola guana gubata gu gufua. Gudi nu gubola guana bata gu gufua. Ngushigo gumituma ha gusamba mukunda nu gubola guene.
17 Ndaga yagasue yabola idi disumu. Uvi gudi nu disumu dianago gubata gu gufua.
18 Tudi mujiya egi muthu wagasue udi mun’a Nzambi gana landula ndo gutshita disumu, uvi mun’a Nzambi* wana gumubamba. Muthu wabola gajiyilego gumutshita nga gima gimoshi.
19 Tudi mujiya egi tuakatugile gudi Nzambi, uvi mavu agasue adi mu uhinyinyi wa muthu wabola.
20 Tudi mujiya egi Mun’a Nzambi wajile nu watuhanele ndunge hagula tuhete ujiyi wa muthu udi wa giamatshidia. Tuana gudivua muabonga nu muthu muene wa giamatshidia mu njila ya Mun’enji Yesu Klisto. Muene Nzambi wa giamatshidia nu monyo wa mayilago.
21 Ana azonda, lengenu nzambi jia ikhokho.*
Mbimbi goshi'a diyiji
^ Mu Greke: “gima giagasue gidi.”
^ Nga “guzuela woma guvua ndo.”
^ Yakotelesa egi: Yesu Klisto Mun’a Nzambi.
^ Nga “nzambi jia isongo.”
