Mukanda wa Mbadi Gudi Enya gu Kolinto 10:1-18
10 Ame Phaula, ngudi gumibubila mu gutuluga gua Klisto nu mu mutshima wenji wabonga. Athu ako mukatshi dienu ana zuela egi gula ngudi n’enu fundo dimoshi, ngakhala muthu wa guleba, uvi gula ngushigo n’enu fundo dimoshi, ngakhala muenya ngolo.
2 Ngudi gumibubila egi tshitenu yagasue hagula tangua mbanguza gumbo dienu, ngubalelago* athu anyi ana zuela egi tuana tshita ndaga gifua luholo athu a ha mavu awa ana tangiza.
3 Tuana kalagala ndaga gifua luholo athu ako ana tshita, uvi tuanago gulua ita gifua luholo athu ana gulua.
4 Handaga iluilo yetu ya ita ishigo gifua ya athu a ha mavu awa. Uvi Nzambi wana kolesa iluilo yene hagula ibuise phango jiakola jia seso.
5 Tuana buisa matangi abola nu ima yagasue yana kanga athu njila ha gujiya Nzambi. Tuana kuata matangi agasue a athu ha guabata* hagula atumagele Klisto.
6 Tangua mbamusendesa gutumagela Klisto mu ndaga jiagasue, gula muthu muko udi mulandula gushaga, mbatumuhana ndola.
7 Enue muana tadila ndaga gifua luholo jiana monega gu meso. Gula muthu watshigina diago egi muene udi muthu wa Klisto, udi naye gutangiza luko ndaga eyi: Luholo muene adi muthu wa Klisto, esue nji tudi athu a Klisto.
8 Fumu watuhuile ngolo hagula tukolese gutshigina guenu, uvi gumilebesa ndo. Ikhale ngadisunzula muavula mukunda nu ngolo jiene, ngajiyilego guvua musonyi.
9 Ngushigo mutshigina gumimonesa egi ngudi mukamba gumivuisa woma nu mikanda yami.
10 Handaga athu ako adi muzuela egi: “Mikanda ya Phaula yana zuela ndaga jia ndando nu idi nu ngolo. Uvi gula muene hakhenji udi hene, ganago guzuela nga gima gia funu; mbimbi jienji jiakhala jia githuhu.”
11 Athu adi muzuela ngenyi adi naye gujiya egi ima tuana zuela* mu mikanda yetu gula tushigo guene, yene mbatukalagala* tangua mbatukhala hene.
12 Esue tuanago guditanga nu athu ako nga gudifuanesa nu athu anyi ana gudisunzula. Luholo ana gudithesa nu luholo ana gudifuanesa hakhawo, ana monesa egi ashigo nu ndunge.
13 Uvi esue mbatushigo gudisunzula mukunda nu ndaga jinyi tuakalegelego, uvi mbatudisunzula phamba mukunda nu mudimo watuhanele Nzambi ha gukalagala, uu nu gudi enue nji.
14 Yadiago, tangua tuajile gumbo dienu, tuatshitshilego ndaga inyi Nzambi gatuwambelelego ha gukalagala. Uvi tuakhalele athu a thomo amilongesele lukuma luabonga luatadila Klisto.
15 Tushigo gudisunzula mukunda nu mudimo wa muthu muko, handaga esue tuakalegele phamba ndaga jinyi jiatuwambelele Nzambi ha gutshita. Uvi tudi nu gudifelela egi mbamulandula gukudisa gutshigina guenu. Mudimo tuakalegele mukatshi dienu mbawulandula nji guya gutuama. Ngenyi mbatukhala luko nu ndaga jiavula jia gutshita
16 ha gulongesa lukuma luabonga mu ifutshi idi gualeha nu enue. Ngenyi tuajiyilego gudisunzula mukunda nu ndaga jiakalegele gale athu ako mu mudimo wawo.
17 “Uvi muthu udi gudisunzula, adisunzule mukunda nu Yehowa.”
18 Handaga Yehowa ganago gutshigina muthu wana gudishimana hakhenji, uvi wana tshigina muthu munu muene hakhenji wana shimana.
Mbimbi goshi'a diyiji
^ Nga “ngudingilago.”
^ Mu Greke: “tuana kuata matangi agasue mu uhiga.”
^ Mu Greke: “tudi nji ngenyi mu mbimbi.”
^ Mu Greke: “mbatukhala nji ngenyi mu midimo.”
