Mukanda wa Mbadi Gudi Enya gu Kolinto 11:1-33
11 Ngudi mutshigina egi mukolesele mu ndaga ngudi mutshita gifua muenya malui. Yadiago, muana kolesela gale mukunda nu ame!
2 Handaga ngana gudisagesa mukunda nu enue gifua luholo Nzambi nji ana gudisagesa mukunda nu enue.* Ngamilayele ha gumihana mu ulo gudi yala mumoshi. Ngudi mutshigina gumihana gudi Klisto gifua mon’a mukhetu wa gandongo.*
3 Uvi ngudi muvua woma egi luholo nioga yahuigile Eva mu ndunge jienji jiabola, muthu muko wajiya gubolesa matangi’enu hagula mulandulago Klisto nu mutshima umoshi nu mukhadigo aphelegeta gutuama dienji.
4 Yadiago, gula muthu waza gumilongesa Klisto muko udi wagudisha nu munu tualongesele, nga ndo gula muaheta nyuma iko idi ya gudisha nu inyi muahetele, nga lukuma luko luabonga ludi lua gudisha nu lunu muatshiginyile, muana tshigina ndaga jidi muzuela muthu muene.
5 Uvi ngudi mutangiza egi ngadimoneselego nga mu ndaga imoshi egi apostolo enu akoma angubalega.
6 Uvi ikhale ngushigo mujiya guzuela muabonga, ngudi mujiya diago ndaga jiatadila Nzambi. Tuamimonesele ndaga eyi mu maluholo avula mu ndaga jiagasue.
7 Ngasuangulugile ha gumilongesa lukuma luabonga lua Nzambi lua githuhu. Uvi ngakalegele gubola luholo ngadibulumuishile hagula enue mukanduishiwe ba?
8 Ngazanguile* ima ya mahungu ako luholo ngatshiginyile ima* yene ha gumikuatesa.
9 Uvi tangua ngakhalele gumbo dienu nu ngakhalele mu lamba, ngatogelego nga muthu mumoshi gima,* handaga aphangi anyi akatugile gu Maseduane anguhanele ima yagasue ngakhalele nayo funu. Yadiago, ngatshitshile yagasue hagula ngutogigo nga muthu mumoshi gima.* Mbangulandula nji gutshita ngenyi.
10 Luholo ngudi muzuela giamatshidia giatadila Klisto, mbangushigo mubemba egi nga gima gimoshi gingukange njila ha gudisunzula mukunda nu ndaga yene mu membo a mu provense ya Akaya.
11 Mukunda natshi? Handaga nganago gumizumba ba? Nzambi udi mujiya egi ngana gumizumba.
12 Uvi mbangulandula gutshita ndaga ngudi mukalagala hagula athu anyi adi gudisunzula nu adi muzuela egi ene nji adi apostolo gifua esue, ahetshigo nga gishina gimoshi gia gudisunzuila.
13 Handaga athu awa adi apostolo a mambo. Adi muhuiga athu ako nu adi gudibuisa gifua adi apostolo a Klisto.
14 Tuajiyilego gudihula mukunda nu ndaga yene, handaga Satana hakhenji wana gudibuisa gifua muanjelo wa muanya.
15 Tuajiyilego nji gudihula gula enya mudimo enji adi gudibuisa tangua diagasue gifua enya mudimo a ndaga jiabonga. Uvi ndaga mbajiabuila gu gisugishilo, mbajikhala diago gifua mudi makalegelo awo.
16 Ngudi muzuela luko egi: Nga muthu mumoshi gatangizago egi ngudi muthu waheya. Uvi Ikhale muatangiza egi idi ngenyi, ngutshiginenu egi ngudi muthu waheya hagula ame nji ngudisunzule hazonda.
17 Ndaga ngudi muzuela henyaha ngushigo guyizuela gifua luholo Fumu adi naye guyizuela. Uvi ngudi guyizuela gifua muthu waheya wana gudishila mutshima nu wana gudisunzula.
18 Luholo athu avula ana gudisunzula mukunda nu ima ya ha mavu awa,* ame nji mbangudisunzula.
19 Enue mudi diago “enya ndunge,” hene muana tshigina nu mutshima wagasue ha gukhala nu athu aheya.
20 Yadiago, enue muana hena tedie gula muthu wamibuisa ahiga nu wadia ima yenu, nga ndo gula muthu wamitambula ima mudi nayo nu wadisunzula egi wamibalega, nga ndo wamibeta gu phala.
21 Tudi muvua musonyi ha guzuela ndaga eyi, handaga yajiya gumonega gifua tuakalegele ndaga gifua athu aguleba.
Uvi gula athu ako akalagala ndaga nu ngolo jiagasue, ngudi muzuela gifua muthu waheya egi, ame nji ngudi mutshita ndaga nu ngolo jiagasue.
22 Ene adi enya Hebelu ba? Ame nji ngudi muenya Hebelu. Ene adi enya Isalele ba? Ame nji ngudi muenya Isalele. Ene adi ajigulu* a Abalahama ba? Ame nji ngudi mujigulu wa Abalahama.
23 Ene adi enya mudimo a Klisto ba? Ngudi muzuela gifua muenya malui egi, ngudi muenya mudimo wa Klisto guabalega ene: Ngakalegele mudimo wavula guabalega ene, ngambiwe mu bologo mbala jiavula gubalega ene, ngabetewe fimbo jiavula, ngamonele nji gufua nu meso mahugo avula.
24 Enya Yuda angubetele fimbo 39 mbala thano.
25 Angubetele tubama mbala jitatu, angusonuene maseso mbala imoshi, ngabundugile mu masuwa mbala jitatu, ngahungumugile mu kianga lusugu lua mudidi phipha nu muanya.
26 Ngawendele muavula, ngamonele malamba mu mita, nzangi jiangusagesele, aphangi’ami a enya Yuda angumonesele lamba, athu a mu ifutshi iko nji angusagesele. Ngataganele nu malamba mu dimbo nu mu temu nu mu mita yakoma, nu mukatshi dia aphangi a mambo.
27 Ngakalegele mudimo wakola udi muhuidisa, ngabandele gikolekole phipha jiavula, ngakhalele nu nzala nu luhungu;* mbala jiavula ngakhalelego nu ima ya gudia, ngakhalele muvua guhuma, ngakhalelego nji nu milele.*
28 Gula tuakatula ndaga eji jiagasue, gudi nu ndaga jiko jiana gungusagesa masugu agasue.* Ngana vua gikenene mukunda nu mahungu agasue.
29 Nanyi udi waguleba, hene ame ngushigo waguleba? Nanyi wabua mu gubola, ame nu guvua khabu ndo?
30 Gula yatoga egi ngudisunzule, mbangudisunzula mukunda nu ndaga jidi mumonesa egi ngudi muthu waguleba.
31 Nzambi, Tata wa Fumi’etu Yesu, munu tudi naye gutumbuisa ivo nu ivo, udi mujiya egi ngushigo mumba mambo.
32 Guvelenele wa fumu Aleta wakhalele mubandemena dimbo dia Damase ha gungukuata.
33 Uvi aphangi angumbile mu musanda, angubulumuine ha fenetre ya gibayi* gia dimbo, hene ngahuluishiwe.
Mbimbi goshi'a diyiji
^ Mu Greke: “ngana gumivila fuwa gifua luholo Nzambi wanavua fuwa.”
^ Nga “athu aphelegeta.”
^ Mu Greke: “ngakuyile.”
^ Nga “ukuateshi.”
^ Nga “ngakhalelego ginemo nga gudi muthu mumoshi.”
^ Nga “ngukhadigo ginemo nga gudi muthu mumoshi.”
^ Yakotelesa egi, ima ya athu.
^ Mu Greke: “vungu.”
^ Nga “phuila.”
^ Mu Greke: “ngakhalele thowa.”
^ Nga “jiana gunguhana gikenene lusugu nu lusugu.”
^ Nga “kibindji.”
