Mukanda wa Mbadi Gudi Enya gu Kolinto 12:1-21
12 Ngudi naye gudisunzula; uvi ndaga yene ishigo nu ndando. Henyaha ngudi mutshigina guzuelela vizio nu ndaga jianguwambelele Fumu.
2 Ngudi mujiya muthu mumoshi udi mu gudivua guabonga nu Klisto, amuzanguile mu dilu dia thathu ivo 14 yabalega gale. Ngushigo mujiya gula amuzanguile mu muila nga amuzanguilego mu muila. Uvi Nzambi udi mujiya.
3 Yadiago, ngudi mujiya muthu muene, uvi ngushigo mujiya gula amuzanguile mu muila nga amuzanguilego mu muila. Uvi Nzambi udi mujiya.
4 Ayile n’enji mu phaladiso, wavile mbimbi jianago guzuelewa, jinyi muthu gashigo naye guzuela.
5 Mbangudisunzula phamba mukunda nu muthu wa luholo elu, uvi mukunda nu ame hakhami ndo. Ngajiya gudisunzula phamba mukunda nu guleba guami.
6 Ikhale ngatshigina gudisunzula, mbangushigo mukhala muthu waheya handaga mbanguzuela giamatshidia. Uvi ngushigo mutshigina gutshita ngenyi, hagula nga muthu mumoshi gazuedigo egi ngudi mutshita ndaga jiavula gubalega jinyi jidi mumona muene gudi ame nga jidi muvua muene gudi ame,
7 phamba handaga Fumu wanguwambelele ndaga jia gushimana.
Angumbile muya* mu muila hagula ngudisunzulago muavula gubalega. Muya wene wakhalele gifua muanjelo wa Satana wakhalele gungubeta tangua diagasue. Ngenyi ngajiyilego gudisunzula muavula gubalega.
8 Ngabubidile Fumu mbala jitatu hagula angukatule muya wene.
9 Uvi muene wanguwambelele egi: “Khenda jiavula ngaguvidile jiagutagana, handaga ngolo jiami jidi gugukuatesa tangua udi waguleba.” Hene, mbangudisunzula nu gusuanguluga guagasue mukunda nu guleba guami, hagula ngolo jia Klisto jisale holu diami gifua tenta.
10 Ngakhala nu gusuanguluga tangua ngana khala waguleba nu tangua ana gungushinga, nu mu tangua dia lamba nu tangua dia usageshi nu tangua ngana mona malamba a luholo nu luholo mukunda nu Klisto. Handaga tangua ngana khala waguleba, hene ngana khala nu ngolo.
11 Ngabua gami muthu waheya. Enue muangushinjigile ha gubua ngenyi, handaga muakhalele naye gunguzuelela. Ngushigo gami nu ndando, uvi ngadimoneselego nga gu ndaga imoshi egi apostolo enu akoma angubalega.
12 Yadiago, ngakalegele ndaga mukatshi dienu nu gufubidila guagasue ha gumonesa egi ngudi mupostolo. Ngakalegele ndaga jiavula jia gushimana nu midimo yakola.
13 Luholo ngamitogelego ukuateshi nga wa gima gimoshi, idi mumonesa egi ngamitshitshile gubola guavula gubalega mahungu ako ba? Ngutoteselenu mukunda nu ndaga yene.
14 Eyi mbala ya thathu ngudi mutshigina guza gumbo dienu. Gula ngaza, mbangushigo gumitoga nga gima gimoshi. Handaga ngushigo mukamba ima yenu, uvi ngudi mutshigina gumimona. Yadiago, ishigo ana adi naye gubambela mvuaji jiawo ima, uvi mvuaji jidi naye gubambela an’awo ima.
15 Uvi ame mbangusuanguluga guhana ima yami yagasue nu gudihana nu mutshima wami wagasue mukunda nu enue.* Gula ngana gumizumba muavula, enue muajiyilego nji gunguzumba gifua luholo ngana gumizumba ba?
16 Ikhale ngenyi, ngamitogelego nga ukuateshi wa gima gimoshi. Uvi enue mudi muzuela egi ngakhalele nu “ndunge jiabola” nu “ngamihuigile” hagula ngumikuate ha muheto.
17 Ngazanguile ima yenu tangua ngatumine athu gumbo dienu ba?
18 Ngalezele Tito ha guza gumbo dienu ha gumitala. Ngamutumile ha guza nu phangi muko wa yala. Tito wazanguile ima yenu ba? Ame nu Tito tuakhalelego nu matangi a luholo lumoshi ba? Tuatshitshilego nji ndaga jia luholo lumoshi ba?
19 Mudi mutangiza egi ndaga tudi muzuela jidi mukunda nu gudibingisa. Uvi ishigo ngenyi. Ngudi muzuela giamatshidia gutuama dia Nzambi handaga tudi alandudi a Klisto. Ndaga jiagasue tudi mukalagala jidi mukunda nu gumikolesa enue aphangi’etu tuana zumba muavula.
20 Ngudi muvua woma egi gula ngaza, ngumisange nu makalegelo ngakhalelego mutangiza; enue nji mungumonyigo nu makalegelo muakhalele mutangiza. Uvi ngudi muvua woma egi matangua ako ngajiya guza gumisanga nu khadilo dia gumana, dia ginjiongo, dia guvua khabu jiakola, dia nguma, dia guzuela ndaga jiabola, dia gufueta, khadilo dia lulendo nu khadilo dia lumuamua.
21 Yajiya gukhala egi gula ngaza luko gumbo dienu, Nzambi mbawunguvuisa musonyi gutuama dienu nu mbangudila mukunda nu athu avula akalegele gubola, uvi khenji abalumuna mutshima gu ndaga jia usala nu uthambi* nu ndaga jia musonyi* jinyi akalegele.
Mbimbi goshi'a diyiji
^ Nga “musonge.”
^ Nga “mionyo yenu.”
^ Mu Greke: porneya. Tala Ukoteleshi wa Mbimbi.
^ Mu Greke: aselgeya. Tala Ukoteleshi wa Mbimbi.
