Mukanda wa Mbadi Gudi Enya gu Kolinto 13:1-14
13 Eyi mbala ya thathu ngudi muza gumbo dienu. “Mulonga wagasue wana tshiginyiwa gula athu mbadi nga thathu ata uthemua.”*
2 Ikhale ngushigo n’enu luenyelu, uvi idi gifua ngakhalele n’enu mbala ya ngiadi. Ngudi mudianga gutemesa athu anyi atshitshile gubola nu athu ako agasue egi gula ngaza, mbangushigo guavila khenda.
3 Enue mudi mukamba gijiyishilo gidi mumonesa egi Klisto wana zuela diago mu njila yami. Muene gashigo waguleba mukunda nu enue, uvi udi nu ngolo mukatshi dienu.
4 Yadiago, muene washiyiwe ha mutshi handaga wakhalele waguleba. Uvi udi nu monyo mu ngolo jia Nzambi. Giamatshidia, esue nji tudi aguleba gifua luholo luakhalele muene. Uvi mbatuheta monyo hamoshi n’enji mukunda nu ngolo jiana gumimonesela Nzambi.
5 Khalenu guditala muabonga ha gujiya gula mudi nu gutshigina; khalenu nji guditala muabonga tangua diagasue ha gujiya gula mudi athu a luholo lutshi. Enue mushigo mujiya egi ame nu Yesu Klisto tuana gudivua muabonga ba? Gula ndo Nzambi wamitunyile gale genu.
6 Ngudi musha diago mutshima egi enue mbamujiya egi tuafishiwego milonga.
7 Tudi mukombelela Nzambi hagula enue mutshitshigo nga gima gimoshi giabola. Tushigo mutshita ngenyi ha gumonega gifua athu atshiginyiwe, uvi tudi mukombelela hagula enue mutshite ndaga jiabonga, ikhale esue tudi mumonega gifua tuatshiginyiwego.
8 Esue tushigo mutshita ndaga jishigo gudivua nu giamatshidia, uvi tudi mutshita ndaga phamba mu giamatshidia.
9 Tuana suanguluga muavula gula tudi aguleba uvi enue mudi nu ngolo. Tuana kombelela Nzambi egi amikuatese ha guvutuga mu njila yabonga.
10 Gishina giene ngudi gumisonegela ndaga eji hangushigo n’enu fundo dimoshi, hagula tangua mbangukhala n’enu fundo dimoshi, ngukhadigo muenya ndaga jiakola mu luholo lua gukalegela ngolo jianguhanele Fumu, uvi ngujikalegele ha gumikuatesa, uvi gumilebesa ndo.
11 Aphangi, khalenu nu gusuanguluga tangua diagasue, vutugenu mu njila yabonga, tshiginenu ukuateshi, khalenu matangi amoshi, khalenu mu guhuima. Ngenyi Nzambi wa guzumba nu wa guhuima mbawukhala n’enu.
12 Dimenegenu nu beze ya gijila.
13 Athu agasue a gijila amitumina lumene.
14 Khenda jiavula jia Fumu Yesu Klisto nu guzumba gua Nzambi, nu gubonga muana heta mu njila ya nyuma ya Nzambi, ikhale mukatshi dienu agasue.
Mbimbi goshi'a diyiji
^ Mu Greke: “kano.”
