Mukanda wa Mbadi Gudi Enya gu Kolinto 2:1-17
-
Phaula udi mutshigina egi aphangi a gu Kolinto akhale nu gusuanguluga (1-4)
-
Atotesela muenya gubola gubola guenji, amuvutula mu hungu (5-11)
-
Phaula waya gu Toloase, gungima waya gu Maseduane (12, 13)
-
Mudimo wa gulongesa; masuta abinga ita adi muvutuga (14-17)
-
Tushigo athu anyi ana gusumbisa mbimbi ya Nzambi (17)
-
2 Ngazuedi egi gula ngaza luko gumitala gumbo dienu, mukhadigo luko nu gikenene.
2 Handaga gula ngamihana gikenene, nanyi giwa mbawungusuanguluisa gula muthu munu ngahanele gikenene ndo?
3 Ngasonegele ndaga ngakhalele naye gusonega, hagula tangua mbanguza ngukhadigo nu gikenene mukunda nu athu anyi adi naye gungusuanguluisa, handaga ngudi musha mutshima egi ima yana gungusuanguluisa yana gumisuanguluisa nji mukut’enu agasue.
4 Ngamisonegele mukanda nu lamba diavula, nu gikenene giakola mu mutshima, nu masoji gu meso. Ngamisonegelego ha gumihana gikenene, uvi ngamisonegele ha gumijiyisa egi ngana gumizumba muavula.
5 Gula muthu mumoshi watshitshile ndaga yabola yahanele athu ako gikenene mukatshi dienu, ishigo mukotelesa egi gikenene giene wagihanele phamba gudi ame, uvi wagihanele nji athu agasue mu luholo lumoshi ngenyi. Uvi ngushigo mutshigina gukhala nu ndaga jiakola-kola mukunda nu mulonga owu.
6 Ndola yinyi athu avula ahanele muthu muene idi yatagana.
7 Henyaha mudi naye gumutotesela nu mutshima umoshi. Mudi naye gumukuatesa nji hagula muene gavuigo gikenene giavula gubalega.
8 Hene ngudi gumibubila ha gumonesa muthu muene egi muana gumuzumba.
9 Gishina giene ngamisonegele mukanda ha gujiya gula mbamumonesa egi muana tumaga mu ndaga jiagasue.
10 Gula muatotesela muthu gubola gu ndaga yatshitshile muene, ame nji ngudi gumutotesela. Yadiago, gula ngatotesela muthu gubola, ngana guyitshita mukunda nu gubonga guenu, ngana guyikalagala nji gu meso a Klisto.
11 Ngana kalagala ngenyi hagula Satana gatubingigo,* handaga tudi mujiya matangi’enji.*
12 Tangua ngahetele gu Toloase ha gulongesa lukuma luabonga luatadila Klisto, ngahetele luendu lua gukalagala mudimo wa Fumu.*
13 Ngadisagesele muavula handaga ngamonelego phangi’ami Tito. Hene ngadilayele nu aphangi, gungima ngayile gu Maseduane.
14 Uvi tudi muhana Nzambi mersi handaga wana gututuameza tangua diagasue ha guwenda hamoshi nu Klisto, gifua masuta abinga ita adi muvutuga. Muene wana gutukalegela nji hagula tulongese* ujiyi wenji mu mafundo agasue. Ujiyi wenji udi gifua mananashi a vumba diabonga!
15 Gu meso a Nzambi tudi gifua vumba diabonga dia mananashi a Klisto didi mumuangana mukatshi dia athu adi muhuluishiwa nu mukatshi dia athu adi mufua.
16 Mukunda nu athu adi mufua, didi vumba* dia gufua didi mubata gu gufua. Uvi mukunda nu athu adi muhuluishiwa, didi vumba dia monyo didi mubata gu monyo. Nanyi udi watagana lume mukunda nu ndaga eji?
17 Esue tudi atagana mukunda nu ndaga eji, handaga tushigo athu anyi ana gusumbisa* mbimbi ya Nzambi, gifua luholo athu avula ana guyitshita. Uvi tudi mulongesa nu giamatshidia giagasue gifua alandudi a Klisto. Yadiago, tudi atumiwi a Nzambi nu tudi mutshita mudimo owu gutuama dia Nzambi.
Mbimbi goshi'a diyiji
^ Nga “gatuhuigigo.”
^ Nga “masunga enji; mafelela enji.”
^ Mu Greke: “angukangudile mufulo mu Fumu.”
^ Nga “tujiyise.”
^ Nga “mananashi a gufua.”
^ Nga “athu anyi ana tshita mungenda wa mbimbi ya Nzambi.”
