Mukanda wa Mbadi Gudi Enya gu Kolinto 3:1-18
3 Mudi mutshigina tumiwambele luko gula tudi akuatshi? Nga ndo, mudi nu funu egi tumisonegele mikanda nga enue mutusonegele ha gukotelesa gula esue tudi akuatshi, gifua luholo athu ako adi guyitshita?
2 Enue hakhenu mudi mukanda wetu, wasonegewe mu mitshima yetu, wana jiyiwa nu wana tangewa gudi athu agasue.
3 Handaga enue mudi mumonesa egi mudi mukanda wa Klisto tuasonegele mu mudimo wetu. Mukanda wene wasonegewego nu meya a gusonegela mikanda, uvi wasonegewe nu nyuma ya Nzambi wa monyo. Wasonegewego holu dia maseso, uvi wasonegewe mu mitshima.
4 Tudi nu gudifelela gua luholo elu gudi Nzambi mu njila ya Klisto.
5 Tushigo muzuela egi tudi tuatagana ha gukalagala mudimo owu mu ngolo jietu, uvi Nzambi wana gutukuatesa ha guwutshita.
6 Nzambi watukuatesele ha gukhala enya mudimo a gikotelo gihe-gihe. Tushigo enya mudimo a mikhuala ya gusonega, uvi tudi enya mudimo a nyuma handaga mikhuala ya gusonega yana gubata gu gufua, uvi nyuma yana hana monyo.
7 Mikhuala yinyi idi mutuala gu gufua nu yasonegewe holu dia maseso, yajile nu lutumbu diago. Hene enya Isalele akhalelego nu luholo lua gutala phala ya Moize handaga phala yenji yakhalele muhenya nu lutumbu. Uvi lutumbu luene luakhalele naye guhua.
8 Gula mikhuala yahanewe nu lutumbu, mukunda natshi nyuma yajiyilego guhanewa nu lutumbu luavula gubalega?
9 Handaga gula mikhuala idi mubata gu gufua yakhalele nu lutumbu, mudimo wa gubuisa athu, athu abonga gu meso a Nzambi udi nu lutumbu luavula gubalega!
10 Yadiago, luholo gutumbuga guakoma gudi guene, gima giakhalele thomo nu gutumbuga giatambudiwe gutumbuga guenji.
11 Handaga gula gima ginyi giakhalele naye gukatudiwa giajile nu lutumbu, gutumbuga gua gima ginyi gidi naye gusala gudi naye gukhala guavula gubalega!
12 Luholo tudi nu felela edi, diana gutukuatesa ha guzuela woma ndo,
13 nu gutuna gutshita ndaga gifua Moize watshuigile phala yenji nu mulele hagula enya Isalele amonyigo gisugishilo gia gutumbuga gua gima ginyi giakhalele naye gukatudiwa.
14 Uvi ene akhalelego mukotelesa. Uu nu mangino, matangi awo adi gifua adi agutshuiga mulele wene. Ene ajiyilego nji gukotelesa gikotelo gikulu, handaga mulele wene wajiya gukatudiwa phamba mu njila ya Klisto.
15 Mitshima yawo nji idi yagutshuiga mulele wene uu nu mangino. Ngenyi ene ajiyilego gukotelesa ndaga jiasonegele Moize.
16 Uvi gula muthu wasombegesa makalegelo enji ha gukombelela Yehowa, mulele wene wana katuga.
17 Yehowa udi Nyuma; fundo didi nji nyuma ya Yehowa, athu ajiyilego gukhala ahiga.
18 Mukut’etu agasue tuakatudile mulele wakhalele mutshuiga phala jietu, tudi gifua nganza jidi mumonesa lutumbu lua Yehowa. Tudi musombegesa ha gubua gifua Nzambi nu ha gumonesa lutumbu luenji muavula gubalega,* gifua luholo ludi guyikalagala diago Yehowa handaga muene udi Nyuma.*
Mbimbi goshi'a diyiji
^ Mu Greke: “lutumbu nu lutumbu.”
^ Nga ndo yajiya gukhala egi, “gifua luholo ludi guyikalagala nyuma ya Yehowa.”
