Mukanda wa Mbadi Gudi Enya gu Kolinto 4:1-18
4 Hene luholo tudi nu mudimo owu mukunda nu khenda jiatuvidile Nzambi, tushigo mubemba.
2 Uvi tuabembele gale ndaga jia musonyi jinyi athu ana gusuega; tuanago nji guhuiga athu.* Tuanago gulunda nga gukatula ndaga imoshi mu mbimbi ya Nzambi, uvi tuana gujiyisa athu giamatshidia haphelo. Ngenyi gu meso a Nzambi tudi gifezegeselo giabonga mukunda nu mitshima ya athu agasue.
3 Gula lukuma luabonga tudi mulongesa ludi lua gutshuiga,* ludi lua gutshuiga gudi athu anyi adi mufua,
4 athu anago gusha gutshigina; nzambi wa ha mavu awa* wabuishile ndunge jiawo ufofo hagula ene amonyigo muanya wa lutumbu wa lukuma luabonga luatadila Klisto, yago udi gifuanesa gia Nzambi.
5 Tushigo mulongesa ndaga jietu hakhetu, uvi tudi mulongesa egi Yesu Klisto udi Fumu, nu tudi ahiga enu mukunda nu Yesu.
6 Handaga Nzambi wazuelele egi: “Muanya uleme mu phipha,” muene nji walemesele muanya wenji mu mitshima yetu ha gutuhana muanya wa ujiyi wa gutumbuga gua Nzambi udi muhenya mu phala ya Klisto.
7 Uvi tudi nu umonyi owu mu mabungu a wuma* ha gumonesa egi ngolo jiabalega ngolo jia athu, jidi jia Nzambi uvi jishigo jietu.
8 Tudi musagesewa khanda nu khanda, uvi ashigo gutukuata hagula tudinyigisago. Tushigo nu gima gia gukalagala, uvi tudi mujiya egi mbatuheta ukuateshi.*
9 Tudi mumonesewa lamba, uvi Nzambi gashigo gutubemba. Adi gutubuisa mu mavu, uvi ashigo gutushiya.
10 Tangua diagasue tudi mumona malamba a gufua mu muila wetu gifua anyi ataganele nawo Yesu, hagula egi monyo wa Yesu umonege nji mu muila wetu.
11 Yadiago, esue tudi nu monyo tudi mutagana tangua diagasue nu lamba dia gufua mukunda nu Yesu, hagula egi monyo wa Yesu umonege mu muila wetu wana gufua.
12 Hene gufua gudi mutshita mudimo mukatshi dietu, uvi monyo udi nu enue.
13 Esue nji tudi nu gutshigina* gua luholo lumoshi gifua luholo idi yagusonega mu mukanda wa Nzambi egi: “Ame ngashile gutshigina hene ngazuelele.” Esue nji tudi musha gutshigina hene tudi muzuela,
14 handaga tudi mujiya egi Muthu wafuzumuine Yesu mbawutufuzumuna nu esue nji hamoshi nu Yesu. Muene mbawutubata n’enu hamoshi gutuama dia Yesu.
15 Ndaga eji jiagasue jidi mukunda nu gubonga guenu, hagula khenda jiavula jia Nzambi jidivudise luko muavula, handaga athu avula adi muhana Nzambi mersi ha gumutumbuisa.
16 Hene tushigo mubemba; ikhale muila wetu* udi mubola, uvi mitshima nu matangi’etu* idi mubua ihe-ihe lusugu nu lusugu.
17 Malamba* tudi mutagana nawo adi azonda, adi mukunda nu tangua diazonda nji. Uvi malamba ene adi gutukuatesa ha guheta lutumbu luabalega gukoma* nu lua ivo nu ivo.
18 Tuanago guhaga meso etu mu ima idi mumonega, uvi tuana guahaga mu ima ishigo mumonega. Handaga ima idi mumonega idi mukunda nu tangua diazonda, uvi ima ishigo mumonega idi ya ivo nu ivo.
Mbimbi goshi'a diyiji
^ Nga “tuanago guwenda mu masunga.”
^ Nga “gusuega.”
^ Nga “gindongo egi.” Tala Ukoteleshi wa Mbimbi.
^ Nga “mu nzungu jia wuma.”
^ Nga ndo yajiya gukhala egi, “uvi tudi nu felela.”
^ Mu Greke: “nyuma ya gutshigina.”
^ Mu Greke: “umuthu wetu wa hanze.”
^ Mu Greke: “umuthu wetu wa mukatshi.”
^ Nga “usageshi.”
^ Mu Greke: “luanema.”
