Mukanda wa Mbadi Gudi Enya gu Kolinto 5:1-21
5 Tudi mujiya egi gula inzo yetu ya ha mavu awa, inzo eyi ya tenta, yamuangewa, Nzambi mbawutuhana inzo imoshi yatungiwego nu mago nu mbayikhala mayilago mu dilu.
2 Handaga mu inzo eyi ya ha mavu tudi mudila. Hene tudi muvua zagu-zagu egi nga tuasudiga gale inzo yetu ya mu dilu.
3 Ngenyi tangua mbatusudiga inzo yene, mbatukhadigo luko thowa.
4 Yadiago, esue tudi mu inzo eyi ya tenta, tudi mudila nu tudi gudisagesa muavula handaga tushigo mutshigina gukatula inzo eyi. Uvi tudi mutshigina gusudiga inzo iko yinyi ya tenta, hagula monyo uminye muila wunu wana gufua.
5 Nzambi hakhenji muene watulondele mukunda nu ndaga eyi; watuhanele nyuma yenji gifua gikudilo gia ndaga mbajiza.*
6 Hene tudi nu ngolo jiavula tangua diagasue nu tudi mujiya egi, hatudi musala nu muila owu,* tudi gualeha nu Fumu.
7 Handaga tudi muwenda mu gutshigina, uvi tushigo muwenda mu ima tudi mumona.
8 Yadiago, tudi nu ngolo jiavula, tudi mutshigina nji egi tukhale gualeha nu muila owu hagula tuye tukhale hehi nu Fumu.
9 Hene ikhale tudi gualeha n’enji nga tudi hehi n’enji, tudi mutshita ngolo ha gumusuanguluisa.
10 Handaga mukut’etu agasue tudi naye gumagana* gutuama dia tribinale ya Klisto,* hagula asophese muthu wagasue gifua mudi ndaga jiatshitshile muene tangua diakhalele muene mu muila, ikhale ndaga jiabonga nga jiabola.*
11 Hene tudi mujiya egi tudi naye guvuila Fumu woma. Tudi mukuatesa nji athu ha gusha gutshigina. Uvi Nzambi watujiya muabonga; ngudi nu felela egi mitshima yenu nji yatujiya muabonga.
12 Esue tushigo mutshigina luko gudisunzula mukunda nu enue. Uvi tudi gumiwambela ndaga eji jiagasue ha gumihana ngolo hagula mudisunzule mukunda nu esue. Ngenyi muajiya guhana mvutu gudi athu adi gudisunzula mukunda nu ndaga jidi mumonega gu meso, uvi jishigo mu mutshima.
13 Handaga gula tuandalele malui,* yakhalele mukunda nu Nzambi. Uvi gula tudi nu matangi abonga, idi mukunda nu enue.
14 Guzumba gudi nago Klisto gudi gutuhinyina, handaga tuakotelesa egi muthu mumoshi wafuile mukunda nu athu agasue. Hene athu agasue afuile.
15 Muene wafuile mukunda nu athu agasue hagula athu adi nu monyo, akhadigo luko nu monyo mukunda nu ene hakhawo, uvi akhale nu monyo mukunda nu muthu wafuile mukunda nu ene nu wafuzumuiwe.
16 Hene sendese henyaha, tushigo mutadila luko nga muthu mumoshi nu matangi a athu. Ikhale thomo tuakhalele mutadila Klisto nu matangi a athu, uvi henyaha tushigo gumutadila luko ngenyi.
17 Hene gula muthu udi nu gudivua guabonga nu Klisto, muene udi muthu muhe-muhe. Ima ikulu yatota, ima ihe-ihe yafugiwa.
18 Uvi ima yagasue yana katuga gudi Nzambi. Muene watukuatesele ha gudivua luko n’enji muabonga mu njila ya Klisto. Watuhuile nji mudimo wa gukuatesa athu ako ha gudivua luko n’enji muabonga.
19 Mudimo wene udi wa guwambela athu egi Nzambi wakuatesele athu a ha mavu ha gudivua luko n’enji muabonga mu njila ya Klisto. Muene gatangelego gubola guawo; watuhuile nji ginemo gia gulongesa lukuma lua gukuatesa athu ha gudivua luko nu Nzambi.
20 Hene esue tudi atumiwi ha fundo dia Klisto. Idi gifua Nzambi wakhalele mutamega athu ha guza gudi muene mu njila yetu. Tudi mububila athu ha fundo dia Klisto egi: “Divuenu luko muabonga nu Nzambi.”
21 Klisto gakhalelego nu gubola, uvi Nzambi wamuhanele gifua mulambu* mukunda nu gubola guetu, hagula egi mu njila yenji esue tubue athu abonga gu meso a Nzambi.
Mbimbi goshi'a diyiji
^ Nga “ndambo ya mbongo yana dianga guhanewa ha gufuta mukudi; gikudilo gia ndaga mbajiza gutuama.”
^ Mu Greke: “hatudi mu inzo yetu.”
^ Nga “gumuenega.”
^ Nga “gutuama dia fundo dia gusophesela dia Klisto.”
^ Nga “jia khuta.”
^ Nga “gula tuasalugile.”
^ Nga “mulambu wa gubola.”
