Mukanda wa Mbadi Gudi Enya gu Kolinto 6:1-18
6 Luholo tudi mutshita mudimo hamoshi nu Nzambi, tudi gumibubila luko ha gutshigina khenda jiavula jia Nzambi uvi mujimbilago gishina muatshiginyila khenda jiene.
2 Handaga muene udi muzuela egi: “Ngamitegelele mu tangua diatagana; ngamikuatesele nji mu lusugu lua guhuluishiwa.” Talenu! Henyaha edi tangua diatagana diago. Henyaha elu lusugu lua guhuluishiwa.
3 Tushigo mutshigina gukalagala nga ndaga imoshi yajiya gutuma muthu ha gubua mu gubola,* hagula athu azuedigo ndaga jiabola mukunda nu mudimo wetu.
4 Uvi tuana monesa mu ndaga jiagasue egi tudi enya mudimo a Nzambi. Tuana gukolesela mu malamba avula nu mu usageshi, nu mu tangua dia gikenene, nu mu malamba ako a luholo nu luholo.
5 Tuabetewe, tuambiwe mu bologo, tuataganele nu athu avula akhalele muzola nguma, tuatshitshile mudimo wakola, phipha jiko tuakhalele mubanda gikolekole, tuakhalelego nu ima ya gudia;
6 tushigo enya usala, tudi mujiya giamatshidia muabonga, tudi athu ahuiminyina, enya gisemo, nyuma ya Nzambi yana gututuameza, guzumba guetu gushigo nji gua mambo.
7 Tuana zuela giamatshidia, tuana zegemena mu ngolo jia Nzambi; tudi nu iluilo* gu koko dia madia* nu dia mahidi,* yana gutukuatesa ha gutshita ndaga jiabonga.
8 Athu adi gututumbuisa nu adi gutusegulula, adi muzuela ndaga jiabola nu ndaga jiabonga mukunda nu esue; adi gutumona gifua enya mambo, uvi esue tudi muzuela giamatshidia.
9 Athu adi gutumona gifua tushigo mujiyiwa, uvi tudi mujiyiwa muabonga; adi gutumona gifua athu a gufua,* uvi esue tudi nu monyo; adi gutuhana ndola, uvi ashigo gutushiya.
10 Athu adi gutumona gifua tudi nu gikenene, uvi tudi nu gusuanguluga tangua diagasue; adi gutumona gifua tudi phutu, uvi tuana kuatesa athu avula ha gubua enya umonyi; adi gutumona gifua tushigo nga nu gima, uvi esue tudi nu ima yagasue.
11 Aphangi’etu a gu Kolinto, tuamiwambelele ndaga haphelo.* Tuamikangudile diago mitshima yetu.
12 Esue tushigo gumikangela mitshima yetu, uvi enue muatukangele mitshima yenu.*
13 Hene ngudi muzuela gifua ngudi muwambela an’ami egi, enue nji kangulenu diago mitshima yenu.
14 Mudibungisago nu athu ashigo alandudi a Yesu. Handaga gutshita ndaga jiabonga guana gudivua nu khadilo dia gushiya mikhuala ba? Nga ndo, muanya wana gudivua nu phipha ba?
15 Gudivua gutshi gudi mukatshi dia Klisto nu Beliale?* Nga ndo, gudivua gutshi gudi mukatshi dia mulandudi wa Yesu nu muthu gashigo mulandudi wa Yesu?*
16 Gudivua gutshi gudi mukatshi dia tempelo ya Nzambi nu isongo? Handaga esue tudi tempelo ya Nzambi wa monyo; gifua luholo luazuelele Nzambi egi: “Mbangukhala mukatshi diawo, mbanguwenda nji mukatshi diawo, mbangukhala Nzambi wawo, ene mbaakhala athu ami.”
17 “Hene Yehowa udi muzuela egi: ‘Zogenu mukatshi diawo, dikhaphenu nawo, mukuatshigo luko gima gia usala;’” “‘ngenyi ame mbangumiyamba.’”
18 “Yehowa Nzambi wa Ngolo Jiagasue udi muzuela egi: ‘Ame mbangubua sh’enu, enue mbamubua an’ami a mala nu a akhetu.’”
Mbimbi goshi'a diyiji
^ Nga “tushigo mutshigina gukhakhuisa athu.”
^ Mu Greke: “iluilo yatagana.”
^ Yajiya gukhala egi, mukunda nu guluisa mbalagaji.
^ Yajiya gukhala egi, mukunda nu gudibamba gula mbalagaji jiatuluisa.
^ Nga “adi gutumona gifua athu atagana ha gufua.”
^ Nga “tuakangudile muabonga makano etu ha guzuela n’enu.”
^ Nga “esue tushigo mulebesa guzumba guetu mukunda nu enue, uvi enue mudi mulebesa guzumba guenu mukunda nu esue.”
^ Jina edi diakatuga mu mbimbi ya Hebelu, idi mukotelesa egi “Gima gia Githuhu.” Jina diene didi muzuelela Satana.
^ Nga “gima gitshi mulandudi wa Yesu wakhala nagio hamoshi nu muthu gashigo mulandudi wa Yesu?”
