Mukanda wa Mbadi Gudi Enya gu Kolinto 7:1-16
7 Aphangi ngana zumba muavula, luholo tudi nu gutendelela ogu, tudiwevenu gu ima yagasue yana gubuisa muila nga matangi etu usala, hagula egi tubue diago athu a gijila adi muvuila Nzambi woma.
2 Tukangudilenu mitshima yenu.* Esue tuatshitshilego nga muthu mumoshi gubola, tuazangelelego nga muthu mumoshi, tuahuigilego nji nga muthu mumoshi.
3 Ngushigo muzuela ngenyi ha gumifuisa milonga, handaga ngazuelele gale egi gufua nga monyo guajiyilego gusombegesa guzumba guavula tuakhala nago mukunda nu enue.
4 Ngudi gumiwambela ndaga mu giamatshidia giagasue, ngudi gudisunzula mukunda nu enue. Ngaheta diago ngolo jiavula, ngudi nji nu gusuanguluga guavula mu malamba agasue tuataganele nawo.
5 Yadiago, tangua tuahetele gu Maseduane, tuahululugilego;* uvi tuakhalele mumonesewa lamba khanda nu khanda. Mbalagaji jiakhalele gutuluisa, tuakhalele nji nu woma mukunda nu mahungu.
6 Uvi Nzambi wana hana ngolo gudi athu adi aguleba, watukuatesele tangua diajile Tito.
7 Tuasuangulugile mukunda nu guza gua Tito, nu luholo muamukuatesele handaga wanguwambelele egi mudi nu uhote wavula wa* gungumona, mudi nu gikenene giavula, muana gudisagesa nji mangololo* mukunda nu ame. Ndaga yene yangusuanguluishile luko muavula.
8 Mukanda ngamisonegele wamihanele gikenene, uvi ngushigo gudisagesa mukunda nu ndaga yene. Thomo ngadisagesele (handaga mukanda wene wamihanele gikenene, uvi gikenene giene giakhalele mukunda nu tangua diazonda).
9 Henyaha ngushigo musuanguluga phamba handaga muavile gikenene, uvi ngudi musuanguluga nji handaga gikenene gienu giamitumine ha gubalumuna mitshima. Muavile gikenene giakatugile gudi Nzambi, hene esue tuamitshitshilego nga ndaga imoshi yabola.
10 Gikenene gidi muza gudi Nzambi giana tuma muthu ha gubalumuna mutshima hagula ahuluishiwe; ngenyi muene ganago gudisagesa mukunda nu gikenene giene. Uvi gikenene gia enya ha mavu awa giana gubata gu gufua.
11 Idi mumonega haphelo egi muavuile gikenene gifua luholo ludi mutshigina Nzambi. Hene muatshitshile ngolo ha gukalagala ndaga jiabonga; muamonesele diago egi mushigo nga nu gubola gumoshi. Muadisagesele mukunda nu gubola muakalegele, muavidile Nzambi woma, muatshiginyile nji ha gubalumuna mitshima yenu. Muakombelele Nzambi nu mutshima umoshi, nu muavile gikenene mukunda nu gubola muakalegele; muamonesele nji mu ndaga jiagasue egi muakhalelego nga nu gubola gumoshi* gu mulonga owu.
12 Ngamisonegelego mukanda mukunda nu muthu wakalegele gubola, nga mukunda nu muthu watshitshiwe gubola. Uvi ngamisonegele ha gumona gula mbamumonesa diago gutuama dia Nzambi egi muakhalele nu nzala yakola ya gututegelela.
13 Ndaga yene yatuhanele diago ngolo.
Uvi yatuhanelego phamba ngolo. Tuasuangulugile nji muavula luholo tuamonele egi Tito wakhalele nji nu gusuanguluga, handaga mukut’enu agasue muamukuatesele.
14 Tangua ngawambelele Tito ndaga jienu, ngajizuelele nu gudisunzula guagasue, ngavuilego musonyi. Uvi gudisunzula tuadisunzuile gutuama dia Tito gudi gua giamatshidia, ndaga jiagasue nji tuamiwambelele jidi jia giamatshidia.
15 Tangua diana gutangiza Tito khadilo dia mukut’enu agasue dia gutumaga, nu luholo muamuyambele nu woma nu ginemua giagasue, wana gumizumba muavula diago.
16 Ngudi nu gusuanguluga handaga ngajiya gumishila mutshima mu ndaga jiagasue.*
Mbimbi goshi'a diyiji
^ Nga “tulondelenu fundo mu mitshima yenu.”
^ Mu Greke: “mila yetu yahululugilego.”
^ Nga “giheho giavula gia.”
^ Mu Greke: “mudi nu gikhesa giavula.”
^ Nga “muakhalele aphelegeta.”
^ Nga ndo yajiya gukhala egi, “ngajiya guheta gikhesa mukunda nu enue.”
