Mukanda wa Mbadi Gudi Enya gu Kolinto 8:1-24
8 Aphangi, henyaha tudi mutshigina gumiwambela ndaga yatadila khenda jiavula jia Nzambi, jiamonesele muene gudi mahungu a gu Maseduane.
2 Aphangi awa akhalele nu lamba mukunda nu usageshi wakola ataganele nawo. Uvi akhaphele ima yawo nu gusuanguluga guagasue ngatshima ene akhalele nu uphutu wakola. Ngenyi amonesele egi akhalele nu khadilo dia guhana muavula.
3 Ahanele ima yawo gifua mudi guvula gua ima akhalele nayo. Ngudi gumiwambela egi ahanele ima yavula gubalega yinyi akhalele nayo.
4 Ene hakhawo atububidile egi tuahane luendu hagula ahane ima akhalele nayo, nu ahane mago gu mudimo owu wa gukuatesa athu a gijila.
5 Ahanele ima yavula gubalega yinyi tuakhalele mutangiza. Uvi mu gutshigina gua Nzambi, adihanele nu mutshima umoshi mu mudimo wa Fumu; atukuatesele nji.
6 Hene tuawambelele Tito ha guya mumanesela mudimo wa mukungo wa ima muahanele nu mutshima umoshi, handaga muene wasendesele mudimo wene mukatshi dienu.
7 Mudi nu ima yavula gifua: gutshigina, mbimbi, ujiyi nu khadilo dia gudihana; luko muana gutuzumba gifua luholo esue nji tuana gumizumba. Luholo lumoshi nji, khalenu nji muhana muavula nu mutshima umoshi.
8 Ngushigo muzuela ngenyi ha gumihana mikhuala. Uvi ngudi gumiwambela hagula mujiye egi athu ako akhala nu khadilo dia gudihana, nu ha gujiya gula mudi diago nu guzumba gua giamatshidia.
9 Handaga mudi mujiya khenda jiavula jia Fumi’etu Yesu Klisto. Muene wakhalele muenya umonyi, uvi wabuile phutu mukunda nu enue, hagula enue nji mubue enya umonyi mu uphutu wenji.
10 Ngudi muhana matangi’ami gu mulonga owu: Idi mukunda nu gubonga guenu. Handaga givo gimoshi giabalega gale, muasendesele guhana mukungo, muamonesele nji egi mudi nu nzala yakola ya guhana.
11 Henyaha maneselenu ndaga muasendesele, hagula gutshigina guenu guabonga gutagenesewe gifua mudi guvula gua ima mudi nayo.
12 Gula muthu wahana gima nu mutshima umoshi, Nzambi wana gugitshigina, handaga Nzambi wana tshigina egi muthu ahane ima yinyi idi nayo muene, uvi yinyi gashigo nayo ndo.
13 Handaga ngushigo mutshigina egi athu ako ngualebesele ndaga, uvi enue ngumikolesele milonga.
14 Uvi ngudi mutshigina egi mukhale luholo lumoshi. Ngenyi ima mudi nayo yavula henyaha ikuatese athu ako ha guheta ima ashigo nayo; ima adi nayo yavula, imikuatese nji nu enue ha guheta ima mushigo nayo, hagula mukut’enu agasue mukhale luholo lumoshi.
15 Idi gifua luholo yasonegewe mu mukanda wa Nzambi egi: “Muthu wakhalele nu ima yavula, gakhalelego nayo yavula gubalega. Muthu wakhalele nu ima yazonda, gakhalelego nayo nji yazonda gubalega.”
16 Tudi muhana Nzambi mersi handaga wambile matangi mu mutshima wa Tito ha gumikuatesa gifua luholo esue nji tudi gumikuatesa.
17 Handaga muene watshigina diago ndaga tuamutogi, uvi udi nji nu nzala yakola ya gumikuatesa. Muene hakhenji watshigina ha guza gumbo dienu ha gumitala.
18 Uvi tudi gumutuma hamoshi nu phangi muko munu mahungu agasue adi mushimana gu ndaga jidi mutshita muene mukunda nu lukuma luabonga.
19 Mahungu amutombele nji ha guwenda nu esue nu ha gutukuatesa ha gukhaphela athu ima mukunda nu gutumbuga gua Fumu, nu ha gumonesa athu egi tudi nu nzala yakola ya guakuatesa.
20 Tushigo mutshigina egi athu atufete mukunda nu mudimo owu tudi mukalagala ha gukhaphela aphangi ima.
21 Handaga tudi ‘mutshita ngolo ha gukalagala ima yagasue nu giamatshidia giagasue gu meso a Yehowa nu gu meso a athu.’
22 Tudi guatuma nji ha guza nu phangi’etu muko wa yala. Phangi muene tuamulolele gale mbala jiavula, tuamonele egi wana gudihana mu ndaga jiavula. Mangino nji udi gudihana luko muavula, handaga wana gumishila mutshima mangololo.
23 Henyaha gula muthu wamihula mihu ha gujiya gula Tito udi nanyi, muwambelenu egi muene udi futa diami wa mudimo mukunda nu gubonga guenu. Uvi gula amihula mihu mukunda nu aphangi’etu ako anyi adi muza n’enji, zuelenu egi ene adi apostolo* a mahungu mukunda nu gutumbuga gua Klisto.
24 Hene monesenu aphangi awa egi muana guazumba diago nu mutshima wenu wagasue. Monesenu nji mahungu gishina tuana gudisunzula mukunda nu enue.
Mbimbi goshi'a diyiji
^ Nga “atumiwi.”
